തിരുവല്ല നഗരസഭ, ശബരിമല ഇടത്താവളത്തിനായി അനുവദിച്ച ഗ്രാന്റ് വകമാറ്റി; അയ്യപ്പ ഭക്തരുടെ പ്രതിഷേധം
കാല്നൂറ്റാണ്ട് കാലമായി തിരുവല്ലാനഗരസഭാ മൈതാനിയില് മണ്ഡലകാലാരംഭം മുതല് പ്രവര്ത്തിച്ചിരുന്ന ശബരിമല ഇടത്താവളത്തിനായി സര്ക്കാര് നല്കിവന്നിരുന്ന ഗ്രാന്റ് ഇക്കുറി കൈമാറേണ്ടതില്ലെന്ന ചൊവ്വാഴ്ചത്തെ നഗരസഭാ കൗണ്സില് തീരുമാനത്തിനെതിരെ പ്രതിക്ഷേധം ശക്തമാകുന്നു. ഇടത്താവളത്തിനായുള്ള ഫണ്ട് വകമാറ്റുന്നതില് പ്രതിക്ഷേധവുമായി അയ്യപ്പധര്മ പരിഷത്തും മറ്റ് ഹൈന്ദവ സംഘടനകളും രംഗത്തെത്തി.
ഇടത്താവളത്തിനായി സര്ക്കാര് നല്കുന്ന ഗ്രാന്റ് വഴിവിളക്കിന്റേതടക്കമുള്ള അറ്റകുറ്റപ്പണികള്ക്കും വഴിവക്കിലെ കാട് വെട്ടിത്തെളിക്കുന്നതിനുമായി വിനിയോഗിക്കാനാണ് കൗണ്സില് തീരുമാനം. കാല്നൂറ്റാണ്ടായി മണ്ഡല കാലാരംഭം മുതല് മകരവിളക്ക് വരെ നഗരസഭാ മൈതാനിയില് പ്രവര്ത്തിച്ചിരുന്ന ഇടത്താവളത്തിനുള്ള അനുമതി ഒറ്റ രാത്രി കൊണ്ട് നഗരസഭയിലെ ചിലരുടെ വ്യക്തി താത്പര്യം മൂലം തകിടം മറിച്ചതായാണ് അയ്യപ്പ ഭക്തരുടെ ആരോപണം.
ഇടത്താവളത്തിനുള്ള സ്ഥലം സൗജന്യമായി വിട്ടു നല്കിയിട്ട് നടത്തിപ്പ്, സംഘടനകളെ ഏല്പിക്കാനുമാണ് നീക്കം. പന്തല്, ഭക്ഷണം , ശൗചാലയം എന്നിവ അടക്കമുള്ള കാര്യങ്ങള് ഇടത്താവള നടത്തിപ്പുകാര് സ്വയം വഹിക്കണമെന്നതാണ് നഗരസഭ മുന്നോട്ടു വയ്ക്കുന്ന നിര്ദേശം. കഴിഞ്ഞ വര്ഷം വരെ നഗരസഭാ മൈതാനിയില് പ്രവര്ത്തിച്ചിരുന്ന ഇടത്താവളം നഗരസഭയുടെ തന്നെ ഉടമസ്ഥതയിലുള്ള ഓപ്പണ് സ്റ്റേജിലേക്ക് മാറ്റാന് കഴിഞ്ഞ ദിവസം കൗണ്സില് തീരുമാനിച്ചിരുന്നു.
തീര്ഥാടനം നടക്കുന്ന രണ്ടു മാസത്തേക്ക് ഓപ്പണ് സ്റ്റേജ് മറ്റാവശ്യങ്ങള്ക്കായി വിട്ടു നല്കില്ലെന്ന് നഗരസഭാ ചെയര്മാന് ചെറിയാന് പോളച്ചിറയ്ക്കല് ഉറപ്പു നല്കിയിട്ടുണ്ട്. . സ്ഥിരം ഇടത്താവളം നിര്മിക്കുമെന്ന നഗരസഭാ അധികൃതര് കാലങ്ങളായി നടത്തി വരുന്ന വാഗ്ദാനങ്ങള് നാളിതു വരെയായും പാലിക്കപ്പെട്ടിട്ടില്ല. കഴിഞ്ഞ നഗരസഭാ ബജറ്റിലും ഇതുമായി ബന്ധപ്പെട്ട് പ്രഖ്യാപനമുണ്ടായിരുന്നു.
എന്നാല് ഇടത്താവളം തുടങ്ങിയ കാലം മുതല് അതിനെ ഇല്ലാതാക്കാനും സ്ഥിരം ഇടത്താവളം നിര്മിക്കുന്നതിനെതിരെയും നടത്തുന്ന ബോധപൂര്വമായ ശ്രമങ്ങളുടെ ഭാഗമായാണ് ഗ്രാന്റ് തടയപ്പെടുന്നതടക്കമുള്ള തരത്തിലേക്ക് കാര്യങ്ങള് എത്തിച്ചതെന്നാണ് അയ്യപ്പധര്മ പരിഷത്ത് ജില്ലാ പ്രസിഡന്റ് ലാല് നന്ദാവനവും ഹൈന്ദവ സംഘടനാ നേതാക്കളും പറയുന്നത്.
https://www.facebook.com/Malayalivartha
