ആസൂത്രണ കമ്മീന് പകരമുള്ള സംവിധാനമായ നീതി ആയോഗിന്റെ ആദ്യ യോഗത്തില്‍ കടുത്ത വിമര്‍ശനവുമായി കേരളം. കൃത്യമായ ആശയവിനിമയം നടത്താതെയാണ് യോഗം വിളിച്ചു ചേര്‍ത്തതെന്ന് ഉമ്മന്‍ ചാണ്ടി യോഗത്തില്‍ വിമര്‍ശിച്ചു.
യോഗത്തെ കുറിച്ച് അഞ്ചാം തീയതി മാത്രമാണ് അറിഞ്ഞത്. ബജറ്റിന് മുന്നോടിയായി നടത്തുന്ന യോഗത്തില്‍ പങ്കെടുക്കാന്‍ ആവശ്യമായ തയ്യാറെടുപ്പുകള്‍ നടത്താന്‍ സാധിച്ചില്ല. ഏറ്റവും കുറഞ്ഞത് മൂന്ന് ആഴ്ചയെങ്കിലും ലഭിക്കേണ്ടതായിരുന്നു. കൂടാതെ കേന്ദ്രത്തിന്റെ പല പദ്ധതികളെക്കുറിച്ചും മാധ്യമങ്ങളിലൂടെയാണ് അറിയുന്നത്. മെയ്ക്ക് ഇന്‍ ഇന്ത്യ ഉള്‍പ്പെടെയുള്ള പദ്ധതികളില്‍ സംസ്ഥാന സര്‍ക്കാര്‍ എന്താണ് ചെയ്യേണ്ടതെന്ന് കൃത്യമായ അറിയിപ്പ് ലഭിക്കുന്നില്ലെന്നും ഉമ്മന്‍ ചാണ്ടി കുറ്റപ്പെടുത്തി.
കേന്ദ്രത്തിന്റെ പദ്ധതികള്‍ നടപ്പിലാക്കാന്‍ മുഖ്യമന്ത്രിയുടെ നേതൃത്വത്തില്‍ ഉപസമിതികള്‍ രൂപീകരിക്കാന്‍ യോഗത്തില്‍ ധാരണയായി. മുഖ്യമന്ത്രിമാരും സാമ്പത്തിക വിദഗ്ധരും യോഗത്തില്‍ പങ്കെടുത്തു. ബജറ്റിന് മുന്നോടിയായാണ് യോഗം ചേര്‍ന്നത്.
മോദി സര്‍ക്കാരിന്റെ സമ്പൂര്‍ണ്ണ ബജറ്റ് മാര്‍ച്ച് മാസം അവതരിപ്പിക്കാനിരിക്കെ വികസനത്തിന് സംസ്ഥാനങ്ങള്‍ സഹകരിച്ച് പ്രവര്‍ത്തിക്കണമെന്ന് യോഗത്തിന് മുന്നോടിയായി പ്രധാനമന്ത്രി പറഞ്ഞു. അടിസ്ഥാന സൗകര്യവികസനത്തിന് ഊന്നല്‍ നല്‍കുന്ന പദ്ധതികള്‍ ആവിഷ്‌കരിക്കാനും വെള്ളിയാഴ്ച ചേര്‍ന്ന യോഗത്തില്‍ പ്രധാനമന്ത്രി ആവശ്യപ്പെട്ടിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha