എല്ലാ മതവിശ്വാസികളെയും ആദരിക്കുന്ന ഭാരതപാരമ്പര്യം മഹത്തരമാണെന്ന് പരിശുദ്ധ ഇഗ്നാത്തിയോസ് അഫ്രേം രണ്ടാമന് പാത്രിയര്ക്കീസ് ബാവ
എല്ലാ മതവിശ്വാസികളെയും ആദരിക്കുന്ന ഭാരതപാരമ്പര്യം മഹത്തരമാണെന്ന്, ആഗോളസുറിയാനിസഭയുടെ പരമാദ്ധ്യക്ഷന് പരിശുദ്ധ ഇഗ്നാത്തിയോസ് അഫ്രേം രണ്ടാമന് പാത്രിയര്ക്കീസ് ബാവ പറഞ്ഞു. എല്ലാ വിശ്വാസങ്ങളെയും അറിയാനും ആദരിക്കാനും കഴിയുന്നത് വലിയകാര്യമാണ്. കാരണം എല്ലാവരും ദൈവമക്കളാണ്. ഈ തിരിച്ചറിവ് നഷ്ടമാകുമ്പോഴാണ് കലഹങ്ങള് ഉണ്ടാകുന്നത്. പാത്രിയര്ക്കീസ് ബാവയായി സ്ഥാനമേറ്റശേഷം ആദ്യമായി കേരളത്തിലെത്തിയ സുറിയാനിസഭാതലവന് കോട്ടയം നെഹ്റുസ്റ്റേഡിയത്തില് യാക്കോബായ സുറിയാനിസഭയുടെ നേതൃത്വത്തില് നല്കിയ സ്വീകരണത്തില് അനുഗ്രഹപ്രഭാഷണം നടത്തുകയായിരുന്നു അദ്ദേഹം.
അന്ത്യോഖ്യാ സഭയ്ക്ക് മലങ്കരസഭയുമായുള്ള ബന്ധം ഒരിക്കലും ഇല്ലാതാക്കാന്പറ്റാത്തവിധം ശക്തമാണ്. തന്നെ ഇവിടേക്ക് ക്ഷണിച്ചുകൊണ്ടുവന്ന് ഇത്രവലിയ സ്വീകരണം നല്കാന് നേതൃത്വംകൊടുത്ത യാക്കോബായ സുറിയാനിസഭയുടെ അദ്ധ്യക്ഷന് ബസേലിയോസ് തോമസ് പ്രഥമന് ബാവയെ പാത്രിയര്ക്കീസ് ബാവ പ്രശംസിച്ചു. അന്ത്യോഖ്യയില്നിന്നു വന്ന പിതാക്കന്മാരാണ് മലങ്കരയില് സത്യവിശ്വാസം പകര്ന്നതെന്നു പറഞ്ഞ പാത്രിയര്ക്കീസ് ബാവ, അന്ത്യോഖ്യാമലങ്കര ബന്ധം എന്ന് മലയാളത്തില് പറഞ്ഞപ്പോള് നീണാള്വാഴട്ടെയെന്ന് വിശ്വാസികള് ഏറ്റുവിളിച്ചത് ഇഴപിരിയാത്ത സ്നേഹത്തിന്റെ ഓര്മപ്പെടുത്തല്കൂടിയായി.
തന്റെ ജന്മനാട്ടില് വിശ്വാസികള് പീഡിപ്പിക്കപ്പെടുന്നതിന്റെ പശ്ചാത്തലത്തില്, ഹൃദയത്തില്ത്തട്ടുന്ന രീതിയിലായിരുന്നു പാത്രിയര്ക്കീസിന്റെ പ്രസംഗം. കേരളത്തില് നിലനില്ക്കുന്ന സഭാതര്ക്കത്തില് പാത്രിയര്ക്കീസ് ബാവ വീണ്ടും ഖേദം പ്രകടിപ്പിച്ചു. വിശ്വാസികളുടെ നേര്ച്ചപ്പണം കേസുകള്ക്കായി ഉപയോഗിക്കേണ്ടിവരുന്നത് സങ്കടകരമാണ്. ഈ സ്ഥിതി മാറണം.
മുഖ്യമന്ത്രി ഉമ്മന് ചാണ്ടി സമ്മേളനം ഉദ്ഘാടനംചെയ്തു. പാത്രിയര്ക്കീസ് ബാവയെപ്പോലൊരു ഉന്നതവ്യക്തിയെ സംസ്ഥാനത്തിന്റെ അതിഥിയായി സ്വീകരിക്കാന് കഴിഞ്ഞതില് അഭിമാനമുണ്ടെന്ന് അദ്ദേഹം പറഞ്ഞു. കോട്ടയം ഭദ്രാസനാധിപന് തോമസ് മാര് തിമോത്തിയോസ് മംഗളപത്രം സമര്പ്പിച്ചു. സംസ്ഥാനസര്ക്കാര് ഞായറാഴ്പ രാത്രി പാത്രിയര്ക്കീസ് ബാവയ്ക്ക് അത്താഴവിരുന്ന് നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
