ദേശീയതലത്തില്‍ കോണ്‍ഗ്രസിന്റെ അവസ്ഥ വളരെ പരിതാപകരമാണ്, കൈയ്യടക്കിവച്ചിരുന്ന എല്ലാം ബിജെപി കൊണ്ടുപോയി പച്ചക്കുള്ള നേതാക്കള്‍ ഓരോരോ ആരോപണക്കയങ്ങളില്‍പെട്ട് ചക്രശ്വാസം വലിക്കുന്നു. അതുകൊണ്ടുതന്നെ സ്വന്തംകാര്യം നോക്കുന്ന തിരക്കിലാണ് അവര്‍. മൊത്തത്തില്‍ ഒരു അഴിച്ചുപണിയും ഒപ്പം അടിത്തട്ട് കെട്ടികെട്ടിപ്പടുക്കേണ്ടതിന്റെ ആവശ്യകതയുമുണ്ട്. ഈ ഒരു തിരിച്ചറിവിന്റെ അടിസ്ഥാനത്തില്‍ സംഘടനാ സംവിധാനം ആര്‍എസ്എസ് മോഡലില്‍ ഉടച്ചുവാര്‍ക്കാനൊരുങ്ങി കോണ്‍ഗ്രസ്. പ്രേരക്മാരെ നിയമിച്ച് പാര്‍ട്ടി പ്രവര്‍ത്തനം താഴെത്തട്ടില്‍ എത്തിക്കാനാണ് കോണ്‍ഗ്രസിന്റെ പുതിയ നീക്കം. സെപ്റ്റംബര്‍ മൂന്നിന് ചേര്‍ന്ന യോഗത്തിലാണ് പാര്‍ട്ടിയുടെ സംഘടനാ സംവിധാനത്തില്‍ മാറ്റങ്ങള്‍ വരുത്താനുള്ള തീരുമാനം ഉണ്ടായത്.

അസമില്‍ നിന്നുള്ള നേതാവ് ഗൗരവ് ഗോഗോയി മുന്നോട്ട് വച്ച നിര്‍ദ്ദേശത്തെ മറ്റുള്ളവര്‍ പിന്താങ്ങുകയായിരുന്നു. അഞ്ചുജില്ലകളടങ്ങിയ ഒരു ഡിവിഷന് മൂന്ന് പ്രേരക്മാര്‍ ഉണ്ടാകും. മുഴുവന്‍സമയ പ്രവര്‍ത്തകര്‍ ആയിരിക്കും പ്രേരക്മാര്‍. സെപ്റ്റംബര്‍ അവസാനത്തിനുള്ളില്‍ പ്രേരക്മാരെ നിര്‍ദേശിക്കാന്‍ പിസിസികള്‍ക്ക് നിര്‍ദേശം നല്‍കി. താഴെത്തട്ടില്‍ പാര്‍ട്ടിയെ പുനരുജീവിപ്പിക്കാന്‍ നീക്കം ഗുണം ചെയ്യുമെന്നാണ് വിലയിരുത്തല്‍.

അതുപോലെതന്നെ കോണ്‍ഗ്രസ് നേതൃത്വത്തെ പാര്‍ട്ടിക്കുള്ളില്‍ നിന്നുതന്നെ വിമര്‍ശിക്കുന്ന പ്രവണതയും കണ്ടുവരുന്നുണ്ട്. അവര്‍ നേരെ ചെന്ന് ചേക്കേറുന്നത് ബിജെപിയിലും. സമീപ കാലത്തായി കോണ്‍ഗ്രസ് കേന്ദ്ര നേതൃത്വത്തിനെതിരെ രൂക്ഷ വിമര്‍ശനമാണ് കേരളത്തിലെ എംപി ശശിതരുര്‍ ഉന്നയിക്കുന്നത് രാജ്യത്ത് മതനിരപേക്ഷത സംരക്ഷിക്കേണ്ടത് കോണ്‍ഗ്രസിന്റെ കടമയണ്. ഹിന്ദി ഹൃദയ ഭൂമിയില്‍ കോണ്‍ഗ്രസിന്റെ ശോചനീയാവസ്ഥക്കുള്ള ഉത്തരം ഭൂരിപക്ഷ പ്രീണനമോ മൃദുഹിന്ദുത്വം വാഗ്ദാനം ചെയ്യലോ അല്ല. അത്തരം നീക്കങ്ങള്‍ കോണ്‍ഗ്രസിനെ വട്ടപൂജ്യമാക്കുമെന്നും തരൂര്‍ പറയുകയുണ്ടായി ദി ഹിന്ദു വേ എന്ന തന്റെ പുതിയ പുസ്തകം പുറത്തിറക്കുന്നതിന് മുന്നോടിയായി വാര്‍ത്താ ഏജന്‍സിയായ പിടിഐക്ക് നല്‍കിയ അഭിമുഖത്തിലാണ് തരൂര്‍ ഇക്കാര്യങ്ങള്‍ പറഞ്ഞത്.

നിറപ്പകിട്ടോടെ രണ്ടാം മോദി സര്‍ക്കാര്‍ അധികാരമേറിയപ്പോള്‍ ദയനീയമായ ഒരു പ്രതിസന്ധിയില്‍ സ്വയം കുരുങ്ങിനില്‍ക്കുന്ന അവസ്ഥയിലാണ് കോണ്‍ഗ്രസ് പാര്‍ട്ടി. ഈ തിരഞ്ഞെടുപ്പിലും രാജ്യത്തെ രണ്ടാമത്തെ വലിയ പാര്‍ട്ടിയാണ് കോണ്‍ഗ്രസ്. പക്ഷേ ഒരു കണക്കിനും സാന്ത്വനപ്പെടുത്താനാകാത്ത ആഴങ്ങളിലേക്ക് കൂപ്പുകുത്തിയിരിക്കുന്നുവെന്ന് കോണ്‍ഗ്രസ് പാര്‍ട്ടിക്കറിയാം. പാര്‍ട്ടി പ്രസിഡന്റ് രാഹുല്‍ഗാന്ധിക്കറിയാം. പക്ഷേ ഉത്തരവാദിത്തത്തില്‍ നിന്ന് ഒളിച്ചോടുന്ന നേതാവിനോ തിരിച്ചടികളില്‍ നിരാശരാകുന്ന അണികള്‍ക്കോ കോണ്‍ഗ്രസിനെ രക്ഷപ്പെടുത്താനാകില്ല. കോണ്‍ഗ്രസിന്റെ തിരിച്ചുവരവിന് അടിമുടി മാറ്റവും സമഗ്രമായ സമീപനവും അനിവാര്യമാണ്. ഇതിന്റെ അടിസ്ഥാനത്തിലാണ് ആര്‍എസ്എസ് മോഡല്‍ അടിത്തട്ട് കെട്ടിപ്പടുത്താന്‍ കോണ്ഗ്രസ് നീക്കം നടത്തുന്നത്