സ്റ്റേഷനുകളിലെ സൗജന്യ വൈഫൈ സംവിധാനം വിജയകരമായി കേന്ദ്രസര്‍ക്കാര്‍ നടപ്പാക്കുന്നതിനിടെ ട്രെയിനുകളിലും ഈ പദ്ധതി നടപ്പാക്കുമെന്ന് റെയില്‍വേ മന്ത്രി പിയൂഷ് ഗോയല്‍. 5150 റെയില്‍വേ സ്‌റ്റേഷനുകളില്‍ നിലവില്‍ വൈഫൈ സൗകര്യമുണ്ട്. 2020തോടെ ആകെയുള്ള 6500 സ്‌റ്റേഷനുകളിലും സൗജന്യമായി വൈഫൈ ലഭ്യമാക്കും. സ്‌റ്റേഷനുകളിലേത് പോലെ എളുപ്പമല്ല ട്രെയിനുകള്‍ക്കുള്ളില്‍ വൈഫൈ സംവിധാനം ഒരുക്കുക. വേഗത്തില്‍ ഓടിക്കൊണ്ടിരിക്കുന്നതിനാല്‍ സിഗ്നല്‍ ഉള്‍പ്പെടെയുള്ള കാര്യങ്ങളില്‍ പ്രശ്‌നങ്ങളുണ്ടാകും. അതിനാല്‍ ഏറെ സങ്കീര്‍ണമായ പ്രവര്‍ത്തിയാണ്. അതുകൊണ്ട് പൂര്‍ണമായി നടപ്പാക്കാന്‍ നാല് വര്‍ഷം വേണ്ടിവരുമെന്ന് മന്ത്രി പറഞ്ഞു. 2013ല്‍ റെയില്‍ വേ മന്ത്രിയായിരുന്ന പവന്‍കുമാര്‍ ബന്‍സാല്‍ ന്യൂഡല്‍ഹി- ഹൗറ എക്‌സ്പ്രസില്‍ സൗജന്യ വൈഫൈ സംവിധാനം നടപ്പാക്കിയിരുന്നു. കൂടുതല്‍ ട്രെയിനുകളില്‍ ഇത് നടപ്പാക്കുമെന്ന് പ്രഖ്യാപിച്ചിരുന്നെങ്കിലും നടന്നില്ല.

വലിയ തുക നിക്ഷേപം വേണ്ട പദ്ധതിയാണിതെന്നും മന്ത്രി പറഞ്ഞു. ടവറുകള്‍ സ്ഥാപിക്കണം, നവീന സാങ്കേതികവിദ്യ വേണം. അതിനനുസരിച്ചുള്ള ഉപകരണങ്ങള്‍ വേണം. പദ്ധതി സാധ്യമാകുന്നതോടെ സുരക്ഷയില്‍ വന്‍ കുതിച്ചു ചാട്ടമുണ്ടാക്കാനാകും. കംപാര്‍ട്ട്‌മെന്റുകളില്‍ സിസിടിവി സ്ഥാപിക്കാനും ദൃശ്യങ്ങള്‍ ഉടന്‍ പൊലീസ് സ്‌റ്റേഷനുകളുമായി ബന്ധിപ്പിക്കാനുമാവും. ഇത് റെയില്‍വേയില്‍ വലിയ കുതിപ്പായിരിക്കും സൃഷ്ടിക്കുക എന്നും മന്ത്രി പറഞ്ഞു. ട്രെയിനുകളില്‍ സ്ത്രീകള്‍ക്കും കുട്ടികള്‍ക്കും നേരെ ഉണ്ടാകുന്ന അതിക്രമങ്ങളും മോഷണവും പിടിച്ചുപറയും അടക്കമുള്ള കുറ്റകൃത്യങ്ങള്‍ തടയാനും ആകും.

പ്രതിവര്‍ഷം 800 കോടിലാഭിക്കാന്‍ ജനറേറ്റര്‍ കാര്‍ ബോഗികള്‍ ഒഴിവാക്കി, യാത്രക്കാര്‍ക്കുള്ള കോച്ചുകള്‍ കൂടുതല്‍ ഘടിപ്പിക്കാനാണ് റെയില്‍വെ ആലോചിക്കുന്നുണ്ട്. 500റോളം ട്രെയിനുകളില്‍ ജനറേറ്റര്‍ കാറുകള്‍ ഉപയോഗിക്കുന്നുണ്ട്. ഇവ മാറ്റിയാല്‍ 20,000 സീറ്റുകള്‍ അധികം ഒരുക്കാനാവും. എസി, ഫാന്‍, ലൈറ്റുകള്‍ എന്നിവയ്ക്കുള്ള വൈദ്യുതി ഉത്പാദിപ്പിക്കുന്നത് ജനറേറ്റര്‍ കാറുകളാണ്. ഇലക്ട്രിക് ലൈനില്‍ നിന്ന് നേരിട്ട് വൈദ്യുതി എടുക്കാനാണ് ആലോചിക്കുന്നത്. അതിലൂടെ ഇന്ധനച്ചെലവും മലിനീകരണവും കുറയ്ക്കാനാകും. കൂടുതല്‍ സീറ്റുകള്‍ ഘടിപ്പിക്കുന്നതിലൂടെ വരുമാനവും വര്‍ദ്ധിക്കും.