ഇന്നെന്തെങ്കിലുമൊക്കെ നടക്കും എന്ന് പ്രതീക്ഷിച്ചവര്‍ക്ക് നിരാശ മാത്രം ബാക്കി. ആരേയും തള്ളിപ്പറയാതെ യുഡിഎഫ് യോഗം അവസാനിപ്പിച്ചു. പിള്ളയെ നോവിക്കാത്തത് കൊണ്ട് പിള്ള പുറത്തുവിടുമെന്ന് കരുതിയ വീഡിയോയും ഉടന്‍ വെളിച്ചം കാണില്ല.
ധനമന്ത്രി കെഎം മാണിക്കെതിരെ ബിജു രമേശുമായി കേരളാ കോണ്‍ഗ്രസ് ബി ചെയര്‍മാന്‍ ബാലകൃഷ്ണ പിള്ള സംസാരിച്ചതിനോട് യോജിക്കാന്‍ കഴിയില്ലെന്ന് യുഡിഎഫ് യോഗം വിലയിരുത്തി. മുന്നണി മര്യാദയ്ക്ക് വിരുദ്ധമാണ് പിള്ളയുടെ നടപടി. ഇതിലുള്ള അതൃപ്തി യോഗം രേഖപ്പെടുത്തി. മാണിയുമായി ബന്ധപ്പെട്ട് പിസി ജോര്‍ജ്ജ് നടത്തിയ പരാമര്‍ശവും നിര്‍ഭാഗ്യകരമാണ്. അത് ഒഴിവാക്കേണ്ടതായിരുന്നു. 
യുഡിഎഫ് വികാരം ഉള്‍ക്കൊണ്ടാല്‍ ബാലകൃഷ്ണ പിള്ളയ്‌ക്കെതിരെ നടപടി വേണ്ടെന്ന് പൊതുവേ തീരുമാനിച്ചു. മുന്നണിയോഗത്തില്‍ പിസി ജോര്‍ജ്ജും പങ്കെടുത്തിരുന്നു. മാണിക്കെതിരെ താന്‍ ആരോടും ഒന്നും പറഞ്ഞിട്ടില്ലെന്ന് യോഗത്തില്‍ ജോര്‍ജ്ജ് വിശദീകരിച്ചു. ബാര്‍ കോഴ ആരോപണത്തില്‍ മാണിക്ക് പിന്നില്‍ ഉറച്ചു നില്‍ക്കുമെന്നും വ്യക്തമാക്കി. ഈ സാഹചര്യത്തില്‍ ജോര്‍ജ്ജിന്റെ ഉദ്ദേശ ശുദ്ധിയില്‍ സംശയിക്കേണ്ടതില്ലെന്ന നിഗമനത്തിലാണ് യുഡിഎഫ് എത്തിയത്. ബിജു രമേശിനെ വിളിക്കാനിടയായ സാഹചര്യവും ജോര്‍ജ്ജ് മുന്നണിയില്‍ വ്യക്തമാക്കി. 
ആരോപണങ്ങളെ മുന്നണി ഒറ്റക്കെട്ടായി നേരിടും. ബാലകൃഷ്ണപിള്ളയുടെ അടുത്ത പ്രതികരണത്തിന് ശേഷം കടുത്ത നടപടികള്‍ വേണമെങ്കില്‍ എടുക്കാനാണ് തീരുമാനം.
ധനമന്ത്രി കെ.എം. മാണിതന്നെ ബജറ്റ് അവതരിപ്പിക്കും. നിയമപ്രകാരമുള്ള അവകാശം അദ്ദേഹത്തിനുണ്ട്. അതിനുള്ള സംരക്ഷണം നിയമസഭാ സ്പീക്കറില്‍നിന്നു പൂര്‍ണമായി ലഭിക്കും. ബജറ്റ് അവതരിപ്പിക്കാന്‍ അനുവദിക്കില്ലെന്ന ഭീഷണിക്കു മുന്നില്‍ സര്‍ക്കാര്‍ വഴങ്ങില്ലെന്നും അദ്ദേഹം പറഞ്ഞു. നേതാക്കന്മാര്‍ തമ്മിലുള്ള പരസ്യ പ്രസ്താവനകള്‍ ഒഴിവാക്കണമെന്നും, ഇല്ലെങ്കില്‍ വിട്ടുവീഴ്ചയില്ലാത്ത സമീപനമായിരിക്കും ഭാവിയിലുണ്ടാവുകയെന്നും മുന്നണി കണ്‍വീനര്‍ തങ്കച്ചന്‍ പറഞ്ഞു. എന്തെങ്കിലും കാര്യമുണ്ടെങ്കില്‍ യുഡിഎഫില്‍ പറയണം. അല്ലെങ്കില്‍ മുഖ്യമന്ത്രിയോടു പറയണം. അല്ലാതെ പത്രത്തില്‍ ചെന്നു പറയുകയല്ല വേണ്ടതെന്നും അദ്ദേഹം പറഞ്ഞു.
ബാലകൃഷ്ണപിള്ളയുടെ സംഭാഷണത്തിലെ പല കാര്യങ്ങളോടും യുഡിഎഫിനു യോജിക്കാന്‍ കഴിയില്ല. മുന്നണി മര്യാദയ്ക്കു ചേര്‍ന്ന കാര്യമല്ല പിള്ളയുടെ വാചകങ്ങളില്‍ കേള്‍ക്കാന്‍ കഴിഞ്ഞത്. സംഭാഷണം പിള്ള നിഷേധിച്ചിട്ടുമില്ല. പിള്ളയെപ്പോലുള്ള ഒരു ഘടകകക്ഷി നേതാവ് മുന്നണിയിലുള്ള മറ്റൊരു നേതാവിനെതിരെ ബിജു രമേശിനോട് ഇങ്ങനെ സംസാരിക്കാന്‍ പാടില്ലായിരുന്നു. പിള്ളയുടെ സംഭാഷണങ്ങള്‍ ഒഴിവാക്കേണ്ടതായിരുന്നു. യുഡിഎഫ് ഇക്കാര്യത്തില്‍ പൊതുവേ അസംതൃപ്തി രേഖപ്പെടുത്തി. മുന്നണി യോഗത്തിന് ശേഷം കണ്‍വീനര്‍ പിപി തങ്കച്ചന്‍ വിശദീകരിച്ചു. മാണിക്കെതിരായ ആരോപണങ്ങളെ രാഷ്ട്രീയമായി നേരിടാനാണ് തീരുമാനം.
പി.സി. ജോര്‍ജ് കെ.എം. മാണിയെ പരാമര്‍ശിച്ചു നടത്തിയ പ്രസ്താവനകള്‍ നിര്‍ഭാഗ്യകരമാണ്. അത് ഒഴിവാക്കേണ്ടതായിരുന്നു എന്നും യോഗം വിലയിരുത്തി. ഇതു മാര്‍ക്‌സിസ്റ്റ് പാര്‍ട്ടി ഏറ്റുപിടിച്ചിരിക്കുകയാണ്. തുടര്‍ന്നു ബിജെപിയും. അതു രാഷ്ട്രീയമാണെന്നാണ് യുഡിഎഫ് യോഗത്തിന്റെ നിലപാട്. മുമ്പും മന്ത്രിമാര്‍ക്കെതിരെ ആരോപണങ്ങള്‍ ഉയര്‍ന്നിട്ടുണ്ട്. അന്നൊന്നും ആരും രാജിവച്ചിട്ടില്ല. ഇഎംഎസ് മന്ത്രിസഭയുടെ കാലത്തെ സംഭവങ്ങള്‍ നിരത്തി തങ്കച്ചന്‍ വിശദീകരിച്ചു. നരേന്ദ്ര മോഡിയുടെ നേതൃത്വത്തിലെ കേന്ദ്രമന്ത്രിസഭയിലും കുറ്റാരോപിതര്‍ ഉണ്ട്. മാണി ബജറ്റ് അവതരിപ്പിക്കില്ലെന്ന പ്രതിപക്ഷ വാദങ്ങളും അംഗീകരിക്കുന്നില്ല. ധനമന്ത്രി കെഎം മാണി തന്നെയാകും ബജറ്റ് അവതരിപ്പിക്കുക എന്നും തങ്കച്ചന്‍ വ്യക്തമാക്കി. ഇതിനുള്ള സംരക്ഷണം നിയമസഭാ സ്പീക്കര്‍ നല്‍കുമെന്നും തങ്കച്ചന്‍ വ്യക്തമാക്കി.
ബിജു രമേശ് ഉന്നയിച്ച ആരോപണങ്ങള്‍ക്കു ദിവസങ്ങളേറെയായിട്ടും വിശ്വസനീയമായ തെളിവു ഹാജരാക്കാന്‍ കഴിഞ്ഞിട്ടില്ല. അദ്ദേഹം പറയുന്ന കാര്യങ്ങള്‍ ഒന്നും പ്രാഥമിക തെളിവുകളുമല്ല. പണം കൊടുത്തുവെന്നു പറയുന്നവര്‍തന്നെ കാര്യങ്ങള്‍ നിഷേധിച്ചിട്ടുണ്ടല്ലോ? ബാര്‍ ഉടമകള്‍ക്ക് സര്‍ക്കാറിനോടു പ്രതിഷേധവും നീരസവുമുണ്ട്. ഇതു തീര്‍ക്കാന്‍വേണ്ടി സര്‍ക്കാറിനെ കരിവാരിത്തേക്കുകയാണ്. സര്‍ക്കാരിനോടും മന്ത്രമാരോടും വിരോധം തീര്‍ക്കാന്‍ വേണ്ടി ഓരോ ദിവസവും ഓരോ കാര്യങ്ങള്‍ വിളിച്ചു പറയുകയാണ്. ആരോപണം ഉന്നയിക്കുന്നവര്‍ക്കുതന്നെ തെളിവുകള്‍ കൊടുക്കാന്‍ കഴിയണം; തങ്കച്ചന്‍ വ്യക്തമാക്കി.
ബാര്‍ വിവാദത്തില്‍ ബിജു രമേശ് പറഞ്ഞ കാര്യങ്ങള്‍ മാര്‍ക്‌സിസ്റ്റ് പാര്‍ട്ടി ഏറ്റുപിടിച്ചിരിക്കുകയാണ്. തുടര്‍ന്നു ബിജെപിയും. അതു രാഷ്ട്രീയമാണ്. പാലായില്‍ ഹര്‍ത്താല്‍ നടത്തിയ മാര്‍ക്‌സിസ്റ്റ് പാര്‍ട്ടിയോടും സംസ്ഥാന ഹര്‍ത്താല്‍ നടത്തിയ ബിജെപിയോടും സഹതാപമാണ്. അഴിമതി ആരോപണമുള്ള എത്രയോ മന്ത്രിമാര്‍ ഇന്നു കേന്ദ്ര മന്ത്രിസഭയിലുണ്ട്. കഴിഞ്ഞ സര്‍ക്കാറിന്റെ കാലത്ത് സംസ്ഥാന മന്ത്രിസഭയിലെ മന്ത്രിമാര്‍ക്കെതിരെ ആരോപണമുണ്ടായിട്ടില്ലേ? ആരെങ്കിലും രാജിവച്ചോ? തങ്കച്ചന്‍ ചോദിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha