നാളെ ആലപ്പുഴയില്‍ തുടങ്ങുന്ന സംസ്ഥാനസമ്മേളനത്തില്‍ പോളിറ്റ് ബ്യൂറോ അംഗം സീതാറാം യച്ചൂരിയുടെ ബദല്‍ നിര്‍ദ്ദേശങ്ങള്‍ നടപ്പാകാന്‍ സാധ്യത. പാര്‍ട്ടി പ്രവര്‍ത്തകര്‍ക്ക് മാസശമ്പളമായി 15000 രൂപ നല്‍കണമെന്നാണ് യച്ചൂരിയുടെ നിര്‍ദ്ദേശം. ഈ നിര്‍ദ്ദേശം ഈ സമ്മേളനത്തില്‍ നടപ്പാകുമെന്നും സൂചനയുണ്ട്.
യച്ചൂരി തിരുത്ത് നിര്‍ദ്ദേശിച്ച് നല്‍കിയ കുറിപ്പിലാണ് ഈ നിര്‍ദ്ദേശം മുന്നോട്ട് വയ്ക്കുന്നത്. മിനിമം കൂലി സഖാക്കള്‍ക്കും പാര്‍ട്ടി നല്‍കണമെന്നാണ് ആവശ്യം. അവിദഗ്ദ്ധ തൊഴിലാളികള്‍ക്ക് സിഐടി.യു ആവശ്യപ്പെടുന്ന മിനിമം കൂലിയായ 15000 രൂപയും ഡി.എയും മുഴുവന്‍ സമയ സഖാക്കള്‍ക്ക് നല്‍കണം. ലോക്കല്‍ കമ്മറ്റി മുതല്‍ പി.ബി വരെയുള്ള മുഴുവന്‍ സമയ പ്രവര്‍ത്തകര്‍ക്ക് 3000 മുതല്‍ 7000 രൂപ വരെയാണ് നല്‍കുന്നത്. ഈ തുക കൊണ്ട് കുടുംബം പുലര്‍ത്താനാവില്ല. മറ്റു പ്രലോഭനങ്ങളിലേക്ക് പാര്‍ട്ടി അംഗങ്ങള്‍ വീഴാതിരിക്കാന്‍ ഇതാവശ്യമാണ്.ഈ നിര്‍ദ്ദേശം കോഴിക്കോട് പാര്‍ട്ടി കോണ്‍ഗ്രസ് അംഗീകരിച്ചതാണെങ്കിലും നടപ്പാക്കിയിട്ടില്ല. സഖാക്കളുടെ വരുമാനം ഉയര്‍ത്തുന്നതിലൂടെ മുഴുവന്‍ സമയ പ്രവര്‍ത്തനം യാഥാര്‍ത്ഥ്യമാകും. ജീവിത പ്രാരാബ്ധങ്ങള്‍ മൂലം പല നേതാക്കളും മറ്റ് ഇടപാടുകള്‍ക്ക് സമയം ചെലവഴിക്കുന്നുണ്ട്. ഇത് സംഘടനയ്ക്ക് ദോഷം ചെയ്യുന്നുണ്ട്. ഈ സാഹചര്യത്തിലാണ് നിര്‍ദ്ദേശങ്ങള്‍. സംഘടനാ ദൗര്‍ബല്യങ്ങള്‍ തിരുത്താന്‍ പാര്‍ട്ടി കോണ്‍ഗ്രസിനു ശേഷം പ്ലീനം വിളിക്കാന്‍ തീരുമാനിച്ചത് യെച്ചൂരിയുടെ ആവശ്യ പ്രകാരമാണ്. എന്നാല്‍ തീരുമാനങ്ങള്‍ വേണ്ടത്ര കാര്യക്ഷ്മമായി നടപ്പായില്ല. ഈ സാഹചര്യത്തിലാണ് വീണ്ടും ഇവ ഉയര്‍ത്തുന്നത്.
ശാസ്ത്രീയ വിദ്യാഭ്യാസം പ്രചരിപ്പിക്കാന്‍ പാര്‍ട്ടി സ്‌കൂളുകള്‍ തുടങ്ങണമെന്നതാണ് യെച്ചൂരിയുടെ മറ്റൊരു നിര്‍ദ്ദേശം. ആര്‍.എസ്.എസ് സ്വന്തം വിദ്യാഭ്യാസ സ്ഥാപനങ്ങളിലൂടെ ആശയപ്രചരണം നടത്തുന്നത് യെച്ചൂരി ചൂണ്ടിക്കാട്ടുന്നു. മൂന്ന് ടേം പൂര്‍ത്തിയാക്കുന്നതിനാല്‍ ഈ പാര്‍ട്ടി കോണ്‍ഗ്രസോടെ പ്രകാശ് കാരാട്ട് സ്ഥാനം ഒഴിയും. ഈ സാഹചര്യത്തില്‍ അടുത്ത ജനറല്‍ സെക്രട്ടറിയാവുമെന്ന് പ്രതീക്ഷിക്കുന്ന യെച്ചൂരിയുടെ നിര്‍ദ്ദേശങ്ങള്‍ നാളെ ആലപ്പുഴയില്‍ തുടങ്ങുന്ന സംസ്ഥാന സമ്മേളനവും ഗൗരവത്തോടെ ചര്‍ച്ചയായേക്കും.
സംസ്ഥാന നേതൃത്വത്തിനോട് പ്രകാശ് കാരാട്ടിനോടാണ് താല്‍പ്പര്യമെങ്കിലും യച്ചൂരിയുടെ വേതന പരിഷ്‌കരണം അടക്കമുള്ള ആവശ്യങ്ങളെ എല്ലാവരും അനുകൂലിക്കുമെന്നാണ് സൂചന. ഇതോടെ സര്‍ക്കാര്‍ ജോലിക്ക് തുല്യമായ നിലയിലേക്ക് പാര്‍ട്ടി പ്രവര്‍ത്തനം മാറുമെന്ന വിമര്‍ശനവും ഉണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha