അട്ടപ്പാടിയില്‍ നാലു മാവോയിസ്റ്റുകള്‍ കൊല്ലപ്പെട്ടത് വ്യാജ ഏറ്റമുട്ടലിലൂടെയാണെന്ന പ്രചാരണം ശക്തമായിരിക്കെ, സര്‍ക്കാരിനെ പ്രതിസന്ധിയിലാക്കി സിപിഐ നേതാക്കള്‍ ഇന്ന് സ്ഥലം സന്ദര്‍ശിയ്ക്കും. വ്യാജ ഏറ്റുമുട്ടലാണെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞതിന് പിന്നാലെയാണ് നേതാക്കളുടെ സന്ദര്‍ശനം. നാലു മാവോയിസ്റ്റുകള്‍ കൊല്ലപ്പെട്ട മേലേ മഞ്ചിക്കണ്ടി വനമേഖലയിലാണ് സിപിഐ പ്രതിനിധി സംഘം ഇന്ന് സന്ദര്‍ശനം നടത്തുന്നത്. സി പി ഐ അസിസ്റ്റന്റ് സെക്രട്ടറി പ്രകാശ് ബാബു, സംസ്ഥാന എക്‌സിക്യുട്ടീവ് അംഗം പി പ്രസാദ്, പാലക്കാട് ജില്ലാ സെക്രട്ടറി കെ പി സുരേഷ് രാജ്, എം എല്‍ എ മാരായ ഇ കെ വിജയന്‍, മുഹമ്മദ് മുഹ്‌സിന്‍ എന്നിവരാണ് സന്ദര്‍ശനം നടത്തുന്നത്. മാവോയിസ്റ്റുകള്‍ കൊല്ലപ്പെട്ടത് വ്യാജ ഏറ്റുമുട്ടലിലൂടെയാണെന്ന പ്രചാരണം ശക്തമാവുന്നതിനിടെ ഭരണകക്ഷിയിലെ രണ്ടാമത്തെ കക്ഷി തന്നെ സന്ദര്‍ശിയ്ക്കുന്നതില്‍ ഏറെ രാഷ്ട്രീയ പ്രാധാന്യമുണ്ട്.
വ്യാജ ഏറ്റുമുട്ടലാണ് നടന്നതെന്ന് വിവരം ലഭിച്ചതെന്ന് കാനം രാജേന്ദ്രന്‍ വ്യക്തമാക്കിയ സാഹചര്യത്തില്‍ സിപിഐ നേതാക്കളുടെ സന്ദര്‍ശനം സര്‍ക്കാരിനും നിര്‍ണായകമാണ്. പ്രതികൂല കാലാവസ്ഥയും ആക്രമണ സാധ്യതയും മുന്നില്‍ കണ്ട്, തണ്ടര്‍ബോള്‍ട്ട് പ്രദേശത്ത് വിലക്ക് ഏര്‍പ്പെടുത്തിയിട്ടുണ്ട്. എന്നാല്‍ ഇത് നിലനില്‍ക്കെ തന്നെയാണ് സിപിഐ നേതാക്കളുടെ സംഘം സ്ഥലം സന്ദര്‍ശിക്കുന്നത്. മേലെ മഞ്ചിക്കണ്ടി ഊരിലെത്തുന്ന സംഘം ഊരുവാസികളുമായും കൂടിക്കാഴച നടത്തും.