ശ്രീ പത്മനാഭസ്വാമി ക്ഷേത്രത്തില്‍ നിന്ന് 267. 272 കിലോഗ്രാം സ്വര്‍ണം നഷ്ടപ്പെട്ടെന്ന് മുന്‍ സി.എ.ജി വിനോദ് റായിയുടെ റിപ്പോര്‍ട്ട്. ക്ഷേത്രാവശ്യത്തിന് ഉരുക്കാന്‍ നല്‍കിയ സ്വര്‍ണമാണ് നഷ്ടപ്പെട്ടത്. ക്ഷേത്രനിലവറയില്‍ നിന്നെടുത്ത സ്വര്‍ണം മുഴുവനും തിരിച്ചെത്തിയില്ലെന്നാണ് മുന്‍ സിഎജി വിനോദ് റായ് സുപ്രീംകോടതിയില്‍ സമര്‍പ്പിച്ച 1800 പേജുള്ള ഓഡിറ്റ് റിപ്പോര്‍ട്ടില്‍ പറയുന്നത്.ഒരു സ്വകാര്യ ചാനലാണ് റിപ്പോര്‍ട്ട് പുറത്ത് വിട്ടത്. 

 ക്ഷേത്രത്തിന്റെ ആവശ്യങ്ങള്‍ക്കായി നിലവറകളില്‍ നിന്നെടുത്ത 893.644 കിലോഗ്രാം സ്വര്‍ണത്തിലാണ് ഇത്രയും കുറവു വന്നത്. ക്ഷേത്രാവശ്യത്തിനു ഉരുക്കാന്‍ നല്‍കിയ സ്വര്‍ണമാണു നഷ്ടപ്പെട്ടതെന്ന് സുപ്രീം കോടതിയില്‍ സമര്‍പ്പിച്ച ആഡിറ്റ് റിപ്പോര്‍ട്ട് സൂചിപ്പിക്കുന്നു.
 82 തവണയായാണു സ്വര്‍ണം പുറത്തേക്കെടുത്തത്. ക്ഷേത്രം സ്വര്‍ണം പൂശാന്‍ 4.8 കോടിയുടെ സ്വര്‍ണമാണു നാലു വര്‍ഷം മുമ്പു കരാറുകാരനു നല്‍കിയതെന്നും റിപ്പോര്‍ട്ടില്‍ പറയുന്നു. 2002 ഡിസംബര്‍ 12ന് 82 സ്വര്‍ണക്കട്ടികള്‍ പുറത്തെടുത്തെങ്കിലും 72 മാത്രമാണ് തിരിച്ചുവന്നത്. 3.04 കിലോ സ്വര്‍ണം അങ്ങനെ നഷ്ടപ്പെട്ടു. 513.76 കിലോ സ്വര്‍ണം ഉരുക്കിയപ്പോള്‍ ലഭിച്ചത് 370.45 കിലോ ശുദ്ധ സ്വര്‍ണം മാത്രമാണ്. ഇതിലൂടെ നഷ്ടപ്പെട്ടത് 143.06 കിലോ ആണ്. 109 ശരപൊളി മാലകളില്‍ 19 വര്‍ഷത്തിനുശേഷം നിലവറകളിലെത്തിയത് 104 മാത്രമാണെന്നും റിപ്പോര്‍ട്ടില്‍ സൂചിപ്പിച്ചിട്ടുണ്ട്. .2008-09 വര്‍ഷം ക്ഷേത്രത്തില്‍ കാണിക്കയായി ലഭിച്ച സ്വര്‍ണം, വെള്ളി എന്നിവയുടെ കണക്കില്ലെന്നും റിപ്പോര്‍ട്ടില്‍ പറയുന്നു. ക്ഷേത്ര നടത്തിപ്പുമായി ബന്ധപ്പെട്ട് അമിക്കസ് ക്യൂറി ഗോപാല്‍ സുബ്രഹ്മണ്യം ഉന്നയിച്ച ആരോപണങ്ങള്‍ ശരിവയ്ക്കുന്നതാണ് വിനോദ് റായിയുടെ കണ്ടെത്തലുകള്‍.
റിപ്പോര്‍ട്ടിലെ മറ്റ് ആരോപണങ്ങള്‍
ക്ഷേത്രത്തില്‍ കൃത്യമായ വരവുചെലവ് കണക്ക് സൂക്ഷിക്കുന്നില്ല.
ക്ഷേത്ര നിലവറയില്‍നിന്ന് വന്‍തോതില്‍ വിലപിടിപ്പുള്ള വസ്തുക്കള്‍ നഷ്ടമായി.
ഉരുക്കാന്‍ നല്‍കുംമുമ്പ് സ്വര്‍ണം തൂക്കി ശുദ്ധി പരിശോധിച്ചില്ല
90 ശതമാനം ശുദ്ധിയുള്ള സ്വര്‍ണമാക്കുന്ന പ്രക്രിയയിലൂടെ 10.4 കിലോ നഷ്ടമായി. ഇത് 2.89 കോടിയുടെ നഷ്ടമുണ്ടാക്കി.
ശുദ്ധീകരണം എന്ന പേരില്‍ തുടര്‍ച്ചയായി സ്വര്‍ണവും വെള്ളിയും നിലവറകളില്‍നിന്ന് എടുത്തിട്ടുണ്ട്.
ശുദ്ധ സ്വര്‍ണം കട്ടികളാക്കിയപ്പോള്‍ വീണ്ടും 1.547 കിലോ നഷ്ടപ്പെട്ടു.
200001 മുതല്‍ 200708 വരെയുള്ള ഇടപാടുകളുടെ കണക്കുകള്‍ ലഭ്യമല്ല
ബാങ്ക് അക്കൗണ്ടിലെ ഓണ്‍ലൈന്‍ നിക്ഷേപങ്ങളുടെ കണക്കുകള്‍ ചേര്‍ത്തിട്ടില്ല
നടവരവിലെ സ്വര്‍ണവും വെള്ളിയും നിലവറകളിലെ സ്വത്തും ക്ഷേത്ര സ്വത്തിന്റെ ഭാഗമായിട്ടില്ല
കണക്കുപുസ്തകങ്ങളില്‍ മുഴുവന്‍ ക്രമക്കേടുകളാണ്.
കാണിക്ക എണ്ണുന്നതിലും സുതാര്യതയില്ല. ഇത് കണക്കില്‍പ്പെടുത്താനും കാലതാമസമുണ്ടായി.
കാണിക്കവഞ്ചികള്‍ക്ക് ക്രമനമ്പര്‍ ഇല്ല. പലപ്പോഴും ഇവയുടെ എണ്ണത്തിലും മാറ്റമുണ്ട്. ആറ് വഞ്ചികളാണ് ചിലപ്പോഴുള്ളതെങ്കില്‍ മറ്റ് ചിലപ്പോള്‍ അത് 35 ആയി ഉയരും.
2006-08 കാലയളവിലെ കാണിക്ക രജിസ്റ്റര്‍ ഓഡിറ്റിന് വിധേയമായിട്ടില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha