സംസ്ഥാന സര്‍ക്കാരിന്‍റെ വികസന നേട്ടങ്ങള്‍ ഒന്നുമില്ലെന്ന് വരുത്തിത്തീര്‍ക്കാന്‍ ബോധപൂര്‍വ്വം ശ്രമം നടക്കുകയാണ് എന്ന പരാമർശവുമായി മുഖ്യമന്ത്രി പിണറായി വിജയന്‍. സര്‍ക്കാരിന്‍റെ നേട്ടങ്ങള്‍ ജനങ്ങളിലേക്ക് എത്തിക്കാനുള്ള ശ്രമങ്ങള്‍ ഉണ്ടാകണമെന്നും അദ്ദേഹം വ്യക്തമാക്കി. തിരുവനന്തപുരത്ത് സിപിഎം സംഘടിപ്പിച്ച ശില്‍പ്പശാലയില്‍ സംസാരിക്കുന്നതിനിടെയായിരുന്നു മുഖ്യമന്ത്രി ഈ കാര്യം പറഞ്ഞത് . സംസ്ഥാനത്ത് ഇടത് പക്ഷത്തിനെതിരെ വിശാല മുന്നണിയുണ്ടാക്കാനുള്ള നീക്കങ്ങളും നടക്കുന്നു. തദ്ദേശ തെരഞ്ഞെടുപ്പ് ഇതിന്‍റ എല്ലാം ഉരകല്ലാകുമെന്നും പിണറായി വിജയന്‍ പറഞ്ഞു.

കേന്ദ്ര സര്‍ക്കാരിന്റെ പൗരത്വ നിയമത്തിനെതിരെ എടുത്ത നിലപാട് ഇടത് മുന്നണിയുടെ അടിത്തറ വിപുലമാക്കിയിട്ടുണ്ടെന്നും അദ്ദേഹം പറഞ്ഞു. വലിയ ജനസഞ്ചയമാണ് എല്‍ഡിഎഫിന് ഒപ്പം അണിനിരന്നതെന്ന കാര്യവും അദ്ദേഹം വ്യക്തമാക്കി. അത് സ്വാഭാവികമായും യുഡിഎഫിനെ ബുദ്ധിമുട്ടിലാക്കിയെന്നും അദ്ദേഹം പറഞ്ഞു . യുഡിഎഫ് വലിയ തകര്‍ച്ചയിലേക്ക് പോകുകയാണെന്നും മുഖ്യമന്ത്രി പറഞ്ഞു. കേരളത്തില്‍ നോക്കുകൂലി അടക്കമുള്ള ദുഷ്പ്രവണതകള്‍ അവസാനിക്കുകയാണ് . എന്നാല്‍ ചില സ്ഥലങ്ങളില്‍ ഇപ്പോഴും നോക്കു കൂലി നില നില്‍ക്കുന്നു എന്ന കാര്യവും അദ്ദേഹം ചൂണ്ടിക്കാട്ടി . ഇതിനെതിരെ ശക്തമായ നടപടി എടുക്കുമെന്നും മുഖ്യമന്ത്രി പറഞ്ഞു .