ചീഫ്സെക്രട്ടറി ഇ.കെ. ഭരത്ഭൂഷണിനെതിരെ അന്വഷണത്തിന് ആദായനികുതി വകുപ്പ് ഉത്തരവ്
വരുമാനത്തില് കവിഞ്ഞ് സമ്പാദിച്ച കേസില് ചീഫ്സെക്രട്ടറി ഇ.കെ. ഭരത്ഭൂഷണിനെതിരെ അന്വഷണത്തിന് ആദായനികുതി വകുപ്പ് ഉത്തരവ്. യഥാര്ത്ഥ സ്വത്തുവിവരം കേന്ദ്രസര്ക്കാരില് നിന്ന് മറച്ചുവയ്ക്കുകയും ചെയ്തു എന്ന പരാതിയുടെ അടിസ്ഥാനത്തില് ചീഫ്സെക്രട്ടറി ഇ.കെ. ഭരത്ഭൂഷണിനെതിരേ അന്വഷണം നടത്താന് ആദായനികുതി വകുപ്പ് ഉത്തരവിട്ടു.
കേന്ദ്രനിര്ദ്ദേശപ്രകാരം സെന്ട്രല് ബോര്ഡ് ഒഫ് ഡയറക്ട് ടാക്സേഷന് കീഴിലുള്ള കൊച്ചിയിലെ ഇന്വെസ്റ്റിഗേഷന് ഡയറക്ടര് ജനറലാണ് അന്വേഷണ ഉത്തരവ് പുറത്തിറക്കിയത്. തിരുവനന്തപുരത്തെയും കൊച്ചിയിലെയും യൂണിറ്റുകള് സംയുക്തമായാണ് അന്വേഷിക്കുക.
കേന്ദ്ര വ്യോമയാന മന്ത്രാലയത്തില് അഡിഷണല് സെക്രട്ടറിയും ധനകാര്യ ഉപദേഷ്ടാവായും പ്രവര്ത്തിക്കുകയും ഡയറക്ടര്ജനറല് ഒഫ് സിവില് ഏവിയേഷന്റെ (ഡി.ജി.സി.എ) അധികചുമതല വഹിക്കുകയും ചെയ്തകാലത്തെ ഇടപാടുകളെക്കുറിച്ചാണ് പ്രധാനമായും ആദായനികുതിവകുപ്പ് അന്വേഷിക്കുന്നത്.
സ്വത്തുവിവരരേഖ അപൂര്ണവും അവ്യക്തവുമാണെന്നും നിര്ബന്ധമായും വെളിപ്പെടുത്തേണ്ട വിവരങ്ങള് മറച്ചുവച്ചതായും 2011നു ശേഷം വസ്തുക്കളില് നിന്നുള്ള വരുമാനം വെളിപ്പെടുത്തിയിട്ടില്ലെന്നും വകുപ്പിന് പരാതി ലഭിച്ചിരുന്നു. ചീഫ്സെക്രട്ടറി സമര്പ്പിച്ച രേഖകള് പ്രകാരം അദ്ദേഹത്തിന്റെ വാര്ഷികനീക്കിയിരുപ്പ് വരുമാനം എട്ട് ലക്ഷംരൂപയില് താഴെയാണ്. കേന്ദ്രത്തില് ഡി.ജി.സി.എ ആയിരിക്കുമ്പോള് ആദായനികുതി കിഴിവിന് ശേഷം 1.10 ലക്ഷം രൂപയോളമേ അദ്ദേഹത്തിന് ലഭിച്ചിരുന്നുള്ളൂ. ഈ കാലയളവില് വാങ്ങിക്കൂട്ടിയ സ്വത്തുക്കളെക്കുറിച്ചും മുപ്പതു മുതല് 50 ലക്ഷം രൂപവരെ ചെലവിട്ട ഹെലികോപ്റ്റര് യാത്രയെക്കുറിച്ചും അന്വേഷിക്കും.
ഭരത്ഭൂഷണിന്റെ അനധികൃത സ്വത്തിനെക്കുറിച്ച് കേന്ദ്രവിജിലന്സ് കമ്മിഷണറുടെ അന്വേഷണം ആവശ്യപ്പെട്ട് പ്രതിപക്ഷനേതാവ് വി.എസ്. അച്യുതാനന്ദന് നല്കിയ പരാതിയില് കേന്ദ്ര ഇന്റലിജന്സ് ബ്യൂറോ (ഐ.ബി) പ്രാഥമിക അന്വേഷണം നടത്തുകയാണ്.
ഉത്തര്പ്രദേശിലെ നോയിഡയിലും കൊച്ചി വെല്ലിംഗ്ടണിലും സ്വന്തം പേരിലും ഭാര്യ രഞ്ജനാഭൂഷന്റെ പേരിലുമായി ചീഫ്സെക്രട്ടറിക്ക് ഫ്ലാറ്റുകളുണ്ട്. കൊച്ചിയില് സലില്ഗുപ്ത എന്നയാളില് നിന്ന് ചീഫ്സെക്രട്ടറി വാങ്ങിയ ഫ്ളാറ്റില് ഒരുലക്ഷം രൂപ മാസവാടക നല്കി ഗുപ്തതന്നെ താമസിക്കുകയാണെന്നാണ് രേഖകളിലുള്ളത്. ഫ്ലാറ്റിന് മൂന്നുകോടി വിലയുണ്ടെന്നാണ് ആദായനികുതി വകുപ്പിന്റെ നിഗമനം. കോഴിക്കോട്ടെ കുടുംബസ്വത്ത് വിറ്റുകിട്ടിയ 35.70 ലക്ഷം രൂപ ഭരത്ഭൂഷണ് നോയിഡയിലെ ത്സാര്സ്യൂട്ട്സിന്റെ പണിതീരാത്ത ഫ്ലാറ്റിന് മുടക്കിയെന്ന് സത്യവാങ്മൂലത്തിലുണ്ടെങ്കിലും ത്സാര്സ്യൂട്ട്സിന് നോയിഡയില് ഭരത്ഭൂഷണ് നല്കിയ വിലാസത്തില് ഫ്ലാറ്റില്ലെന്നാണ് ഉത്തര്പ്രദേശ് രഹസ്യാന്വേഷണ വിഭാഗത്തിന്റെ റിപ്പോര്ട്ട്. തൊട്ടടുത്ത വര്ഷം കേന്ദ്രത്തിനു നല്കിയ സത്യവാങ്മൂലത്തില് ഈ ഫ്ലാറ്റ് സമുച്ചയവും കൊച്ചിയിലെ ഭാര്യയുടെ ഫ്ലാറ്റും നീക്കംചെയ്തിട്ടുമുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
