ബാംഗ്ലൂരിൽ വച്ചുണ്ടായ വാഹനാപകടത്തിൽ ഹരിപ്പാട് സ്വദേശിയായ യുവാവിന് ദാരുണാന്ത്യം. കുമാരപുരം തയ്യിൽ പടീറ്റതിൽ മംഗളൻ സി (29) ആണ് മരിച്ചത്.

ബാംഗ്ലൂരിലെ ഹോസ്കേര ഹള്ളിയിൽ വെള്ളിയാഴ്ച രാത്രിയായിരുന്നു നാടിനെ കണ്ണീരിലാഴ്ത്തിയ അപകടം നടന്നത്. ഭക്ഷണം കഴിച്ചശേഷം സുഹൃത്തിനൊപ്പം ബൈക്കിൽ താമസസ്ഥലത്തേക്ക് മടങ്ങുമ്പോൾ വാഹനത്തിന്റെ നിയന്ത്രണം തെറ്റി മരത്തിൽ ഇടിക്കുകയായിരുന്നു.

അപകടത്തിൽ കൂടെയുണ്ടായിരുന്ന കുമാരപുരം കൊപ്പാറ കിഴക്കതിൽ വിഷ്ണുവിന് (29) പരിക്കേൽക്കുകയും ചെയ്തു. ഇദ്ദേഹം നിലവിൽ ചികിത്സയിൽ കഴിയുകയാണ്. താമല്ലാക്കൽ ഫ്രണ്ട്സ് വെജിറ്റബിൾ കടയിലെ ജീവനക്കാരനായിരുന്ന മംഗളൻ ഒരാഴ്ച മുൻപാണ് ബാംഗ്ലൂരിലേക്ക് പോയത്.

പുതിയൊരു ജീവിതം സ്വപ്നം കണ്ട് നാടുവിട്ട യുവാവിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് ബന്ധുക്കളും നാട്ടുകാരും. പോസ്റ്റുമോർട്ടത്തിനുശേഷം നാട്ടിലെത്തിക്കുന്ന മൃതദേഹം നാളെ സംസ്കരിക്കുന്നതാണ്. പരേതനായ ചന്ദ്രനാണ് പിതാവ്. മാതാവ്: അനിത. ഒരു സഹോദരിയുണ്ട്.

അതേസമയം മറ്റൊരു വാഹനാപകടത്തിൽ ബെംഗളൂരുവിൽ മലയാളി യുവാന് മരിച്ചു. കണ്ണൂർ കാപ്പാട് അരക്കിണർ ഗോവിന്ദാലയത്തിൽ മഹീഷിന്റെ മകൻ ഒ.എം. അഭിഷേക് (22) ആണ് മരിച്ചത്. കഴിഞ്ഞ ശനിയാഴ്ച രാവിലെ ഹൊസൂർ റോഡിലെ ഗസ്റ്റ്‌ലൈൻ ബസ്റ്റോപ്പിനു സമീപത്തായിരുന്നു അപകടം. റോഡ് മുറിച്ചുകടക്കുന്നതിനിടെ ലോറിയിടിക്കുകയായിരുന്നു. ഗുരുതര പരിക്കേറ്റ അഭിഷേകിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ബെംഗളൂരു അത്തിബെലെയിലെ സ്വകാര്യ കമ്പനിയിൽ ജീവനക്കാരനായിരുന്നു. രാവിലെ ജോലിസ്ഥലത്തേക്ക് പോകുമ്പോഴായിരുന്നു അപകടം നടന്നത്.