ഭര്‍ത്താവിനെ കൊന്നയാളെ അതേ രീതിയില്‍ ക്വട്ടേഷന്‍ സംഘത്തെ ഉപയോഗിച്ച് കൊലപ്പെടുത്തിയ ഭാര്യയെ പോലീസ് അറസ്റ്റ് ചെയ്തു. കലവൂരില്‍ ബിജെപി നേതാവ് വേണുഗോപാലിന്റെ മരണത്തിന് പിന്നില്‍ പ്രവര്‍ത്തിച്ച നാലു സ്ത്രീകളെയാണ് പോലീസ് അറസ്റ്റ് ചെയ്തത്.
 ബി.ജെ.പി ആലപ്പുഴ മണ്ഡലം സെക്രട്ടറി കൂടിയായ കലവൂര്‍ ഐ.ടി.സി കോളനിയില്‍ വേണുഗോപാല്‍(46) കഴിഞ്ഞ മാസം 29ന് പുലര്‍ച്ചെ വീട്ടുമുറ്റത്ത് വെട്ടേറ്റ് മരിച്ച കേസിലാണ് നാലു സ്ത്രീകള്‍ ഇന്നലെ പിടിയിലായത്. 2013മാര്‍ച്ചില്‍ കെ.എസ്.ഇ.ബി ജീവനക്കാരനായ എമ്മാച്ചന്‍ എന്നു വിളിക്കുന്ന വിലയകലവൂര്‍ ചേന്നവേലില്‍ ചന്ദ്രലാലിനെ (36) കൊലപ്പെടുത്തിയ കേസിലെ ഒന്നാം പ്രതിയായിരുന്നു വേണുഗോപാല്‍
തന്റെ ഭര്‍ത്താവിനെ കൊലചെയ്തയാളെ അതേ രീതിയില്‍ തന്നെ കൊല്ലുമെന്ന് കൊലചെയ്യപ്പെട്ട ഏമാച്ചന്റെ ഭാര്യ സ്മിത അന്നേ ഉറപ്പിച്ചിരുന്നു. തന്റെ ഭര്‍ത്താവിനെ നിഷ്ഠൂരമായി കൊലപ്പെടുത്തിയ സംഘത്തിലെ നേതാവിനെ ഒരു വര്‍ഷത്തിനകം അതേരീതിയില്‍ തന്നെ കൊലപ്പെടുത്തിയപ്പോള്‍ വിജയിച്ചത് സ്മിതയുടെ ദൃഢപ്രതിജ്ഞയാണ്. അതിന് വേണ്ടി ചരടുവലിച്ചത് സ്മിതയുടെ നേതൃത്വത്തിലായിരുന്നു. കലവൂരിലെ കുപ്രസിദ്ധമായിരുന്ന രണ്ട് ക്വട്ടേഷന്‍ സംഘത്തിലെ തലവന്മാരായിരുന്നു എമ്മാച്ചനും വേണുഗോപാലും. ഭര്‍ത്താവ് കൊലചെയ്യപ്പെട്ടതോടെ അതിന് കാരണക്കാരെ കൊലപ്പെടുത്താന്‍ സ്മിത തീരുമാനിക്കുകയായിരുന്നു. അതിനായി മാസങ്ങളോളം നീണ്ടു നിന്ന ആസൂത്രണത്തിനൊടുവിലാണ് വേണുഗോപാലിനെ കൊല്ലാനുള്ള പദ്ധതി നടപ്പിലാക്കിയത്. ഏമാച്ചന്റെ ഉറ്റ സഹൃത്തും കയര്‍ഫാക്ടറി ഉടമയുമായ ജയരാജാണ് സ്മിതയ്ക്ക് ക്വട്ടേഷന്‍ സംഘത്തെ ബന്ധപ്പെടുത്തിക്കൊടുത്തത്. വേണുഗോപലിന്റെ നീക്കങ്ങള്‍ മനസിലാക്കാനായി സ്മിത ചുമതലപ്പെടുത്തിയത് ബന്ധുക്കളായ സ്ത്രീകളെയാണ്.
കെ എസ്. ഇ. ബി. ജീവനക്കാരനായിരുന്ന ഭര്‍ത്താവിന്റെ ജോലി തനിക്ക് കിട്ടിയപ്പോഴും ജോലിയിലൂടെ ക്വട്ടേഷനുള്ള പണം സ്വരൂപിക്കുകയായരുന്നു സ്മിത ചെയ്തത്. നിരന്തരം നടന്ന ചര്‍ച്ചകളിലൂടെ കൊലപാതകത്തിന്റെ രൂപരേഖ തയ്യാറാക്കി. കൊല നടന്ന ദിവസം പുലര്‍ച്ചെ വേണുഗോപാലിന്റെ വീടിനുസമീപം താമസിക്കുന്ന ഭര്‍ത്താവിന്റെ അമ്മാവന്റെ മക്കളായ രജനി, ഗിരിജ തുടങ്ങിയവരെ വിവരങ്ങള്‍ കൃത്യമായി നല്‍കാനായി സ്മിത ഏര്‍പ്പാടു ചെയ്തു. ഈ വിവരങ്ങളുടെ അടിസ്ഥാനത്തിലാണ് കൊലപാതകം നടത്തിയത്.
സ്മിതയുടെ ബന്ധുക്കളായ മണ്ണഞ്ചേരി 23ാം വാര്‍ഡില്‍ പുതുവല്‍വെളി വീട്ടില്‍ രജനി (33), പുതുവല്‍ ഗിരിജ (42), ഗിരിജയുടെ മകള്‍ രേഷ്മ (18) എന്നിവരെയാണ് മാരാരിക്കുളം സിഐ കെ.ജി. അനീഷും സംഘവും അറസ്റ്റ് ചെയ്തത്. എമ്മാച്ചന്റെ ഭാര്യ സ്മിതയുടെ നീക്കങ്ങള്‍ സംഭവംകഴിഞ്ഞനാള്‍ മുതല്‍ പൊലീസ് നിരീക്ഷിച്ച് വരികയായിരുന്നു. കഴിഞ്ഞ 13 മാസത്തിനുള്ളില്‍ ഇവര്‍ 15 മൊബൈല്‍ ഫോണ്‍ സിമ്മുകള്‍ ഉപയോഗിച്ചിരുന്നതായും കണ്ടെത്തിയിട്ടുണ്ട്. ഇതോടെ വേണുഗോപാല്‍ വധക്കേസില്‍ പിടിയിലായവരുടെ എണ്ണം ഒമ്പതായി. ഇനി പത്തോളംപേര്‍ കൂടി ബാക്കിയുണ്ടെന്നും പൊലീസ് വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha