പാറഖനനം വാസയോഗ്യമല്ലാത്ത സ്ഥലങ്ങളില്‍ നടത്താനുള്ള നീക്കത്തിന് ഉപാധികള്‍വെച്ച് റവന്യൂ വകുപ്പ്. കളക്ടറുടെ വിവേചനാധികാരം അനുസരിച്ചുമാത്രമേ പുതിയതായി പാറഖനനം അനുവദിക്കാനാവൂവെന്ന നിലപാട് ആവര്‍ത്തിച്ച് റവന്യൂ വകുപ്പ്. നിര്‍മാണമേഖലയിലെ പ്രതിസന്ധി പരിഹരിക്കുന്നതിന്റെ ഭാഗമായി വാസയോഗ്യവും കൃഷിയോഗ്യവും അല്ലാത്ത ഭൂമിയില്‍നിന്ന് പാറഖനനത്തിന് അനുമതിവേണമെന്ന് വ്യവസായവകുപ്പ് ആവശ്യപ്പെട്ടിരുന്നു. ഇക്കാര്യത്തില്‍ ഉത്തരവിറക്കുന്നതിന് അവര്‍ മന്ത്രിസഭയുടെ അനുമതിയും തേടി.
പുതിയ ഖനനാനുമതി നല്‍കുന്നതിന് 1964ലെ ഭൂമിപതിവുചട്ടങ്ങളില്‍ ഭേദഗതി വരുത്തേണ്ടതുള്ളതിനാലാണ് ഇക്കാര്യം മന്ത്രിസഭ പരിഗണിച്ചത്. എന്നാല്‍, റവന്യൂ വകുപ്പിന്റെ എതിര്‍പ്പിനെത്തുടര്‍ന്ന് അന്ന് തീരുമാനം എടുക്കാനായില്ല. കൃഷി, റവന്യൂ, ജിയോളജി വകുപ്പുകളുടെ പരിശോധനകള്‍ക്കുശേഷമേ അനുമതി നല്‍കാനാവൂവെന്നായിരുന്നു റവന്യൂ വകുപ്പിന്റെ നിലപാട്.
വീണ്ടും ഇക്കാര്യം മന്ത്രിസഭയുടെ പരിഗണനയ്ക്കുവന്നപ്പോള്‍ ചര്‍ച്ചകള്‍ക്കുശേഷം അന്തിമതീരുമാനം മതിയെന്ന് തീരുമാനിച്ചു. പുതിയതായി ഖനനാനുമതി നല്‍കുമ്പോള്‍ പ്രദേശത്തെ കൃഷിഭൂമികളെ ബാധിക്കില്ലെന്നും ജലലഭ്യതയ്ക്ക് തടസ്സമാകുന്നില്ലെന്നും ജനവാസത്തെ ബാധിക്കില്ലെന്നും ഉറപ്പാക്കണം തുടങ്ങിയ ഉപാധികളാണ് റവന്യൂ വകുപ്പ് മുന്നോട്ടുവെച്ചത്. ഇതോടെ പുതിയ ഖനനാനുമതിക്ക് ജിയോളജിസ്റ്റ്, കൃഷി ഓഫീസര്‍, വില്ലേജ് ഓഫീസര്‍ എന്നിവരടങ്ങിയ സമിതി സ്ഥലം സന്ദര്‍ശിക്കുകയും ഈ വകുപ്പുകളുടെ എന്‍.ഒ.സി. ആവശ്യമായി വരുകയുംചെയ്യും. അനുമതി നല്‍കുന്നതില്‍ കളക്ടര്‍ക്ക് വിവേചനാധികാരം ഉപയോഗിക്കുകയും ചെയ്യാം. പ്രളയാനന്തരസാഹചര്യംകൂടി കണക്കിലെടുത്ത് വിട്ടുവീഴ്ചകള്‍ വേണ്ടെന്ന നിലപാടിലാണ് റവന്യൂ വകുപ്പ്.
മലപ്പുറം, വയനാട് ജില്ലകളിലെ ഉരുള്‍പൊട്ടലിനെത്തുടര്‍ന്ന് സംസ്ഥാനത്തെ മുഴുവന്‍ ക്വാറികളിലെയും ഖനനം 12 ദിവസം നിര്‍ത്തിവെച്ചെങ്കിലും വീണ്ടും അനുമതി നല്‍കിയിട്ടുണ്ട്.