പറയേണ്ടത് പറയേണ്ട സമയത്ത് പറയണം എന്നതാണ് ധനമന്ത്രി കെ.എം.മാണിയുടെ അനുഭവം കേരളത്തെ പഠിപ്പിക്കുന്നത്. 85 ദിവസം കേരളം ആഘോഷിച്ച ഒരു കെട്ടുകഥ മുക്കാല്‍ മണിക്കൂര്‍ അടക്കം നീണ്ട ഒരു വാര്‍ത്താ സമ്മേളനത്തിലൂടെ പൊട്ടിക്കുകയായിരുന്നു ധനമന്ത്രി. എന്നിട്ടും അദ്ദേഹം പറയേണ്ടത് പലതും പറയാതെ വിട്ടു.
ഉമ്മന്‍ചാണ്ടി കേരളത്തെ ഭരിക്കുന്നിടത്തോളം കാലം ഇരുപത് മന്ത്രിമാര്‍ എന്നാല്‍ ഒരാള്‍ മാത്രമാണ്. അത് കേരളത്തിന്റെ മുഖ്യമന്ത്രി ഉമ്മന്‍ചാണ്ടി തന്നെ. പണ്ടേയ്ക്കു പണ്ടേ ഉമ്മന്‍ചാണ്ടിയുടെ ഭരണസ്വഭാവം കേരളത്തെ ഇതാണ് പഠിപ്പിക്കുന്നത്. സകല വകുപ്പുകളിലും കയറി അമ്മാനമാടുന്നതാണ് അദ്ദേഹത്തിന്റെ ശീലം. കെ.എം മാണിയല്ല വൈകുണ്ഠം പരമേശ്വരനായാലും അദ്ദേഹം അവരുടെയൊക്കെ മുകളില്‍ കയറി ഇരുന്നു ഭരിക്കും.
നിയമവകുപ്പിന്റെ അഭിപ്രായം ലഭിക്കാത്തതിനാല്‍ ഫയല്‍ മാണി കൈയില്‍ വച്ചതു കാരണമാണ് ബാറുകള്‍ പൂട്ടേണ്ടി വന്നതാണെന്നാണ് ബാറുകാരുടെ ആരോപണം. എന്നാല്‍ മാണിയല്ല കര്‍ത്താവു തമ്പുരാന്‍ എന്തു തന്നെ തീരുമാനിച്ചാലും ഉമ്മന്‍ചാണ്ടിക്ക് ഒന്നുമില്ല. സംസ്ഥാന ഭരണത്തിന്റെ എ.ബി.സി.ഡി അറിയാത്തവയാണ് ഇത്തരം അഭിപ്രായങ്ങള്‍ പറയുന്നത്. ഏതു വകുപ്പിലെ ഫയല്‍ വേണമെങ്കിലും മുഖ്യമന്ത്രിക്കും മന്ത്രിസഭായോഗത്തിനും തിരുത്താം. ഓവര്‍ റൂള്‍ എന്നാണ് ഈ സംവിധാനത്തിന്റെ പേര്. മന്ത്രിമാരും ഉദ്യോഗസ്ഥരും ഫയലുകളില്‍ പലതും എഴുതും. ഇത് സര്‍ക്കാരിന്റെ ഇച്ഛക്കനുസരണമല്ലെങ്കില്‍ മുഖ്യമന്ത്രി ഓവര്‍റൂള്‍ ചെയ്യും.
അതായത് നിയമമന്ത്രി എന്ന നിലയില്‍ കെ എം മാണി എന്തു തീരുമാനം എടുത്താലും അത് ഓവര്‍റൂള്‍ ചെയ്യാനുള്ള അധികാരം മന്ത്രി സഭായോഗത്തിനും മുഖ്യമന്ത്രിക്കുമുണ്ട്. അപ്പോള്‍ താന്‍ തീരുമാനമെടുക്കില്ല എന്ന പേരില്‍ ഫയല്‍ തടഞ്ഞു എന്ന ആരോപത്തിന് എന്ത് അര്‍ത്ഥമാണ് ഉള്ളത്. മാത്രവുമല്ല ഒന്നേമുക്കാല്‍ മണിക്കൂര്‍ മാത്രമാണ് മന്ത്രി മാണിയുടെ ഓഫീസില്‍ ബാറിന്റെ ഫയല്‍ ഉണ്ടായിരുന്നത്.
ബാറുകള്‍ തുറക്കാനുള്ള സര്‍ക്കാരിന്റെ അടവായിരുന്നു ബാര്‍ക്കോഴ ആരോപണം. ബാര്‍ക്കോഴക്കേസില്‍ മാണി മന്ത്രിയെ കുരുക്കിയതുകൊണ്ട് രണ്ടുണ്ടായി ഗുണം. ഒന്ന് മന്ത്രി മാണിയുടെ വായടപ്പിച്ചു. രണ്ട് മാണിക്ക് വേണ്ടി ബാറുകള്‍ തുറന്നതായി വരുത്തിച്ചു. എല്ലാം നമ്മുടെ കുഞ്ഞൂഞ്ഞിന്റെ ബുദ്ധിയല്ലേ. ആ ബുദ്ധിക്ക് ഒരു ഭാരതരത്‌നം മിനിമം കൊടുക്കണം.
ഏതായാലും മാണി മന്ത്രിക്ക് വൈകി വന്ന തീരുമാനം സകലമാന കേരളീയരെയും ഒരു പാഠം പഠിപ്പിച്ചു. പറയേണ്ട കാര്യങ്ങള്‍ പറയേണ്ട സമയത്ത് പറഞ്ഞില്ലെങ്കില്‍ കെ എം മാണിയുടെ ഗതി വരും. അദ്ദേഹത്തിന്റെ അനുഭവം രാഷ്ട്രീയക്കാര്‍ മനസിലാക്കിയാല്‍ അത് അവരവര്‍ക്ക് ഗുണം ചെയ്യും. ഇനിയെങ്കിലും കെ എം മാണി ഇതെല്ലാം കണ്ടു പഠിക്കട്ടെ. രാഷ്ട്രീയക്കാര്‍ക്ക് ഭരണ പരിചയം മാത്രം പോരാ. തന്ത്രജ്ഞത കൂടി വേണം. ഒരു സാഹചര്യത്തെ എങ്ങനെ നേരിടണമെന്ന തന്ത്രം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha