ഹീര തട്ടിപ്പ്; 300 കോടിയുടെ ആസ്തി കണ്ടുകെട്ടി, എറണാകുളം, മലപ്പുറം, കോഴിക്കോട് ജില്ലകളിലുള്ളവരാണ് തട്ടിപ്പിന് ഇരയായത്
പലിശരഹിത പ്രസ്ഥാനം എന്ന പേരില് നിക്ഷേപകരില് നിന്ന് കോടികള് സമാഹരിച്ച ഹൈദരാബാദിലെ ഹീര ഗ്രൂപ്പിന്റെ ആസ്തികള് സാമ്പത്തിക കുറ്റാന്വേഷണ വിഭാഗം കണ്ടുകെട്ടി. ഹൈദ്രബാദ് കേന്ദ്രീകരിച്ച കമ്പനിയാണ് തട്ടിപ്പ് നടത്തിയത്. 300 കോടിരൂപയുടെ ആസ്തികളാണ് കണ്ടുകെട്ടിയത്. ഇതോടെ തട്ടിപ്പിന് ഇരയായവര്ക്ക് പ്രതീക്ഷ കൈവന്നിരിക്കുകയാണ്. അതേസമയം, സംസ്ഥാനത്തിനകത്ത് അന്വേഷണം ഇഴഞ്ഞുനീങ്ങുന്നത് ഇരകള്ക്ക് ആശങ്കയുളവാക്കുന്നുണ്ട്. അന്തര്സംസ്ഥാന സാമ്പത്തിക കുറ്റകൃത്യങ്ങള് ആയതിനാല് ലോക്കല് പൊലീസില് നിന്ന് അന്വേഷണം നേരത്തെ ക്രൈംബ്രാഞ്ചിനെ ഏല്പ്പിച്ചിരുന്നു. എന്നാല് അന്വേഷണ ചുമതലയുള്ള ക്രൈംബ്രാഞ്ച് ഡിവൈ.എസ്.പി ബിനോയ് സ്റ്റീഫന്റെ ഓഫീസില് വേണ്ടത്ര ഉദ്യോഗസ്ഥരില്ലാത്തതിനാല് കാര്യമായ അന്വേഷണം നടക്കാത്ത സ്ഥിതിയാണുണ്ടായിരുന്നത്.
അന്വേഷണത്തിനായി കൂടുതല് ഉദ്യോഗസ്ഥരെ അനുവദിക്കണമെന്ന ആവശ്യം ഇപ്പോഴും പരിഗണിക്കപ്പെട്ടിട്ടില്ല. കേരളത്തില് എറണാകുളം, മലപ്പുറം, കോഴിക്കോട് ജില്ലകളിലുള്ളവരാണ് തട്ടിപ്പിന് ഇരയായത്. ക്രൈംബ്രാഞ്ച് സംഘത്തിന് ഫലപ്രദമായി മുന്നോട്ട് പോകാനാവാത്തത് കേസിനെ ദുര്ബലപ്പെടുത്തുമെന്ന് ചൂണ്ടികാണിക്കപ്പെടുന്നു. എന്ഫോഴ്സ്മെന്റ് സ്വത്ത് കണ്ടുകെട്ടിയ ഈ കേസില് ഒരിക്കലും നിയമപരമായി കേസിനുപോകാത്തവര്ക്കൊന്നും പണം തിരിച്ചുകിട്ടില്ലെന്നാണ് വ്യക്തമാക്കപ്പെടുന്നത്.
സ്ഥാപനം മലബാറിലെ വിവിധ ജില്ലകളിലുള്ള മുന്നൂറോളം പേരില് നിന്നായി 25 കോടിയോളം രൂപയാണ് തട്ടിയത്. 80 ലക്ഷം നഷ്ടപ്പെട്ട തലശ്ശേരി സ്വദേശി നൗഷാദ് ഉള്പ്പെടെ 75 പേരാണ് ഇതിനകം പൊലീസില് പരാതി നല്കിയത്. ലാഭവിഹിതം മുടങ്ങിയതോടെ ഹീര ഗ്രൂപ്പിന്റെ വിവിധയിടങ്ങളിലെ ആസ്തികള് വിറ്റ് നിക്ഷേപകര്ക്ക് പണം നല്കണമെന്ന് നേരത്തെ ഇരകള് ആവശ്യപ്പെട്ടിരുന്നു. ആസ്തികള് കണ്ടുകെട്ടിയതോടെ തങ്ങളുടെ നഷ്ടപ്പെട്ട തുക ഭാവിയില് തിരിച്ചുലഭിക്കുമെന്നാണ് പ്രതീക്ഷയാണുള്ളത്. അതേസമയം കണ്ടുകെട്ടിയ ആസ്തികള് എപ്പോള് വില്പന നടത്തുമെന്നും തുക ഇരകള്ക്ക് എപ്പോള് നല്കും എന്നെല്ലാം തീരുമാനിക്കുന്നത് കോടതി വഴിയായിരിക്കും.
എല്ലാ നിക്ഷേപകര്ക്കും പണം മടക്കിനല്കണമെങ്കില് കൂടുതല് ആസ്തികള് വില്ക്കേണ്ടതായും വരും. തെലങ്കാന, കേരളം, മഹാരാഷ്ട്ര, ആന്ധ്രപ്രദേശ് സംസ്ഥാനങ്ങളിലെ 277.29 കോടിയുടെ 99 സ്വത്തുക്കളാണ് എന്ഫോഴ്സ്മെന്റ് ഡയറക്ടറേറ്റ് കണ്ടുകെട്ടിയത്. കൃഷിഭൂമി, വാണിജ്യകേന്ദ്രങ്ങള്, കെട്ടിടങ്ങള്, കോംപ്ലക്സുകള് എന്നിവയും 22.69 കോടിയുടെ ബാങ്ക് അക്കൗണ്ടും ഇതില് ഉള്പ്പെടും. ജൂണ് ഒന്നിനാണ് ഹീര ഗ്രൂപ്പിന്റെ ആസ്തികള് കണ്ടുകെട്ടി വില്ക്കാന് തെലങ്കാന സര്ക്കാര് തീരുമാനിച്ചത്. ഹീരയുടെ കൊച്ചിയിലെ ആഡംബര ഹോട്ടലും കണ്ടുകെട്ടിയെന്നാണ് വിവരം.
കോഴിക്കോട്ട് ഫ്രാന്സിസ് റോഡില് ഓഫിസ് തുറന്നാണ് പലിശക്ക് പകരം ലാഭവിഹിതം വാഗ്ദാനം ചെയ്ത് മലയാളികളില് നിന്ന് നിക്ഷേപം സമാഹരിച്ചത്. എറണാകുളം സ്വദേശി മോളി തോമസും ഭര്ത്താവ് ബിജുതോമസുമാണ് പണം സമാഹരിക്കുന്നതിന് ഇടനിലക്കാരായി പ്രവര്ത്തിച്ചിരുന്നത്. രാജ്യത്തിന്റെ വിവിധ ഭാഗങ്ങളിലായി ഹീര ഗ്രൂപ്പ് 1,72,000 നിക്ഷേപകരില് നിന്ന് 5600 കോടിയാണ് സമാഹരിച്ചത്. കമ്പനിയുടെ പ്രമോട്ടറായ നൗഹിറ ശൈഖിന്റെ പേരിലായിരുന്നു സമ്പാദ്യം കൂടുതലും. ജ്വല്ലറി, ഭക്ഷ്യസംസ്കരണം, ടെക്സ്റ്റൈല്സ് എന്നീ മേഖലകളില് ഹീര പണം നിക്ഷേപിച്ചിരുന്നു. ഇതെല്ലാമാണ് ഇരകളെ ആകര്ഷിച്ചത്.
https://www.facebook.com/Malayalivartha