ടിപ്പര്‍ ലോറി തടഞ്ഞു നിര്‍ത്തി ഡ്രൈവറോട് ക്ഷോഭിക്കുന്ന പി.കെ.ശശി എം.എല്‍.എയുടെ വീഡിയോ ആണ് സമൂഹമാദ്ധ്യമങ്ങളില്‍ ഇപ്പോൾ വൈറൽ. ഡ്രൈവറോട് ക്ഷോഭിക്കുന്ന എം.എല്‍.എയുടെ വീഡിയോ ദൃക്സാക്ഷികളിൽ ഒരാൾ മൊബൈലിൽ പകർത്തുകയായിരുന്നു. ഈ വിഡിയോയാണു വൈറലായത്. ശനിയാഴ്ച വൈകിട്ട് ചെര്‍പ്പുളശ്ശേരി മാങ്ങോട്ടാണ് സംഭവം. ഇവിടെ പ്രവര്‍ത്തകരോടൊപ്പം നില്‍ക്കുന്ന പി.കെ.ശശി ടിപ്പര്‍ ലോറി തടഞ്ഞു നിര്‍ത്തി ഡ്രൈവറെ ശകാരിക്കുന്നതാണ് വീഡിയോയിലുള്ളത്. ഡ്രൈവറുടെ കണ്ണടിച്ച്‌ പൊട്ടിക്കുമെന്ന് ഉച്ചത്തില്‍ എം.എല്‍.എ ആക്രോശിക്കുന്നത് വീഡിയോയിലുണ്ട്.

എന്നാല്‍ അമിത വേഗതയില്‍ എം.എല്‍.എ സഞ്ചരിച്ച കാറിനെ മറികടന്നതോടെയാണ് ടിപ്പര്‍ ഡ്രൈവറെ ശകാരിച്ചതെന്നാണ് പുറത്തു വരുന്ന വിവരം. വിഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ എംഎൽഎയുടെ ശകാരം കേട്ട ടിപ്പർ ഡ്രൈവർ ഇഖ്ബാൽ വിശദീകരണവുമായി രംഗത്തെത്തുകയായിരുന്നു. തനിക്കാണു തെറ്റു പറ്റിയതെന്നും എംഎൽഎ ഉപദേശിച്ചതാണെന്നും ഡ്രൈവർ പറഞ്ഞു.

എന്നാല്‍ എം.എല്‍.യുടെ ധിക്കാരപരമായ പെരുമാറ്റമെന്ന തരത്തിലാണ് സമൂഹമാദ്ധ്യമങ്ങളില്‍ വീഡിയോ പ്രചരിക്കുന്നത്. ഇതിനു മുന്‍പും ചെര്‍പ്പുളശ്ശേരിയില്‍ പൊലീസ് ഉദ്യോഗസ്ഥനെ ശകാരിക്കുന്ന പി.കെ.ശശിയുടെ വീഡിയോ വ്യാപകമായി പ്രചരിച്ചിരുന്നു.

ഡിവൈഎഫ്ഐ പാലക്കാട് ജില്ലാ കമ്മിറ്റി അംഗമായിരുന്ന യുവതിയുടെ പീഡന പരാതിയെത്തുടർന്നു സിപിഎം പ്രാഥമിക അംഗത്വത്തിൽ നിന്ന് ആറു മാസത്തേക്കു സസ്പെൻഡ് ചെയ്യപ്പെട്ട ശശിയെ പാലക്കാട് ജില്ലാ കമ്മിറ്റിയിലേക്കു തിരിച്ചെടുക്കാൻ കഴിഞ്ഞ ദിവസമാണ് സിപിഎം സംസ്ഥാന സെക്രട്ടേറിയറ്റ് തീരുമാനിച്ചത്.