വാളയാര്‍ കേസുമായി ബന്ധപ്പെട്ട് ബി.ജെ.പി. നേതാവ് കുമ്മനം രാജശേഖരന്റെ സമരം ഉദ്ഘാടനം ചെയ്ത എഴുത്തുകാരന്‍ ഡോ. ജോര്‍ജ് ഓണക്കൂര്‍ അദ്ദേഹത്തിന് ഉമ്മ നല്‍കിയത് ചിത്രം സഹിതം പോസ്റ്റ് ചെയ്ത് വിമര്‍ശിച്ച എഴുത്തുകാരി ചന്ദ്രികയുടെ നിലപാടിനെതിരെ രൂക്ഷ വിമര്‍ശനം. രാഷ്ട്രീയത്തിനപ്പുറം കുമ്മനം എന്ന മനുഷ്യ സ്‌നേഹിയേയും കുമ്മനം എന്തിന് വേണ്ടി സമരം ചെയ്തുവെന്നത് കാണാതെയുമാണ് ചന്ദ്രിക പോസ്റ്റിട്ടത്. വാളയാറില്‍ രണ്ട് കുട്ടികളെ പീഡിപ്പിച്ച് കൊന്നതില്‍ രാഷ്ട്രീയം മറന്ന് എല്ലാവരും പുനരന്വേഷണം വേണെന്ന് വാദിക്കുമ്പോഴാണ് വെറുമൊരു ചുംബനത്തെ കളിയാക്കി പോസ്റ്റിട്ടത്.

വാളയാറില്‍ മരിച്ച പെണ്‍കുട്ടികളുടെ അമ്മയ്ക്കു നീതി നിഷേധിക്കുന്നതില്‍ പ്രതിഷേധിച്ചാണ് സെക്രട്ടേറിയറ്റ് പടിക്കല്‍ കുമ്മനം രാജശേഖരന്റെ നേതൃത്വത്തില്‍ ഉപവാസസമരം സംഘടിപ്പിച്ചത്. ഉപവാസം ഡോ. ജോര്‍ജ് ഓണക്കൂറാണ് ഉദ്ഘാടനം ചെയ്തത്.

'ഇന്ന് തിരുവനന്തപുരം പ്രസ് ക്ലബ്ബില്‍ കേരളം മലയാള ഭാഷാ സായാഹ്ന പരിപാടിക്ക് എന്നെ വിളിച്ചിട്ടുണ്ട്. ഡോ. ജോര്‍ജ് ഓണക്കൂറും ഈ പരിപാടിയില്‍ ഉണ്ടെന്ന് നേരത്തേ അയച്ചു കിട്ടിയ ബ്രോഷറില്‍ നിന്ന് അറിഞ്ഞിരുന്നു. പരിപാടിയില്‍ സന്തോഷത്തോടെ പങ്കെടുക്കാനിരിക്കുകയായിരുന്നു. എന്നാല്‍ ഇപ്പോള്‍ ഈ പത്രവാര്‍ത്ത കണ്ടതോടെ, കുമ്മനത്തിന്റെ 'സ്ത്രീ നീതി' സമരം ഉദ്ഘാടനം ചെയ്യുകയും ഉമ്മ കൊടുക്കുകയും ചെയ്യുന്ന ഒരെഴുത്തുകാരന്റെ കൂടെ വേദി പങ്കിടാന്‍ ഇന്ന് ഞാന്‍ തയ്യാറല്ല എന്ന് സംഘാടകരെ വിളിച്ചു പറഞ്ഞിട്ടുണ്ട്' ചന്ദ്രിക ഫെയ്‌സ്ബുക്ക് കുറിപ്പില്‍ പറയുന്നു.

'വാളയാറിലെ കുഞ്ഞുങ്ങളുടെ നീതിക്കായി എന്ന് പറഞ്ഞ് കേരളത്തില്‍ കഴിയുന്നത്ര രാഷ്ടീയ ലാഭമുണ്ടാക്കാന്‍ ശ്രമിക്കുന്ന ബി ജെ പിയുടെ യഥാര്‍ത്ഥ മുഖമറിയാന്‍ ഒരെഴുത്തുകാരന് ഇത്ര വലിയ പ്രയാസമോ? ഗുജറാത്ത് വംശഹത്യയുടെ ഇപ്പോഴും ചോരയുണങ്ങാത്ത അനുഭവങ്ങളെ മറക്കാന്‍, പ്രപഞ്ച മാനവ സ്‌നേഹത്തിനും തുല്യനീതിക്കും വേണ്ടി നിലകൊള്ളേണ്ടുന്ന എഴുത്തുകാര്‍ക്ക് കഴിയുന്നതെങ്ങനെ! ബി ജെ പി അധികാരത്തിലുള്ള, പ്രബലമായ മറ്റ് സംസ്ഥാനങ്ങളില്‍ നടക്കുന്ന ലൈംഗികാക്രമണ പരമ്പരകളെക്കുറിച്ച് അല്പമെങ്കിലും ബോധമുണ്ടെങ്കില്‍ ഡോ. ജോര്‍ജ് ഓണക്കൂര്‍ അവരുടെ ഒപ്പം നില്ക്കുകയില്ല. കത്വവയിലെ കുഞ്ഞിന്റെ , മറ്റനേകം നിസ്വരായ ദലിത്, മുസ്ലീം അറും കൊലകളുടെ ദുര്‍ഗന്ധം പേറുന്ന ഹിന്ദുത്വ ഫാസിസത്തിന്റെ മുഖത്ത് ഒരു എഴുത്തുകാരന്‍ സ്‌നേഹപൂര്‍വം പരസ്യമായി നല്‍കിയ ഈ രാഷ്ട്രീയ ചുംബനം എന്നെ ഭയപ്പെടുത്തുന്നു' ചന്ദ്രിക ഫെയ്‌സ്ബുക്ക് കുറിപ്പില്‍ ആരായുന്നു.

ഈ വിഷയത്തില്‍ ചന്ദ്രികയ്‌ക്കെതിരെ വ്യാപകമായ സോഷ്യല്‍ മീഡിയ അറ്റാക്കാണ് നടക്കുന്നത്. അതിന് പുറമേ ബി.ജെ.പി. വക്താവ് ബി. ഗോപാലകൃഷ്ണനും രംഗത്തെത്തി. ജോര്‍ജ് ഓണക്കൂറും ചന്ദ്രികയും തമ്മില്‍ രാവും പകലും സൂര്യനും ചന്ദ്രനും തമ്മിലുള്ള വ്യതാസമുണ്ട്. സാഹിത്യ സ്ഥാന സ്വാര്‍ത്ഥതയുടെ മോഹമാണ് ചന്ദികയുടെ വാക്കുകളിലെ ഇംഗിതം. പിണറായിയുടെ മാനസപുത്രിക്ക് കുമ്മനത്തിനോട് വിദ്വേഷം തോന്നുന്നത് സ്വാഭാവികം.

കുമ്മനത്തിന്റെ കളറിനോടൊ അതൊ സഹജീവി സ്‌നേഹത്തോടൊ ചന്ദ്രികക്ക് വിരോധം? വനിതാമതിലില്‍ കയറിനിന്ന് വിളിച്ച നവോത്ഥാന മുദ്രാവാക്യം വാളയാറില്‍ മുഴങ്ങാതെ പോയത് ആരുടെ ഭാഗ്യം? അനന്തതയില്‍ അലിഞ്ഞ് പോയ കുട്ടികളുടെ ആത്മാവിന് ആശ്വാസമായിട്ടുണ്ടാകും ഇത്തരം ഹിപ്പോക്രാറ്റുകളുടെ ശബ്ദം കേള്‍ക്കാതെ പോയതില്‍ ഗോപാലകൃഷ്ണന്‍ പറഞ്ഞു.