വനിതാ ബൈക്ക് റൈഡറെ പിന്തുടര്ന്ന് ഇടിച്ചുവീഴ്ത്തിയ കാര് ഡ്രൈവര് പിടിയില്
ഗുരുഗ്രാമിലെ ഗോള്ഫ് കോഴ്സ് റോഡില് വനിതാ ബൈക്ക് റൈഡറെ ഇടിച്ചിട്ട കാര് ഡ്രൈവര് പിടിയില്. രാജസ്ഥാനിലെ ദൗസയില് നിന്നാണ് കല്യാണ് ബെയ്ന്സ്ലയെ പൊലീസ് അറസ്റ്റ് ചെയ്തത്. കേസിലെ മറ്റൊരു പ്രതിയായ ലവ്നിഷ് ഗുര്ജറിനെയും അറസ്റ്റ് ചെയ്തിട്ടുണ്ട്. സിസിടിവി ദൃശ്യങ്ങളുടെ അടിസ്ഥാനത്തില് കല്യാണ് ബെയ്ന്സ്ലക്കെതിരെ വധശ്രമത്തിനാണ് ഗുരുഗ്രാം പൊലീസ് കേസെടുത്തിരിക്കുന്നത്.
ബൈക്കില് യാത്രചെയ്യുന്ന യുവതിയെ കാര് മനഃപൂര്വം ഇടിച്ചുവീഴ്ത്തുന്നതിന്റെ ദൃശ്യങ്ങള് സോഷ്യല് മീഡിയയില് പ്രചരിച്ചിരുന്നു. റിബല്വീല്സ് സിയ എന്ന ഇന്സ്റ്റഗ്രാം പേജിന്റെ ഉടമയായ സിയയാണ് അപകടത്തില്പ്പെട്ടത്. ഞായറാഴ്ച ഗുരുഗ്രാമിലെ ഗോള്ഫ് കോഴ്സ് റോഡില് ബൈക്ക് സംഘത്തിനൊപ്പം യാത്ര ചെയ്യുന്നതിനിടെയാണ് സംഭവമെന്ന് സിയ പറഞ്ഞു. യാത്ര തുടങ്ങിയതുമുതല് ഒരു സംഘം യുവാക്കള് കാറില് തങ്ങളെ പിന്തുടര്ന്ന് യാത്ര തടസപ്പെടുത്താന് ശ്രമിച്ചെന്നാണ് സിയയുടെ ആരോപണം. കാറിലുണ്ടായിരുന്നവര് മദ്യലഹരിയിലായിരുന്നെന്നും സിയ പറഞ്ഞു.
സിയയുടെ ബൈക്കില് സ്ഥാപിച്ചിരുന്ന ക്യാമറയില് സംഭവത്തിന്റെ ദൃശ്യങ്ങള് വ്യക്തമായി പതിഞ്ഞിട്ടുണ്ട്. കാറില് യാത്രചെയ്യുന്നവരോട് അകലം പാലിക്കൂവെന്ന് പറയുമ്പോള് അവര് യുവതിയോട് ദേഷ്യപ്പെടുന്നതും ദൃശ്യങ്ങളില് കാണാം. പിറകില് നിന്ന് വേഗത്തില് വന്ന കാര് സിയയുടെ ബൈക്കിനരികിലെത്തുമ്പോള് മനഃപൂര്വം വെട്ടിച്ച് അപകടമുണ്ടാക്കുന്നതായാണ് ദൃശ്യങ്ങളിലുള്ളത്. ഇടിയുടെ ആഘാതത്തില് സിയ റോഡിലേക്ക് തെറിച്ചുവീണു. ബൈക്ക് ഏതാനും മീറ്ററുകള്കൂടി റോഡിലൂടെ തെന്നിനീങ്ങി.
അപകടത്തിന് പിന്നാലെ യുവതിക്കൊപ്പമുണ്ടായിരുന്ന സുഹൃത്ത് കാര് പിന്തുടര്ന്ന് ഡ്രൈവറെ തടഞ്ഞുനിര്ത്തിയെങ്കിലും ഉത്തരവാദിത്തം നിഷേധിച്ച് ഇയാള് കടന്നുകളഞ്ഞതായും സിയ ആരോപിച്ചു. വാഹനത്തിന്റെ രജിസ്ട്രേഷന് നമ്പര് ഉള്പ്പെടെയുള്ള വിവരങ്ങള് പങ്കുവച്ചുകൊണ്ട് പൊലീസ് ഇക്കാര്യത്തില് നടപടി സ്വീകരിക്കണമെന്ന് സിയ ആവശ്യപ്പെട്ടിരുന്നു. പിന്നാലെയാണ് സംഭവത്തില് പൊലീസ് കേസെടുത്തത്.
https://www.facebook.com/Malayalivartha
