ജലവിതരണ കണക്ഷന്‍ നല്‍കുന്ന കാര്യത്തില്‍ ഫളാറ്റുകളും വീടുകളും ബംഗ്ലാവുകളും തമ്മില്‍ വിവേചനം പാടില്ലെന്നു ഹൈക്കോടതി. സ്ഥലമില്ലാതായതോടെ എങ്ങും ബഹുനില മന്ദിരങ്ങള്‍ ഉയരുന്ന കാലമാണിത്. കുടിക്കാന്‍ വേണ്ടത്ര ശുദ്ധജലം കിട്ടുകയെന്നതു ജീവിക്കാനുള്ള അവകാശത്തിന്റെ ഭാഗമാണെന്നു കോടതി വ്യക്തമാക്കി. നഗരവല്‍ക്കരണത്തിന്റെ ഭാഗമായി ഫളാറ്റുകള്‍ കൂണുപോലെ മുളച്ചുപൊങ്ങുമ്പോള്‍ വെള്ളം നിഷേധിക്കാനാവില്ല. ഗാര്‍ഹിക ജലവിതരണ കണക്ഷനു ഗാര്‍ഹികേതര കണക്ഷനെക്കാള്‍ മുന്‍ഗണനയുണ്ടെന്നും കോടതി വിലയിരുത്തി. അടിയന്തരഘട്ടത്തില്‍ വെള്ളമില്ലാതെ വന്നാല്‍ ഗാര്‍ഹികാവശ്യങ്ങള്‍ നിറവേറ്റാന്‍ ഗാര്‍ഹികേതര കണക്ഷന്‍ വിച്‌ഛേദിക്കാന്‍ പോലും സാധ്യമാണെന്നു ജസ്റ്റിസ് വി. ചിദംബരേഷ് വ്യക്തമാക്കി.
കോഴിക്കോട്ടെ അപാര്‍ട്‌മെന്റ് നിര്‍മാതാക്കള്‍ക്കു ജലവിതരണ കണക്ഷന് അപേക്ഷിക്കാനുള്ള ഫോം പോലും നല്‍കുന്നില്ലെന്ന് ആരോപിച്ചാണ് ഒരുകൂട്ടം ബില്‍ഡര്‍മാര്‍ കോടതിയിലെത്തിയത്. കേരള ജലവിതരണ, സൂവിജ് നിയമമാണു ഗാര്‍ഹിക, ഗാര്‍ഹികേതര ആവശ്യത്തിനുള്ള ജലവിതരണത്തിനു ബാധകമെന്നു കോടതി വ്യക്തമാക്കി. \'\'നിയമപ്രകാരം വെള്ളം നല്‍കാന്‍ ജല അതോറിറ്റിക്കു ബാധ്യതയുണ്ട്. ഒരു വളപ്പില്‍ സ്ഥിതിചെയ്യുന്ന വിവിധ നമ്പറുള്ള കെട്ടിടങ്ങളില്‍ വിവിധ ഹൗസ് കണക്ഷനുകള്‍ നല്‍കുന്നതിനെക്കുറിച്ചു ചട്ടത്തില്‍ പറയുന്നുണ്ട്. റസിഡന്‍ഷ്യല്‍ അപാര്‍ട്‌മെന്റ് സമുച്ചയത്തിലെ ഫളാറ്റുകള്‍ ഇതിനു സമാനമാണ്. കൂടുതല്‍ ഉപയോഗത്തിനു നിയന്ത്രണങ്ങള്‍ക്കു വിധേയമായി ഒരു സംഭരണ ടാങ്കിലേക്കു വെള്ളം നല്‍കുന്നതിനെക്കുറിച്ചും ചട്ടത്തില്‍ പറയുന്നു. ഈ രണ്ടു മാര്‍ഗങ്ങളില്‍ ഏതെങ്കിലും അപേക്ഷകര്‍ക്കു തിരഞ്ഞെടുക്കാന്‍ സാധ്യമാണ്.- കോടതി വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha