ഇറ്റലിയില്‍ നിന്നും വിശുദ്ധ അന്തോനീസിന്റെ തിരുശേഷിപ്പ് കൊല്ലത്ത് എത്തി; സാമ്പ്രാണിക്കോടിയില്‍ ഭക്തജന പ്രവാഹം
നൂറ്റാണ്ടുകളായി ഇറ്റലിയിലെ പാദുവായില്‍ സൂക്ഷിച്ചിരിക്കുന്ന വിശുദ്ധ അന്തോനീസിന്റെ തിരുശേഷിപ്പുകള്‍ കൊല്ലത്തിന്റെ മണ്ണിലെത്തി.
തിരുശേഷിപ്പ് പേടകം എത്തിയപ്പോള്‍ പ്രാര്‍ഥനകളോടെ കാത്തു നിന്ന വിശ്വാസി സമൂഹത്തില്‍ പലരുടെയും കണ്ണുകള്‍ നിറഞ്ഞൊഴുകി. ജനക്കൂട്ടം ഇടമുറിയാതെ ഒഴുകിയെത്തിയപ്പോള്‍ പ്രാക്കുളം ഐപ്പുഴ സെന്റ് എലിസബത്ത് ദേവാലയം സാക്ഷിയായത് മറ്റൊരു ദൈവ നിയോഗത്തിനു കൂടിയായിരുന്നു.
പ്രാക്കുളം ബസ് സ്റ്റാന്‍ഡില്‍ നിന്നു സാമ്പ്രാണിക്കോടിയിലേക്ക് രാവിലെ 9.30-നാണ് വിശുദ്ധന്റെ തിരുശേഷിപ്പ് ആനയിച്ചത്. കൊല്ലം രൂപതാ വികാരി ജനറല്‍ മോണ്‍.വിന്‍സന്റ് മച്ചാഡോ, വികാരി ഫാ.ജോ ആന്റണി അലക്‌സ്, കൈക്കാരന്‍ എ.പാപ്പച്ചന്‍, സെക്രട്ടറി സ്റ്റാന്‍ലി ഏലിയാസ്, കോ ഓര്‍ഡിനേറ്റര്‍ ഫ്രാന്‍സിസ് ഡേവിഡ് എന്നിവരുടെ നേതൃത്വത്തിലാണു സ്വീകരണം ഒരുക്കിയത്.
തിരുശേഷിപ്പ് കടന്നു പോയ വഴികളുടെ ഇരുവശങ്ങളിലും കാത്തു നിന്നവര്‍ വിളക്കു തെളിച്ചും പൂക്കള്‍ വിതറിയും സ്വീകരിച്ചു. പ്രാരംഭ പ്രാര്‍ഥനകള്‍ക്കു ശേഷം നടന്ന ദിവ്യബലിക്ക് വികാരി ജനറല്‍ മുഖ്യകാര്‍മികനായി. തുടര്‍ന്ന് തിരുശേഷിപ്പ് വിശ്വാസികളുടെ പൊതുവണക്കത്തിനു സ്ഥാപിച്ചു. ഇന്നു രാത്രി 8 വരെ തിരുശേഷിപ്പ് വണക്കത്തിനു സൗകര്യമുണ്ട്. 8-നാണ് തിരുശേഷിപ്പിനു യാത്രയയപ്പ്.
https://www.facebook.com/Malayalivartha
