പിണറായിക്കെതിരെ ആഞ്ഞടിച്ച് വിഎസ് തന്റെ വിയോചന കുറിപ്പ് കേന്ദ്രനേതൃത്വത്തിന് അയച്ചുകൊടുത്തു. ഇതില്‍ സെക്രട്ടറി എന്ന നിലയിലുള്ള പിണറായുടെ പ്രവര്‍ത്തനത്തെ രൂക്ഷമായാണ് വിഎസ് വിമര്‍ശിച്ചിരിക്കുന്നത്. ടിപി വധവും,സോളാര്‍ സമരവും, കഴിഞ്ഞ നിയമസഭാ, ലോകസഭാ തിരഞ്ഞെടുപ്പുകളിലെ പിണറായിയുടെ ഒറ്റയാള്‍ തീരുമാനങ്ങള്‍ പാര്‍ട്ടിയെ പിന്നോട്ട് നയച്ചതായും വിഎസ് പറുയുന്നുണ്ട്.
പാര്‍ട്ടി വിട്ടുപോകുന്നവരെ വകവരുത്തുകയെന്നതു പാര്‍ട്ടി നയമാണോയെന്നു പരിശോധിക്കണമെന്നും വിഎസ് ആവശ്യപ്പെടുന്നു. ടി.പി. ചന്ദ്രശേഖരന്‍ വധക്കേസിലെ പ്രതികളായ സിപിഎം പാനൂര്‍ ഏരിയാ കമ്മിറ്റി അംഗം പി.കെ. കുഞ്ഞനന്തനും മനോജും വായ് തുറക്കുന്നതിനെ ഭയന്നിട്ടാണ് പാര്‍ട്ടി സെക്രട്ടറി പിണറായി വിജയന്‍ അവരെ ന്യായീകരിക്കുന്നതെന്ന് വി.എസിന്റെ ബദല്‍ക്കുറുപ്പില്‍ പറയുന്നുണ്ട്.
കഴിഞ്ഞ നിയമസഭാ തിരഞ്ഞെടുപ്പിന്റെ പ്രചാരണകാലത്ത് വിഎസിന്റെ ചിത്രം ഫെളക്‌സ് ബോര്‍ഡുകളില്‍ ഉള്‍പ്പെടുത്തിയതിനെ പിണറായി ചോദ്യം ചെയ്തിരുന്നു. അതിലൂടെ പിണറായി തുടങ്ങിവച്ച വിവാദവും തിരഞ്ഞെടുപ്പില്‍ എല്‍ഡിഎഫിനു ഭൂരിപക്ഷം കിട്ടാതിരിക്കാന്‍ കാരണമായെന്നു വിഎസ് ആരോപിക്കുന്നു. പിണറായിയുടെ വിവാദ പ്രസ്താവനയും അതിനു പാര്‍ട്ടി കൊടുക്കേണ്ടിവന്ന വിലയും പരിശോധിക്കണം.
അച്ചടക്കമെന്നാല്‍ ആരോടും ആലോചിക്കാതെയുള്ള തീരുമാനങ്ങള്‍ക്ക് \'ആമേന്‍ പറയുകയെന്നാണ് പിണറായിയുടെ വിചാരം. ആരോടും ആലോചിക്കാതെയുള്ള തീരുമാനത്തിന് ഉദാഹരണമായി വിഎസ് എടുത്തുകാട്ടുന്നത് സോളര്‍ വിഷയത്തില്‍ ഇടതു പാര്‍ട്ടികള്‍ നടത്തിയ സെക്രട്ടേറിയറ്റ് ഉപരോധമാണ്. എന്തിനാണ് സമരം തിടുക്കത്തില്‍ പിന്‍വലിച്ചത് എന്നതിന്റെ സത്യം സഖാക്കളോടു വെളിപ്പെടുത്തണമെന്നു വിഎസ് ആവശ്യപ്പെടുന്നു.
ലോക്‌സഭാ തിരഞ്ഞെടുപ്പില്‍ ആര്‍എസ്പിക്കു സീറ്റു നല്‍കാതിരുന്നതിനു പിണറായി പറഞ്ഞ കാരണങ്ങള്‍ അടിസ്ഥാനമില്ലാത്തതാണെന്നു വിഎസ് ആരോപിക്കുന്നു. സഖ്യകക്ഷികളെ ഒന്നൊന്നായി ഒഴിവാക്കി വലതുപക്ഷക്കാരെയും അഴിമതിക്കാരെയും വര്‍ഗീയ പാര്‍ട്ടികളെയും കൂടെക്കൂട്ടുകയെന്ന തികഞ്ഞ വലതുപക്ഷ വ്യതിയാനമാണ് പിണറായി കാട്ടുന്നത്. പാര്‍ട്ടി കമ്മിറ്റികള്‍ രൂപീകരിച്ചത് വിഭാഗീയ രീതിയിലാണെന്ന് ആരോപിക്കുന്ന വിഎസ്, സംസ്ഥാന സമിതിയില്‍ നിന്നു തരംതാഴ്ത്തപ്പെട്ട ടി. ശശിധരന്‍, എന്‍.എന്‍.കൃഷ്ണദാസ്, സി.കെ. പത്മനാഭന്‍ എന്നിവരെ തിരിച്ചെടുക്കണമെന്നും ആവശ്യപ്പെടുന്നു.
പാര്‍ട്ടിയിലെ സഖാക്കളോടു പെരുമാറുമ്പോഴുള്ള സ്വേച്ഛാധിപത്യ രീതിയും അഹങ്കാരവുമാണ് ഇടതുപക്ഷത്തെ സഖ്യകക്ഷികളോടും പിണറായിക്കുള്ളതെന്നും ആലപ്പുഴ സമ്മേളനത്തില്‍ അവതരിപ്പിക്കാനുള്ള സംഘടനാ റിപ്പോര്‍ട്ടിനു ബദലായി വിഎസ് തയാറാക്കിയ കുറിപ്പില്‍ ആരോപിക്കുന്നു.
സംസ്ഥാനത്ത് തള്ളപ്പെട്ട കുറിപ്പിന്റെ പരിഭാഷ വിഎസ് കഴിഞ്ഞ ദിവസം പാര്‍ട്ടി ജനറല്‍ സെക്രട്ടറി പ്രകാശ് കാരാട്ടിനു നല്‍കി. ടിപി വധം, ആര്‍എസ്പിക്കു സീറ്റു നിഷേധിച്ചത്, സെക്രട്ടേറിയറ്റ് ഉപരോധം തുടങ്ങിയ കാര്യങ്ങളില്‍ പാര്‍ട്ടിയുടെ പ്രഖ്യാപിത നിലപാടുകളെ ചോദ്യം ചെയ്യുന്ന വിഎസ്, എല്ലാ വിഷയങ്ങളിലും പിണറായിയെയാണ് പ്രതിക്കൂട്ടില്‍ നിര്‍ത്തുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha