പരസ്പരം വെട്ടാന്‍ കാനം രാജേന്ദ്രനും കെ.ഇ ഇസ്മായിലും
പരസ്പരം പടവെട്ടി സംസ്ഥാന സെക്രട്ടറിയാകാന്‍ കാനംരാജേന്ദ്രനും കെ.ഇ ഇസ്മായിലും. സി.പി.ഐ ജില്ലാ സമ്മേളനങ്ങള്‍ അന്തിമഘട്ടത്തിലേക്ക് നീങ്ങുമ്പോഴാണ് പോര് മുറുകുന്നത്. സംസ്ഥാന നേതൃത്വം പിടിച്ചെടുക്കാന്‍ പെയ്‌മെന്റ് സീറ്റ് വിവാദം പാര്‍ട്ടിയിലെ വിവിധ വിഭാഗങ്ങള്‍ ജില്ലാ സമ്മേളനങ്ങളില്‍ ആയുധമാക്കുന്നുണ്ട്. കോട്ടയത്ത് നടക്കുന്ന സംസ്ഥാന സമ്മേളനത്തോടെ സെക്രട്ടറി സ്ഥാനം ഒഴിയുമെന്ന് പന്ന്യന്‍ രവീന്ദ്രന്‍ പ്രഖ്യാപിച്ചതോടെയാണ് ഈ കസേര ലക്ഷ്യമിട്ട് വിവിധ വിഭാഗങ്ങള്‍ കരുനീക്കം ആരംഭിച്ചത്.
ദേശീയ നിര്‍വാഹക സമിതി അംഗവും എ.ഐ.ടി.യു.സി സംസ്ഥാന പ്രസിഡന്റുമായ കാനംരാജേന്ദ്രന്‍, മറ്റൊരു ദേശീയ നിര്‍വാഹകസമിതി അംഗം കെ.ഇ ഇസ്മയില്‍ എന്നിവര്‍ സെക്രട്ടറിയാകേണ്ട സി.ദിവാകരെ പേമന്റ് വിവാദത്തിലൂടെ വെട്ടിനിരത്തി. മത്സരാന്തരീക്ഷമുണ്ടായാല്‍ ഒത്തുതീര്‍പ്പെന്ന നിലക്ക് സംസ്ഥാന സെക്രട്ടറിയാകാന്‍ ബിനോയ് വിശ്വവും പ്രകാശ് ബാബുവും ശ്രമം നടത്തുന്നുണ്ട്. പെയ്‌മെന്റ് സീറ്റ് വിവാദം അന്വേഷിച്ച പാര്‍ട്ടി കമ്മീഷന്‍ റിപ്പോര്‍ട്ട് പാര്‍ട്ടിക്കുള്ളിലെ ചര്‍ച്ചകള്‍ക്കും സംഘടനാ നടപടികള്‍ക്കും ശേഷം നശിപ്പിച്ചുവെന്ന് നേതൃത്വം പരസ്യമായി പറഞ്ഞിരുന്നു. എന്നാല്‍, ഈ റിപ്പോര്‍ട്ട് സംബന്ധിച്ച വിശദാംശം സംസ്ഥാന സമ്മേളന റിപ്പോര്‍ട്ടില്‍ ഉള്‍പ്പെടുത്തേണ്ടിവരുമെന്നാണ് ജില്ലാ സമ്മേളന ചര്‍ച്ചകള്‍ നല്‍കുന്ന സൂചന.
ജില്ലാ സമ്മേളനങ്ങളില്‍ നേതൃത്വത്തിനെ ലക്ഷ്യമിട്ട് കടുത്ത വിമര്‍ശനമാണ് ഉയരുന്നത്. സി.പി.എമ്മിന്റെ സി.പി. ഐ വിരുദ്ധ നീക്കങ്ങളെ ഒറ്റക്കെട്ടായി ചെറുക്കുന്നതില്‍ സംസ്ഥാന നേതൃത്വത്തിനുണ്ടാകുന്ന വീഴ്ചയും സി.പി.എമ്മിന്റെ താല്‍പ്പര്യങ്ങള്‍ക്കനുസരിച്ച് സി.പി.ഐ നിലപാടെടുക്കുന്നു തുടങ്ങിയ ആരോപണങ്ങളും ശക്തമായി തന്നെ അംഗങ്ങള്‍ ഉയര്‍ത്തിക്കാട്ടി. തിരുവനന്തപുരത്തെ സ്ഥാനാര്‍ത്ഥി നിര്‍ണയം പാളിയതിന്റെ യഥാര്‍ത്ഥ കാരണം സി.പി.എമ്മിന്റെ സമ്മര്‍ദത്തിന് സി.പി.ഐ വഴങ്ങിയതാണെന്ന വാദവും ഉയര്‍ന്നിട്ടുണ്ട്. ഈ മാസം 27, 28, മാര്‍ച്ച് ഒന്ന്, രണ്ട് തിയതികളില്‍ കോട്ടയത്ത് നടക്കുന്ന സംസ്ഥാന സമ്മേളനത്തില്‍ അവതരിപ്പിക്കേണ്ട പ്രവര്‍ത്തന റിപ്പോര്‍ട്ടും സംഘടനാ റിപ്പോര്‍ട്ടും തയാറാക്കുന്നതിനായി 23, 24 തിയതികളില്‍ സംസ്ഥാന സെക്രട്ടറിയേറ്റ്, എക്‌സിക്യൂട്ടീവ്, കൗണ്‍സില്‍ യോഗങ്ങള്‍ ചേരുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
