വയനാട് മെഡിക്കല് കോളേജിന് സൗജന്യ സ്ഥലമുള്ളപ്പോള് വില കൊടുത്ത് ഭൂമി വാങ്ങുന്നതെന്തിന്? ചെന്നിത്തല
വയനാട് ഗവണ്മെന്റ് മെഡിക്കല് കോളേജിനായി യു.ഡി.എഫ് സര്ക്കാരിന്റെ കാലത്ത് സൗജന്യമായി ലഭിച്ച കല്പറ്റ വില്ലേജിലെ 50 ഏക്കര് ഉള്ളപ്പോള് വലിയ വില കൊടുത്ത് വേറെ ഭൂമി വാങ്ങുന്നതെന്തിനാണെന്ന് സര്ക്കാര് വ്യക്തമാക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. 2015 ലാണ് മെഡിക്കല് കോളേജിനായി ഈ ഭൂമി സര്ക്കാരിന് സൗജന്യമായി ലഭിച്ചത്. കഴിഞ്ഞ സര്ക്കാരിന്റെ കാലത്ത് മുഖ്യമന്ത്രി അവിടെ തറക്കല്ലിടുകയും ചെയ്തിരുന്നു. എന്നാല് അതിന്റെ തുടര് നടപടികള്ക്ക് തയ്യാറാവാതെ ഇടതു സര്ക്കാര് ചേലോട്ടെ എസ്റ്റേറ്റ് വില കൊടുത്തു വാങ്ങാനാണ് ശ്രമം നടത്തുന്നത്. സംസ്ഥാനം ഇത്രയും സാമ്പത്തിക പ്രതിസന്ധിയിലുഴലുമ്പോള് ഇത്ര വന്ഭാരം കൂടി തലയിലേറ്റുന്നത് എന്തിനാണെന്ന് മുഖ്യമന്ത്രി വ്യക്തമാക്കണമെന്നും രമേശ് ചെന്നിത്തല പറഞ്ഞു.
യു.ഡി.എഫ് ഏറ്റെടുത്ത 50 ഏക്കര് സ്ഥലം ഒഴിലാക്കി പുതിയ ഭൂമി വില കൊടുത്തുവാങ്ങി മെഡിക്കല് കോളജ് ആരംഭിക്കാനാണ് പിണറായി സര്ക്കാര് നീക്കം. ലഭിക്കുന്ന വിവരമനുസരിച്ച് അപേക്ഷ ക്ഷണിച്ചതനുസരിച്ച് മെഡിക്കല് കോളജിനായി ഭൂമി നല്കാന് തയ്യാറാണെന്ന് കാണിച്ച് നാല് അപേക്ഷകളാണ് ലഭിച്ചിട്ടുള്ളത്. പരിസ്ഥിതി അനുകൂലമായ അഞ്ച് നില കെട്ടിട സമുച്ചയമാണ് യു.ഡി.എഫ് ഭരണകാലത്ത് നിര്മ്മിക്കുന്നതിനാണ് തീരുമാനിച്ചത്. ജില്ലയില് ബഹുനിലകെട്ടിടങ്ങള്ക്ക് ഏര്പ്പെടുത്തിയ നിയന്ത്രണങ്ങള് പാലിക്കാതെയും, പാരിസ്ഥിക പ്രത്യാഘാതങ്ങള് പഠിക്കാതെയും പുതിയ ഡി.പി.ആര് തയ്യാറാക്കിയതിന്റെ പരിണിത ഫലമാണ് വയനാട് മെഡിക്കല് കോളേജ് തുടങ്ങുന്നത് വിഘാതമായത്. ഇപ്പോള് പുതുതായി നിര്ദ്ദേശിക്കപ്പെടുന്ന സ്ഥലങ്ങള് മുഴുവന് കഴിഞ്ഞ പ്രളയ കാലത്ത് ദുരന്തങ്ങള് ഏറ്റുവാങ്ങിയവയാണെന്ന് കോണ്ഗ്രസ് നേതാക്കള് ആരോപിക്കുന്നു.
https://www.facebook.com/Malayalivartha