ബിജെപി സംസ്ഥാന പ്രസിഡന്റ് കെ സുരേന്ദ്രനുകീഴില്‍ പദവികള്‍ ഏറ്റെടുക്കാൻ തയ്യാറല്ലെന്ന് ബിജെപി നേതാവ് എഎന്‍ രാധാകൃഷണന്‍. ദേശീയ സംഘടനാ സെക്രട്ടറിയുമായുള്ള ചര്‍ച്ചയിലും രാധാകൃഷണന്‍ നിലപാട് ആവര്‍ത്തിച്ചു. മാസങ്ങളോളമുണ്ടായ തര്‍ക്കങ്ങള്‍ക്കൊടുവിലാണ് ബിജെപി സംസ്ഥാന പ്രസിഡന്റായി കെ സുരേന്ദ്രനെ തെരഞ്ഞെടുത്തത്. ഇതിനുശേഷവും ബിജെപ്പിക്കുള്ളിൽ പൊട്ടിത്തെറി നടക്കുകയാണ്.

കെ സുരേന്ദ്രന്റെ സ്ഥാനം ഏറ്റെടുക്കല്‍ ചടങ്ങ് കുമ്മനം രാജശേഖരന്‍, ശോഭ സുരേന്ദ്രന്‍ എന്നിവരടക്കമുള്ളവര്‍ ബഹിഷ്‌കരിച്ചിരുന്നു. കെ. സുരേന്ദ്രനൊപ്പം സംസ്ഥാന അധ്യക്ഷ സ്ഥാനത്തേയ്ക്ക് എ.എന്‍ രാധാകൃഷ്ണന്‍, ശോഭാ സുരേന്ദ്രന്‍ എന്നിവര്‍ പരിഗണിക്കപ്പെട്ടിരുന്നതായി വാര്‍ത്തകളുണ്ടായിരുന്നു. സംസ്ഥാനപ്രസിഡന്റ് സ്ഥാനം ലഭിക്കാത്തതില്‍ പി.കെ. കൃഷ്ണദാസ് പക്ഷത്തെ നേതാക്കള്‍ക്ക് അതൃപ്തിയുണ്ടെന്നും നേരത്തെ റിപ്പോര്‍ട്ടുകള്‍ പുറത്തുവന്നിരുന്നു.

ദേശീയ തലത്തില്‍ സംസ്ഥാന അധ്യക്ഷനെ തെരഞ്ഞെടുക്കുന്നതുമായി ബന്ധപ്പെട്ട് നിരവധി ചര്‍ച്ചകള്‍ നടന്നിരുന്നു. സംസ്ഥാന ആര്‍എസ്എസ് നേതൃത്വത്തെ അനുനയിപ്പിക്കുന്നതിനു വേണ്ടിയാണ് പ്രഖ്യാപനത്തിന് ഇത്രയും സമയം എടുത്തത്. കുമ്മനം രാജശേഖരന് എന്ത് പദവി നല്‍കുമെന്ന സംസ്ഥാന ആര്‍എസ്എസ് നേതൃത്വത്തിന്റെ കടുംപിടുത്തമാണ് പ്രഖ്യാപനം വൈകിപ്പിച്ചത്. സംസ്ഥാന അധ്യക്ഷ സ്ഥാനത്തേക്ക് ആദ്യഘട്ടം മുതല്‍ പരിഗണിച്ചിരുന്നത് കെ സുരേന്ദ്രന്റെ പേരായിരുന്നു.

ഒ രാജഗോപാല്‍, മുന്‍ സംഘടനാ സെക്രട്ടറി പി പി മുകുന്ദന്‍, ദേശീയ സെക്രട്ടറി എച്ച്‌ രാജ എന്നിവര്‍ ചടങ്ങില്‍ പങ്കെടുത്തു. മുന്‍ പ്രസിഡന്റ് സി കെ പത്മനാഭനാണ് കുമ്മനം അടക്കമുള്ളവരുടെ അസാന്നിധ്യം ചടങ്ങില്‍ പരാമര്‍ശിച്ചത്. തുടര്‍ന്നാണ് തിരുവനന്തപുരത്തുണ്ടായിരുന്ന എ എന്‍ രാധാകൃഷ്ണന്‍, എം ടി രമേശ് എന്നിവരെ വിളിച്ചുവരുത്താന്‍ എച്ച്‌ രാജ നിര്‍ദേശിച്ചത്.കെ സുരേന്ദ്രനെ അംഗീകരിക്കില്ലെന്നാണ് കൃഷ്ണദാസ് പക്ഷ നേതാക്കള്‍ നല്‍കുന്ന സൂചന.