കോഴിക്കോട് അന്താരാഷ്ട്ര വിമാന താവളം വഴി ഇന്നലെ രാത്രിയും ഇന്നു പുലർച്ചയുമായി മൂന്നു യാത്രക്കാർ കള്ളക്കടത്തായി കൊണ്ടുവന്ന 95 ലക്ഷം രൂപയുടെ സ്വർണ്ണം എയർ കസ്റ്റംസ് ഇൻറലിജൻസ് വിഭാഗം പിടികൂടി കേസെടുത്തു. ജിദ്ദയിൽ നിന്നും ഇന്നലെ വൈകീട്ട് ആറ് മണിക്കെത്തിയ സ്പൈസ്ജറ്റ് എയർവെയ്സ് വിമാനത്തിൽ എത്തിയ യാത്രക്കാരൻ കൊയിലാണ്ടി സ്വദേശി മുജീബ് റഹ്മാൻ ഇസ്തിരിപെട്ടിയുടെ ഉൾവശത്ത് തകിടു രൂപത്തിൽ ഒളിപ്പിച്ചു കൊണ്ടുവന്ന 350 ഗ്രാം സ്വർണ്ണമാണ് പിടികൂടിയത്. ഇതിന് ഇന്ത്യൻ മാർക്കറ്റിൽ 15.26 ലക്ഷം രൂപ വിലമതിക്കും.

ഇന്ന് രാവിലെ മൂന്ന് മണിക്ക് ഷാർജയിൽ യിന്നും എത്തിയ എയർ അറേബ്യ വിമാനം G 9 454 ലെ രണ്ട് യാത്രക്കാർ ശരീരത്തിനുള്ളിലൊളിപ്പിച്ച സ്വർണ്ണ മിശ്രിതവും പിടികൂടി. മലപ്പുറം നിലമ്പൂർ സ്വദേശിയായ മുഹമ്മദ് ഹനീഫയിൽ നിന്നും 1136 ഗ്രാം സ്വർണ്ണ മിശ്രിതവും കോഴിക്കോട് അടിവാരം സ്വദേശിയായ യാത്രക്കാരൻ സാദിഖിൽ നിന്നും 1005ഗ്രാം സ്വർണ്ണ മിശ്രിതവുമാണ് എയർ ഇന്റലിജൻസ് ഉദ്യോഗസ്ഥർ പിടിച്ചെടുത്തത്. പിടിച്ചെടുത്ത മിശ്രിതത്തിൽ നിന്നും 1820 ഗ്രാം തങ്കം വേർതിരിച്ചെടുത്തു. ഇതിനു മാർക്കറ്റിൽ 79.35 ലക്ഷം രൂപ വിലമതിക്കും.

ഡപ്യൂട്ടി കമ്മീഷണർ ഡോ. രാജി എൻ.എസ്. അസി.കമ്മീഷണർ എ.കെ.സുരേന്ദ്രനാഥൻ, സൂപ്രണ്ടുമാരായ കെ.പി.മനോജ്, എം.പ്രകാശ്, രഞ്ജി വില്യം, ഇൻസ്പക്ടർമാരായ കെ.മുരളിധരൻ, പ്രേം പ്രകാശ്, യോഗേഷ് യാദവ്, മിനിമോൾ, ഹവീൽദാർ സി.അശോകൻ എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്.