ഇവള്‍ മലയാളത്തിന്റെ മരുമകള്‍. നര്‍ത്തകിയും നടിയും അതിലുപരി ഫ്രഞ്ചുകാരിയുമായ ലക്ഷ്മി. കലയോടും കലാകാരനോടുമുള്ള അപൂര്‍വ്വ പ്രണയമാണ് ഇവളെ ഈ നാടിന്റെ മരുമകള്‍ ആക്കിയത്. ഇന്നറിയപ്പെടുന്നത് പാരീസ് ലക്ഷ്മി എന്ന പേരില്‍.
1998ലാണ് മാതാപിതാക്കളും സഹോദരനുമൊത്ത് കേരളത്തില്‍ എത്തിയത്. മാതാപിതാക്കള്‍ ഭാരതീയസംസ്‌കൃതിയിലും കലകളിലും ആകൃഷ്ടരായിരുന്നു. താന്‍ ജനിക്കുന്നതിനുമുമ്പേ അവര്‍ ഇന്ത്യന്‍ സംസ്‌കാരത്തെ അടുത്തറിഞ്ഞിരുന്നു. അതുകൊണ്ടാണ് തനിക്ക് ലക്ഷ്മിയെന്നും സഹോദരന് നാരായണനെന്നും പേരു വന്നത്. മാതാപിതാക്കള്‍ അടിമുടി ആര്‍ട്ടിസ്റ്റുകളുമാണ്. പിതാവ് യീവ്‌സ് ക്യുനിയോ നാടകകലാകാരനും കവിയുമാണ്. അമ്മ പട്രീഷ്യ ക്യുനിയോ ശില്പകലാകാരിയും. 1982 മുതല്‍ പിതാവ് ഇന്ത്യയില്‍ നിത്യസന്ദര്‍ശകനാണ്.
1998 ലാണ് ആ നോട്ടം ഒരു കലാകാരനില്‍ പതിഞ്ഞത്. ഫോര്‍ട്ട് കൊച്ചിയിലെ ഒരു രംഗവേദി. ആട്ടവിളക്കിനു മുന്നില്‍ നിറഞ്ഞാടിയ പ്രായംകുറഞ്ഞ ഒരു കഥകളി കലാകാരന്റെ വിസ്മയിപ്പിക്കുന്ന പകര്‍ന്നാട്ടത്തില്‍ ലക്ഷ്മിയെന്ന കുട്ടി കൗതുകം പൂണ്ടു. തന്റെ ആദ്യ ഇന്ത്യാ സന്ദര്‍ശനമായിരുന്നു അത്.
ആ സന്ദര്‍ശനത്തിലാണ് ഭാവിയില്‍ ഭര്‍ത്താവാകുമെന്ന് ചിന്തിക്കുകപോലും ചെയ്യാതിരുന്ന സുനിലിനെ കാണുന്നത്. ആട്ടവിളക്കിനു മുന്നിലെ ആ പ്രകടനം തന്റെ മനസില്‍ കുറേനാള്‍ കിടന്നു. അതുപിന്നെ പ്രണയമാവുകയായിരുന്നുവെന്നും അറിയില്ലായിരുന്നു. വര്‍ഷാവര്‍ഷം ഇന്ത്യ സന്ദര്‍ശിക്കുന്നത് ഞങ്ങളുടെ പതിവായി. സ്‌കൂള്‍ അവധിക്കാലത്ത് രണ്ടുമാസം. ചിലപ്പോഴത് ഒരു വര്‍ഷവുമാകാം. അങ്ങനെയാണ് കഥകളി നടനായ വൈക്കം സ്വദേശി പള്ളിപ്പുറം സുനില്‍ തന്റെ പാതിയാവുന്നത്. 2012ലാണ് സുനിലും ലക്ഷ്മിയും വിവാഹിതരായത്. രണ്ട് സംസ്‌കൃതിയുടെ ഇഴുകിച്ചേരല്‍ കൂടിയായിരുന്നു അവരുടെ വിവാഹം.
കലയുടെയും സംസ്‌കാരത്തിന്റെയും കാര്യത്തില്‍ വ്യത്യസ്ത സാഹചര്യത്തില്‍ വളര്‍ന്നവരെ ഒന്നാക്കിയത് കലയെന്ന മാന്ത്രികതയാണെന്ന് ലക്ഷ്മിയും സുനിലും പറഞ്ഞു.അവരുടെ പ്രണയത്തിന്റെ സാഫല്യത്തിന് ഇപ്പോള്‍ മൂന്നുവര്‍ഷം. ഇതിനോടകം കേരളത്തിലും കേരളത്തിനു പുറത്തും ഫ്രാന്‍സിലും ഒട്ടേറെ വേദികളില്‍ ലക്ഷ്മി ഭരതനാട്യം അവതരിപ്പിച്ചു. ഇപ്പോള്‍ വൈക്കം കേന്ദ്രമാക്കി ആര്‍ട് സ്‌കൂള്‍ നടത്തുകയാണ്. മാര്‍ച്ച് എട്ടിന് വൈക്കത്ത് സംഗമം അവതരിപ്പിക്കാനുള്ള തയ്യാറെടുപ്പിലാണ് കടല്‍ കടന്നെത്തിയ ലക്ഷ്മിയും കേരളത്തിന്റെ സുനിലും. ഇതൊരു അപൂര്‍വതയായിരിക്കുമെന്നു ഈ ദമ്പതികള്‍ ആത്മവിശ്വാസം പ്രകടിപ്പിച്ചു. ദേശത്തിനും മതത്തിനും അതീതമാണ് പ്രണയമെന്നാണ് ഇവരുടെ സാക്ഷ്യം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha