മട്ടാഞ്ചേരിയിലെ പ്രശസ്തമായ ജൂതപ്പള്ളി മഴയില്‍ തകര്‍ന്നു വീണു. ജൂതചരിത്രം വിളിച്ചോതുന്ന കേരളത്തിലെ ജൂതപ്പള്ളിയാണ് മഴയില്‍ തകര്‍ന്നു വീണത്. ഒരു രീതിയിലും അറ്റകുറ്റപണികള്‍ നടത്താതിരുന്ന പള്ളിയുടെ ഒരു ഭാഗം കനത്ത മഴയില്‍ തകർന്നു വീഴുകയായിരുന്നു. ചൊവ്വാഴ്ച ഉച്ചയോടെയാണ് സംഭവം. നൂറ്റാണ്ടുകള്‍ പഴക്കമുള്ള ഈ ജൂതപ്പള്ളി പ്രദേശത്തെ ജൂതന്മാര്‍ക്ക് പ്രാര്‍ത്ഥിക്കാനുള്ള സ്ഥലമായിരുന്നു. എന്നാല്‍ കാലങ്ങളായി ഇവിടെ പ്രാര്‍ത്ഥനകള്‍ ഇല്ലായിരുന്നു . സ്വകാര്യ വ്യക്തികള്‍ കൈയേറിയ സ്ഥലം ഗോഡൗണ്‍ ആയി വരെ ഉപയോഗിച്ച്‌ വരികയായിരുന്നു. ചരിത്ര സ്മാരകമായ ജൂതപ്പള്ളി സര്‍ക്കാര്‍ ഏറ്റെടുക്കും എന്ന് പറഞ്ഞിരുന്നുവെങ്കിലും പിന്നീട് നടപടികളൊന്നും ഉണ്ടായിട്ടില്ലെന്ന് നാട്ടുകാരുടെ ഭാഷ്യം.

മലബാർ യഹൂദരായിരുന്നു 1567-ൽ ഈ സിനഗോഗ് പണി കഴിപ്പിച്ചത്. കോമൺവെൽത്ത് രാജ്യങ്ങളിൽ തന്നെയും ഏറ്റവും പഴയ സിനഗോഗായാണ് ഈ ജൂതപള്ളി അറിയപ്പെടുന്നത്. ചരിത്രത്തിന്റെ ശേഷിപ്പായ ഈ പള്ളിക്ക് പുറത്ത് ഒരു വലിയ ഘടികാരം ഇപ്പോഴുമുണ്ട്. കൈകൊണ്ട് വരച്ച വെവ്വേറെ ചിത്രങ്ങളോട് കൂടി ചൈനയിൽ നിർമ്മിച്ച ഇരുനൂറ്റിയമ്പത്താറ് പോഴ്സ്‌ലെയിൻ തറയോടുകൾ ഈ ദേവാലയത്തിന്റെ നിലത്ത് പാകിയിരിക്കുന്നു.