താന് കയ്യേറ്റക്കാരനല്ലെന്ന് യൂസഫലി: ബോള്ഗാട്ടി പദ്ധതിയില് നിന്നും പിന്മാറി
കൊച്ചിയില് ആരംഭിക്കാനിരുന്ന ബോള്ഗാട്ടി കണ്വെന്ഷന് സെന്റര് പദ്ധതിയില് നിന്ന് വ്യവസായി എം.എ യൂസഫലി പിന്മാറി. ലുലു മാള് നിര്മാണവുമായി ബന്ധപ്പെട്ട വിവാദത്തില് സി.പി.എം തങ്ങളെ വലിച്ചിഴച്ചതില് ദു:ഖമുണ്ടെന്നും, എല്ലാ അനുമതിയും വാങ്ങിയ ശേഷമാണ് മാള് ആരംഭിച്ചതെന്നും യൂസഫലി വ്യക്തമാക്കി. താന് കൈയേറ്റക്കാരനാണെന്ന് ലോകത്തൊരാളും പറയില്ലെന്നും അദ്ദേഹം പറഞ്ഞു. ആരോപണമുന്നയിച്ചവര് തന്നെ വ്യക്തിഹത്യ ചെയ്തിരിക്കുകയാണ്. ബോള്ഗാട്ടി കണ്വെന്ഷന് സെന്ററിന് വേണ്ടി താന് കോടികള് ചെലവഴിച്ചിട്ടുണ്ട്. ഇതിനകം പദ്ധതിക്കു വേണ്ടി ചെലവഴിച്ച തുകയുടെ നഷ്ടം കണക്കാക്കുന്നില്ലെന്നും പദ്ധതിയില് നിന്നും പിന്മാറാന് തന്നെയാണ് തീരുമാനമെന്നും അദ്ദേഹം പറഞ്ഞു.
ലുലു മാള് യാഥാര്ഥ്യമാകാന് അഞ്ച് കൊല്ലമെടുത്തിരുന്നു. എന്നാല് ഈ കാലയളവിനുളളില് ആരും ആരോപണങ്ങള് ഉന്നയിച്ചില്ല. എന്തുകൊണ്ടാണ് മാള് പ്രവര്ത്തനമാരംഭിച്ച ശേഷം ഇത്തരം ആരോപണങ്ങള് ഉയര്ന്നുവരുന്നതെന്ന് അറിയില്ല. സിപിഎമ്മിലെ വിഭാഗീയതയാണോ പ്രശ്നത്തിന് കാരണമെന്ന ചോദ്യത്തിന് അതൊന്നും തനിക്കറിയില്ലെന്നായിരുന്നു യൂസഫലിയുടെ മറുപടി. ഇടതുപക്ഷ സര്ക്കാരിന്റെ കാലത്തും ഒട്ടേറെ വികസന പ്രവര്ത്തനങ്ങള് താന് കേരളത്തിന് വേണ്ടി ചെയ്തിട്ടുണ്ട്. ഇതെല്ലാം മറന്നുകൊണ്ടാണ് സിപിഎം തനിക്കെതിരേ ആരോപണമുന്നയിക്കുന്നതെന്നും യൂസഫലി പറഞ്ഞു.
അതേസമയം യൂസഫലിയുടെ ന്യായീകരണങ്ങളില് കഴമ്പില്ലെന്ന് എം.എം ലോറന്സ് പറഞ്ഞു. എങ്ങനെയാണ് മാളിന് അനുമതി ലഭിച്ചതെന്ന് വ്യക്തമാക്കണമെന്നും, 22000 പേര്ക്ക് ജോലികൊടുത്തെങ്കില് അത് പണമുണ്ടാക്കാന് വേണ്ടിയാണെന്നും ലോറന്സ് പറഞ്ഞു.
https://www.facebook.com/Malayalivartha
