അലക്‌സാണ്ടര്‍ ജേക്കബിനെ സംസ്ഥാന പോലീസ് മേധാവിയാക്കിയേക്കും. സര്‍ക്കാര്‍ തലത്തില്‍ ഇത്തരമൊരു ആലോചന സജീവമല്ലെങ്കിലും മുഖ്യമന്ത്രി ഉമ്മന്‍ചാണ്ടിക്ക് ഇതിനോട് യോജിപ്പാണുള്ളത്. തിരുവഞ്ചൂര്‍ രാധാകൃഷ്ണന്‍ ആഭ്യന്തരമന്ത്രിയായിരിക്കെയാണ് ജയില്‍വകുപ്പില്‍ നിന്നും അലക്‌സാണ്ടര്‍ ജേക്കബിനെ മാറ്റിയത്. അതു കൊണ്ടു തന്നെ അലക്‌സാണ്ടര്‍ ജേക്കബിനു സംസ്ഥാന പോലീസ് മേധാവിയാക്കാന്‍ രമേശ് ചെന്നിത്തല തടസ്സം നില്‍ക്കില്ലെന്ന് ഉമ്മന്‍ചാണ്ടി കരുതുന്നു.
മേയിലാണ് സംസ്ഥാന പോലീസ് മേധാവി കെഎസ് ബാല സുബ്രഹ്മണ്യം വിരമിക്കുന്നത്. ബാലസുബ്രഹ്മണ്യം കഴിഞ്ഞാല്‍ സീനിയര്‍ അലക്‌സാണ്ടര്‍ ജേക്കബാണ്. അതു കഴിഞ്ഞാല്‍ സെന്‍കുമാറും മഹേഷ്‌കുമാര്‍ സിംഗ്ലയുമാണ് സീനിയര്‍മാര്‍. സിംഗ്ല കേന്ദ്ര ഡപ്യൂട്ടേഷനിലാണ്. സിംഗ്ല നിലവില്‍ ബി.എസ്.എഫ് അഡീഷണല്‍ ഡയറക്ടര്‍ ജനറലാണ്. 2017 വരെ അദ്ദേഹത്തിന് സേവന കാലാവധിയുണ്ട്. അദ്ദേഹം തിരിച്ചെത്താന്‍ താല്പര്യം പ്രകടിപ്പിച്ചതായാണ് റിപ്പോര്‍ട്ട്.
സിംഗ്ല മടങ്ങി വരികയാണെങ്കില്‍ സെന്‍കുമാര്‍ പോലീസ് മേധാവിയാവാനുള്ള സാധ്യത മങ്ങും. സെന്‍കുമാര്‍ മികച്ച സര്‍വീസ് റെക്കോര്‍ഡുള്ള വ്യക്തിയാണ്. അലക്‌സാണ്ടര്‍ ജേക്കബിന് സര്‍വ്വീസില്‍ നിന്നും വിരമിക്കാന്‍ ചുരുങ്ങിയ മാസങ്ങള്‍ മാത്രമാണുള്ളത്. അദ്ദേഹത്തിന് സര്‍വ്വീസില്‍ നല്ല മതിപ്പുണ്ട്. അങ്ങനെയുള്ളൊരാള്‍ ഡിജിപിയാകുന്നത് കേരള പോലീസ് നേട്ടമാകുമെന്നാണ് വിലയിരുത്തല്‍. ഉമ്മന്‍ചാണ്ടിക്ക് അലക്‌സാണ്ടര്‍ ജേക്കബുമായി നല്ല ബന്ധമുണ്ട്. ക്രിസ്ത്യന്‍ മിഷനറിമാരുടെ പിന്തുണയും അലക്‌സാണ്ടര്‍ ജേക്കബിനുണ്ട്. എന്നാല്‍ അദ്ദേഹം, തന്നെ സംസ്ഥാന പോലീസ് മേധാവിയാക്കണമെന്ന് ആവശ്യപ്പെട്ട് ആരുടെയും പുറകെ നടക്കില്ല. ഡിജിപിയാകണമെന്ന ആഗ്രഹവും അദ്ദേഹത്തിനില്ല.
ജയില്‍ മേധാവിയായിരിക്കെ അദ്ദേഹം നടത്തിയ ചില നിരീക്ഷണങ്ങളാണ് തിരുവഞ്ചൂരിന് ഹിതകരമല്ലാതായി മാറിയത്. ടി.പി. ചന്ദ്രശേഖരന്‍ വധക്കേസിലെ പ്രതികള്‍ ഫേസ്ബുക്ക് പോസ്റ്റിംഗ് നടത്തിയപ്പോള്‍ അത് സാങ്കേതിക വിദ്യയുടെ സഹായത്തോടെ തെളിയിക്കണമെന്നാണ് അദ്ദേഹം പറഞ്ഞത്. എന്നാല്‍ ഇത് തെറ്റിദ്ധരിക്കപ്പെട്ടു. അദ്ദേഹം ടി.പി കേസ് പ്രതികള്‍ക്ക് വേണ്ടി വാദിച്ചു എന്ന വ്യാഖ്യാനമുണ്ടായി. അങ്ങനെയാണ് ജയില്‍മേധാവി സ്ഥാനത്ത് നിന്നും നീക്കിയത്.
പോലീസിലെ പണ്ഡിതന്‍ എന്നാണ് അലക്‌സാണ്ടര്‍ ജേക്കബ് അറിയപ്പെടുന്നത്. ജയില്‍മേധാവിയായിരിക്കെ ചപ്പാത്തി നിര്‍മ്മാണം ആരംഭിച്ചത് അദ്ദേഹമാണ്. ജയില്‍ പുള്ളികളുടെ മാനസാന്തരത്തിന് വേണ്ടി നടത്തിയ ശ്രമങ്ങള്‍ പരക്കെ പ്രകീര്‍ത്തിക്കപ്പെട്ടു. ഇപ്പോള്‍ കേരള പോലീസ് കണ്‍സ്ട്രക്ഷന്‍ കോര്‍പ്പറേഷന്റെ എം.ഡിയാണ്. താരതമ്യേന ചെറിയ തസ്തികയാണ് ഇത്. സര്‍ക്കാരിന് പ്രതിപത്തിയില്ലാത്തവരെയാണ് ഇത്തരം തസ്തികകളില്‍ നിയമിക്കാറുള്ളത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha