സിപിഎം സംസ്ഥാന സെക്രട്ടറിയാകാന്‍ പാര്‍ട്ടിയ്ക്കുള്ളില്‍ മത്സരം ശക്തം. പാര്‍ട്ടി പോളിറ്റ് ബ്യൂറോ അംഗം കോടിയേരി ബാലകൃഷ്ണനും കേന്ദ്ര കമ്മിറ്റി അംഗം ഇ.പി ജയരാജനും തമ്മിലാണു ശക്തമായ മത്സരം നടക്കുന്നത്. കോടിയേരിയും ഇ.പിയും കണ്ണൂര്‍കാരാണെങ്കിലും കണ്ണൂര്‍ ലോബിയുടെ പിന്തുണ കോടിയേരിക്കില്ല. നേരത്തെ തന്നെ കണ്ണൂര്‍ ജില്ലാ സെക്രട്ടറി പി.ജയരാജനടക്കമുള്ളവരുമായി കോടിയേരി അത്ര രസത്തിലല്ല. ഇതു സമ്മേളനത്തില്‍ പ്രതിഫലിക്കുമെന്ന് ഉറപ്പാണ്.
പിബി അംഗവും പ്രതിപക്ഷ ഉപനേതാവുമായ കോടിയേരി സെക്രട്ടറിയാകുമെന്ന് ഏതാണ്ട് ഉറപ്പായിരുന്നു. ഇതിനിടെയാണു ശക്തമായ മത്സര നീക്കവുമായി ഇ.പി.ജയരാജനു വേണ്ടി കണ്ണൂര്‍ ലോബി രംഗപ്രവേശനം ചെയ്തിരിക്കുന്നത്. പിബി അംഗങ്ങളാരും സെക്രട്ടറിയാകേണ്ടെന്ന നിലപാടാണ് ഇവര്‍ മുന്നോട്ടുവച്ചിരിക്കുന്നത്. മത്സരം കടുക്കുകയാണെങ്കില്‍ എം.എ.ബേബി സമവായത്തിലൂടെ സെക്രട്ടറിയാകാനുള്ള സാധ്യത അടയ്ക്കാന്‍ കൂടിയാണ് ഈ നീക്കം.
കോടിയേരിയെ സെക്രട്ടറിയാക്കണമെന്ന അഭിപ്രായത്തിനാണു പാര്‍ട്ടിയില്‍ ഇപ്പോഴും മുന്‍തൂക്കം. എന്നാല്‍ പാര്‍ട്ടിയില്‍ നിര്‍ണായക സ്വാധീനമുള്ള കണ്ണൂര്‍ ലോബി തങ്ങളുടെ ഇംഗിതം നടപ്പിലാക്കാന്‍ ശക്തമായി രംഗത്തിറങ്ങുമെന്നു മുന്‍ സമ്മേളനങ്ങള്‍ തെളിയിച്ചതാണ്. ഈ സമ്മേളനത്തിലും ഇതുണ്ടാകുമെന്ന് ഉറപ്പാണ്. ദേശാഭിമാനി ബോണ്ട് വിവാദം മുതല്‍ ദേശാഭിമാനിയുടെ സ്ഥലം വിവാദ വ്യവസായി ചാക്ക് രാധാകൃഷ്ണനു വിറ്റതടക്കമുള്ള കാര്യങ്ങള്‍ ചൂണ്ടിക്കാട്ടി ജയരാജന്റെ സെക്രട്ടറി സ്ഥാനത്തേക്കുള്ള വരവിനെ പ്രതിരോധിക്കാന്‍ കോടിയേരി അനുകൂലികളും ശ്രമിക്കുന്നുണ്ട്. പിണറായിയുമായി ഏറെ അടുപ്പം സൂക്ഷിക്കുന്ന ഇ.പിയെ സ്ഥാനമൊഴിയുന്ന പിണറായി സെക്രട്ടറി സ്ഥാനത്തേക്കു കൊണ്ടുവരാന്‍ എന്തെങ്കിലും നീക്കം നടത്തുമോയെന്നു കണ്ടറിയേണ്ടതുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha