കാലാകാലങ്ങളായി ദ്രോഹിക്കുന്ന രാഷ്ട്രീയ പാര്‍ട്ടികളെ അറിയാമെന്ന് ഒാര്‍ത്തഡോക്സ് സഭ. ഉപതിരഞ്ഞെടുപ്പുകളില്‍ അത് പ്രതിഫലിക്കും. സഭയുടെ നിലപാട് എന്ന രീതിയില്‍ പരസ്പര വിരുദ്ധമായ വാര്‍ത്തകള്‍ പ്രചരിക്കുന്നു. സഭയുടെ നിലപാട് വിശ്വാസികള്‍ക്ക് കൃത്യമായി അറിയാം. അതനുസരിച്ച് വിശ്വാസികള്‍ വോട്ടുചെയ്യുമെന്ന് സഭാ വക്താവ് അറിയിച്ചു. മുന്നണി നേതാക്കളുടെ സന്ദർശനത്തിന് പിന്നാലെയാണ് സഭ നിലപാട് വ്യക്തമാക്കിയത്.

ഓര്‍ത്തഡോക്‌സ്-യാക്കോബായ വിഭാഗങ്ങള്‍ തമ്മിലുള്ള തര്‍ക്കത്തില്‍ സുപ്രീംകോടതി വിധി നടപ്പാക്കുമെന്ന എന്ന നിലപാടാണ് മുഖ്യമന്ത്രി പിണറായി വിജയന്‍ സ്വീകരിച്ചത്. കോടതിവിധി ബഹുമാനിച്ചു കൊണ്ടുള്ള സമീപനമാണ് സര്‍ക്കാര്‍ എപ്പോഴും സ്വീകരിക്കുന്നതെന്നും മുഖ്യമന്ത്രി നിയമസഭയില്‍ പറഞ്ഞിരുന്നു. അതേസമയം വിധി നടപ്പാക്കാത്ത സര്‍ക്കാര്‍ നിലപാടിനെതിരെ ആഞ്ഞടിച്ച് ഓര്‍ത്തഡോക്‌സ് സഭ രംഗത്തെത്തിയിരുന്നു. വിധിയെ വെല്ലു വിളിക്കുന്നവര്‍ക്കൊപ്പമാണ് സര്‍ക്കാര്‍ നിന്നത് എന്നും ഇനി സമവായ ചര്‍ച്ചകള്‍ക്കില്ല എന്നും സഭ വ്യക്തമാക്കിയിരുന്നു. വിധി നടപ്പാക്കിയില്ലെങ്കില്‍ കോടതിയലക്ഷ്യത്തിന് ഹര്‍ജി നല്‍കും. അടച്ചിട്ടിരിക്കുന്ന പിറവം പള്ളി അടക്കം ഉടന്‍ തുറന്നുനല്‍കണം എന്നുമായിരുന്നു സഭയുടെ നിലപാട്. ഈ സാഹചര്യത്തിലാണ് ഉപതെരഞ്ഞെടുപ്പുകൾ അടുത്തിരിക്കവേ രാഷ്ട്രീയ നിലപാട് വ്യക്തമാക്കി ഇപ്പോൾ ഓർത്തഡോക്സ് സഭ രംഗത്ത് എത്തിയിരിക്കുന്നത്.