മാനസികാസ്വാസ്ഥ്യമുള്ളവര് പൊതു ഡ്യൂട്ടിയില് വേണ്ടെന്ന് അഡീഷണല് കമ്മീഷണറുടെ നിര്ദ്ദേശം
മാനസികരോഗമുള്ള വനിതാ പോലീസുകാരി മാധ്യമപ്രവര്ത്തകനെ കൈയേറ്റം ചെയ്ത സംഭവത്തിന്റെ പശ്ചാത്തലത്തില് പൊതുജനങ്ങളുമായി ബന്ധപ്പെടുന്ന ഡ്യൂട്ടിയില് മാനസികാസ്വസ്ഥ്യം പ്രകടിപ്പിക്കുന്നവരെ നിയോഗിക്കരുതെന്ന് സ്റ്റേഷന് ഹൗസ് ഓഫീസര്മാര്ക്ക് തിരുവനന്തപുരം അഡീഷണല് കമ്മീഷണര് ഹര്ഷിത അത്തല്ലൂരി നിര്ദേശം നല്കി. ഔദ്യോഗിക കൃത്യനിര്വ്വഹണത്തിനിടെ പോലീസുകാര് പൊതുജനങ്ങളോട് മാന്യമായി പെരുമാറണമെന്നും നിഷ്കര്ഷിച്ചിട്ടുണ്ട്.
നിയമസഭയ്ക്ക് മുന്നില് ഡ്യൂട്ടിയ്ക്കിടെയാണ് മാധ്യമപ്രവര്ത്തകനെ വനിത പോലീസുകാരി കഴിഞ്ഞ ദിവസം കൈയേറ്റം ചെയ്തത്. പോലീസുകാരി മാനസികാസ്വസ്ഥ്യം പ്രകടിപ്പിച്ചിരുന്നുവെന്ന് നേരത്തെ പോലീസ് വ്യക്തമാക്കിയിരുന്നു. അസുഖത്തെ തുടര്ന്ന് ഏറെ നാളായി ഇവര് ചികിത്സയിലായിരുന്നു. എന്നാല് തിരികെ പ്രവേശിപ്പിച്ചപ്പോള് പ്രശ്നങ്ങളൊന്നും ഇല്ലാതിരുന്നതിനാലാണ് നിയമസഭയ്ക്ക് മുന്നില് ഡ്യൂട്ടിക്ക് നിയോഗിച്ചതെന്നും കമ്മീഷണര് ഓഫീസ് വ്യക്തമാക്കി.
മുന് മുഖ്യമന്ത്രി ആര്.ശങ്കറിന്റെ ചരമവാര്ഷിക ദിനാചരണ പരിപാടി റിപ്പോര്ട്ട് ചെയ്യാന് എത്തിയതിനിടെയാണ് ക്യാമറമാനെ പോലീസുകാരി കയ്യേറ്റം ചെയ്യാന് ശ്രമിച്ചത്. മാനസിക അസ്വാസ്ഥ്യം പ്രകടിപ്പിച്ചതിനെ തുടര്ന്ന് പോലീസുകാരിയെ ആശുപത്രിയില് എത്തിച്ചുവെന്ന് കമ്മീഷണര് ഓഫീസ് അറിയിച്ചു.
https://www.facebook.com/Malayalivartha
