കണ്ടക്ടറുടെ കൃത്യനിര്വ്വഹണം തടസ്സപ്പെടുത്തിയതിന് മേലുദ്യോഗസ്ഥക്ക് സസ്പെന്ഷന്
കെഎസ്ആര്ടിസി ബസില് ഡ്യൂട്ടി പാസ് കാണിക്കാതെ കണ്ടക്ടറുടെ കൃത്യനിര്വ്വഹണം തടസ്സപ്പെടുത്തിയതിന് കെഎസ്ആര്ടിസി സൂപ്രണ്ടിനെ സസ്പെന്ഡ് ചെയ്തു. നെയ്യാറ്റിന്കര ഡിപ്പോയിലെ സീനിയര് സൂപ്രണ്ട് മഹേശ്വരിയെയാണ് സസ്പെന്ഡ് ചെയ്തത്. കണ്ടക്ടറുടെ കൃത്യനിര്വ്വഹണം തടസ്സപ്പെടുത്തിയതിന് ഇവര്ക്കെതിരെ വിജിലന്സ് അന്വേഷണം പ്രഖ്യാപിച്ചിരുന്നു. വിജിലന്സ് വിഭാഗം അന്വേഷണം നടത്തി സമര്പ്പിച്ച റിപ്പോര്ട്ടിന്റെ അടിസ്ഥാനത്തിലാണു വിജിലന്സ് എക്സിക്യൂട്ടീവ് ഡയറക്ടര് സസ്പെന്ഷന് ഉത്തരവിട്ടത്.
കഴിഞ്ഞ 4ന് അടൂരില് നിന്നു തമിഴ്നാട്ടിലെ തലക്കുളത്തേക്കു പോയ അടൂര് ഡിപ്പോയുടെ ഫാസ്റ്റ് പാസഞ്ചര് ബസിലാണു സംഭവം. കരമനയില് നിന്ന് നെയ്യാറ്റിന്കരയിലേക്ക് ബസ് കയറിയ മഹേശ്വരി ടിക്കറ്റ് എടുക്കാനോ പാസ് കാണിക്കാനോ തയ്യാറായില്ലെന്നാണ് ആക്ഷേപം. കണ്ടക്ടര് ആവര്ത്തിച്ച് ആവശ്യപ്പെട്ടിട്ടും പാസ് കാണിച്ചില്ല. പാസ് കാണിച്ചില്ലെങ്കില് ടിക്കറ്റ് എടുക്കണമെന്ന് ആവശ്യപ്പെട്ടപ്പോള്, താന് ഡിപ്പോ സൂപ്രണ്ടാണെന്നും എല്ലാവര്ക്കും തന്നെ അറിയാമെന്നും പറഞ്ഞ് കണ്ടക്ടറോട് തട്ടിക്കയറി.
കണ്ടക്ടര് അഞ്ജലി പാസ് ചോദിച്ചപ്പോള് നമ്ബര് പറയാമെന്നും അതു രേഖപ്പെടുത്തിയാല് മതിയെന്നും മഹേശ്വരി മറുപടി പറയുന്നതായ വിഡിയോ ദൃശ്യങ്ങള് സമൂഹ മാധ്യമങ്ങളില് പ്രചരിച്ചിരുന്നു. താന് 20 വര്ഷമായി യാത്ര ചെയ്യുന്നയാളാണെന്നും ഉദ്യോഗസ്ഥ ധാര്ഷ്ഠ്യത്തോടെ മറുപടി നല്കുന്നതും ദൃശ്യങ്ങളില് കാണാം. സൗജന്യ പാസുകള് കണ്ടക്ടര്മാര് പരിശോധിച്ചു ഇലക്ട്രോണിക് ടിക്കറ്റിങ് മെഷീനില് അവയുടെ നമ്പര് രേഖപ്പെടുത്തണമെന്നാണു നിയമം. ഇങ്ങനെ പരിശോധിക്കാതെ യാത്രാ സൗജന്യം അനുവദിക്കുന്നതു തെറ്റാണെന്നു കെഎസ്ആര്ടിസി എംഡി തന്നെ വ്യക്തമാക്കിയിട്ടുണ്ട്.
https://www.facebook.com/Malayalivartha
