അഗ്‌നിരക്ഷാ സേനയുടെ പ്രധാന 4 കേന്ദ്രങ്ങളിലെ 5 വാഹനങ്ങള്‍ കട്ടപ്പുറത്ത്
തീപിടിത്തങ്ങള്‍ക്ക് അതീവ സാദ്ധ്യതയുള്ള കത്തുന്ന ഈ വേനല്‍ക്കാലത്ത് അഗ്‌നിരക്ഷാ സേനയുടെ പ്രധാന 4 കേന്ദ്രങ്ങളിലെ 5 വാഹനങ്ങള്‍ കട്ടപ്പുറത്തിരിക്കയാണ്. സര്‍ക്കാരിന്റെ സാമ്പത്തിക നിയന്ത്രണങ്ങള്‍മൂലം ചില സ്ഥലങ്ങളില്‍ വാഹനങ്ങളുടെ അറ്റകുറ്റപ്പണിയും തലവേദനയാകുന്നു.
അരൂര്‍ അഗ്‌നിരക്ഷാ സ്റ്റേഷനിലെ ആംബുലന്‍സിന്റെ ഓട്ടം നിലച്ചിട്ട് ഒരു മാസമായി. ദേശീയപാതയില്‍ ഏറ്റവുമധികം അപകടങ്ങള്‍ റിപ്പോര്‍ട്ട് ചെയ്യുന്ന സ്റ്റേഷനാണിത്. ഇന്‍ഷുറന്‍സ് കാലാവധി കഴിഞ്ഞതിനാല്‍ നിരത്തിലിറക്കാന്‍ കഴിയില്ല. കഴിഞ്ഞ ജനുവരി 27-നാണ് കാലാവധി തീര്‍ന്നത്. തുക ലഭ്യമാകാത്തതാണ് വാഹന ഇന്‍ഷുറന്‍സ് പുതുക്കാന്‍ തടസ്സമായത്. കെഎസ്ഇബിയുടെ കെട്ടിടത്തില്‍ വാടകയ്ക്കു പ്രവര്‍ത്തിക്കുന്ന സ്റ്റേഷനില്‍ രക്ഷാപ്രവര്‍ത്തനത്തിനു വെള്ളം കണ്ടെത്താനും പ്രയാസമുണ്ട്.
എംസി റോഡില്‍ ഉള്‍പ്പെടെ രക്ഷാപ്രവര്‍ത്തനത്തിന് എത്തേണ്ട പ്രധാന കേന്ദ്രമായ ചെങ്ങന്നൂര്‍ സ്റ്റേഷനു വിനയായത് വാഹനങ്ങളുടെ അറ്റകുറ്റപ്പണി നടത്താന്‍ വൈകുന്നതാണ്. ചെങ്ങന്നൂര്‍ അഗ്‌നിരക്ഷാ സേനയുടെ 3 വാട്ടര്‍ ടെന്‍ഡറില്‍ 2 എണ്ണവും പണിമുടക്കി. ചേര്‍ത്തലയില്‍നിന്നു കൊണ്ടുവന്ന ഒരു വാഹനമാണ് നിലവില്‍ ഉപയോഗിക്കുന്നത്. 4500, 2500 ലീറ്റര്‍ വീതം ജലം സംഭരിക്കാന്‍ ശേഷിയുള്ളതാണ് ഓട്ടം നിലച്ച വാട്ടര്‍ ടെന്‍ഡറുകള്‍. തകരാറിലായിട്ട് ഒരു മാസമായി.
തകഴി സ്റ്റേഷനാണ് കുട്ടനാട്ടിലെ രക്ഷാപ്രവര്‍ത്തനത്തിന്റെ ചുമതലയുള്ളത്. അതിന് ഓടിയെത്തേണ്ട 2 വാട്ടര്‍ ടെന്‍ഡറുകളില്‍ ഒരെണ്ണം പണിമുടക്കി. 4500 ലീറ്റര്‍ ജലം സംഭരിക്കാന്‍ ശേഷിയുള്ളതാണ് ഓടാത്തത്. ദേശീയപാതയില്‍ പുറക്കാട്, അമ്പലപ്പുഴ പ്രദേശങ്ങള്‍ കൂടാതെ എടത്വ വരെയുള്ള മേഖലയിലേക്ക് ഇവിടെ നിന്നാണ് രക്ഷാപ്രവര്‍ത്തനത്തിന് എത്തേണ്ടത്. റേഡിയേറ്റര്‍ തകരാര്‍മൂലം ആലപ്പുഴ സ്റ്റേഷനിലെ ഒരു വാട്ടര്‍ ലോറി ഓടുന്നുമില്ല.
https://www.facebook.com/Malayalivartha
