ഇവരെ ആര് സഹായിക്കാന്? തുഷാര് വെള്ളാപ്പള്ളിയെ കേരളത്തിലെത്തിക്കാന് രാഷ്ട്രീയ വൈരം മറന്ന് പാര്ട്ടികളും മുതലാളികളും ഒന്നാകുമ്പോള് കാണാതെ പോകരുത് ഈ കുടുംബത്തിന്റെ അവസ്ഥ
തുഷാര് വെള്ളാപ്പള്ളിയെ നല്ലപിള്ളയാക്കാന് ശ്രമിച്ചവര്ക്ക് കനത്ത തിരിച്ചടിയുമായി നാസില് അബ്ദുല്ലയുടെ കുടുംബത്തിന്റെ ദയനീയാവസ്ഥ. പഠിക്കാന് മിടുക്കനായ മകന് ഗള്ഫില് ഒരു കമ്പനി തട്ടിക്കൂട്ടിയപ്പോള് ഏറെ സന്തോഷിച്ചു. എന്നാല് തുഷാര് വെള്ളാപ്പള്ളി നല്കാനുള്ള പണം നല്കാതെ വന്നതോടെ നാസില് കൊടുത്ത ചെക്കിന്റെ പേരില് ജയിലിലുമായി. മകനെ രക്ഷപ്പെടുത്താന് മുട്ടാത്ത വാതിലില്ല. പക്ഷെ യൂസഫലി ഉള്പ്പെടെ ആരും ഒരു സഹായവും ചെയ്തില്ല. തുഷാര് ജയിലിലായതോടെയാണ് സകലരും കോപ്രമൈസുമായി എത്തുന്നത്. അവരാരും തന്നെ ഈ പാവം കുടുംബത്തിന്റെ ദയനീയ അവസ്ഥ അറിയുന്നില്ല.
തുഷാര് വെള്ളാപ്പള്ളിക്കെതിരായ ചെക്ക് കേസിലെ പരാതിക്കാരന് മതിലകം പുതിയകാവ് നമ്പി പുന്നിലത്ത് നാസിലിന്റെ ജീവിതം തകര്ത്തത് തുഷാറുമായുള്ള ബിസിനസെന്നാണ് നാസിലിന്റെ മാതാപിതാക്കള് പറയുന്നത്.
10 വര്ഷം മുന്പ് തുഷാറിന്റെ ബോയിങ്ങ് കോണ്ട്രാക്ടിങ് കമ്പനിയുടെ ഉപകരാര് നാസിലിന്റെ കമ്പനിയായ ഹാര്മണിയസ് ഏറ്റെടുത്തതോടെയാണ് നാസിലിന്റെ ജീവിതത്തില് പ്രശ്നങ്ങള് ആരംഭിച്ചതെന്ന് മാതാപിതാക്കളായ അബ്ദുള്ളയും റാബിയയും പറഞ്ഞു.
സാധനങ്ങള് വാങ്ങാനും തൊഴിലാളികള്ക്ക് കൊടുക്കാനും സ്വന്തം ചെക്കുകളായിരുന്നു നാസില് ഉപയോഗിച്ചിരുന്നത്. തുഷാറിന്റെ കമ്പനി പണം നല്കാതായതോടെ ചെക്കുകള് മടങ്ങി വന് സാമ്പത്തിക ബാധ്യതയായി. തുടര്ന്ന് ആറു മാസത്തോളം വിദേശത്തു ജയിലില് കഴിയേണ്ടി വന്നു. കുടുംബാംഗങ്ങള് ഗള്ഫിലെത്തി മോചിപ്പിക്കാന് നോക്കിയെങ്കിലും വിഫലമായി. തൊഴിലാളികള് പണത്തിനായി വീട്ടില് വരാന് തുടങ്ങി. ഭൂമി വിറ്റും ബന്ധുക്കളില്നിന്നു വായ്പ വാങ്ങിയുമാണ് പ്രശ്നങ്ങള് ഒരുപരിധി വരെ പരിഹരിച്ചത്. ഇനിയും ബാധ്യത തീര്ന്നിട്ടില്ല.
വീടിരിക്കുന്ന സ്ഥലമൊഴികെ ബാക്കിയെല്ലാം വിറ്റു. നാസില് ജയിലിലായതോടെ കടുത്ത മാനസിക സമ്മര്ദത്തിലായ പിതാവ് പക്ഷാഘാതം വന്ന് ഒരു വശം തളര്ന്നു കിടപ്പിലാണ്. തങ്ങളുടെ ജീവിതത്തിന്റെ താളം തെറ്റിയത് മകനെ ചതിച്ചതു കൊണ്ടാണെന്നും മൂന്നര വര്ഷത്തിനിടെ ഏഴു ദിവസംമാത്രമാണ് നാസിലിന് നാട്ടില് നില്ക്കാന് സാധിച്ചതെന്നും ഇരുവരും പറഞ്ഞു.
അതേസമയം ചെക്ക് കേസില് പരാതിക്കാരന് നാസില് അബ്ദുല്ലയുമായി തുഷാര് വെള്ളാപ്പള്ളി ഒത്തുതീര്പ്പ് ചര്ച്ച നടത്തി. ദുബൈയിലെ ഒരു ഹോട്ടലില് വച്ചാണ് ചര്ച്ച നടന്നത്. പ്രശ്നം രമ്യമായി പരിഹരിക്കുമെന്ന് ചര്ച്ചക്ക് ശേഷം പരാതിക്കാരന് നാസില് അബ്ദുല്ല മാധ്യമങ്ങളോട് പറഞ്ഞു. കോടതിക്ക് പുറത്ത്വച്ച് തന്നെ കേസ് പരിഹരിക്കാനുള്ള ശ്രമമാണ് നടക്കുന്നത്.
ലഭിക്കാനുള്ള മുഴുവന് തുകയും ലഭിക്കാതെ കേസ് പിന്വലിക്കില്ലെന്ന് നാസില് നേരത്തേ പറഞ്ഞിരുന്നു. ഏതുവിധത്തിലുള്ള ചര്ച്ചക്കും തയാറാണെന്നും ചെക്കിലെ ഒപ്പ് വ്യാജമാണെങ്കില് തുഷാറിന് കോടതിയില് തെളിയിക്കാമെന്നും നാസില് പറഞ്ഞു. തുഷാര് പണം നല്കാനുള്ള ധാരാളം പേര് ഗള്ഫിലുണ്ട്. ഭയം കാരണം പലരും പരാതിപ്പെടാതിരിക്കുകയാണ്.
തുഷാര് കാരണം തനിക്ക് ആറ് മാസം ജയില്വാസം അനുഭവിക്കേണ്ടി വന്നിട്ടുണ്ട്. ബി.ജെ.പി സംസ്ഥാന അധ്യക്ഷന്റ ശ്രീധരന് പിള്ളക്ക് ഇതുസംബന്ധിച്ച് പരാതി നല്കിയിരുന്നു. എന്നാല് ഘടകക്ഷി നേതാവായതിനാല് ഇടപെടാനാകില്ലെന്ന് പറഞ്ഞ് ഒഴിവാകുകയാണ് ചെയ്തത്. ഇതുവരേ ഭീഷണികളൊന്നും നേരിട്ടില്ലെങ്കിലും തന്റെ സുരക്ഷ സംബന്ധിച്ച് ആശങ്കകളുണ്ടെന്നും അദ്ദേഹം നേരത്തേ സൂചിപ്പിച്ചിരുന്നു.
https://www.facebook.com/Malayalivartha