തിരിച്ചുവരവ് ഗംഭീരമാക്കി വാവ സുരേഷ്. ആശുപത്രിയിൽ നിന്നും ഡിസ്ചാർജായി ആറുദിവസം പിന്നിട്ടതേയുള്ളു. ഉടൻ തന്നെ 'ഡ്യൂട്ടിയിൽ' കയറി. തിരിച്ചുവരവ് സ്പെഷ്യലാക്കാൻ പിടികൂടിയത് സാക്ഷാൽ രാജ വെമ്പാലയെ. വീഡിയോ ഇതിനോടകം തരംഗമായി മാറിയിരിക്കുകയാണ്.

അണലിയുടെ കടിയേറ്റ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുകയായിരുന്ന വാവ സുരേഷ് ഡിസ്ചാർജായി ആറാം ദിവസം ആകുന്നതേയുള്ളു. പത്തനംതിട്ട ജില്ലയിലെ സീതത്തോട് കോട്ടമൻപറയിലെ സൂസമ്മ ആഞ്ഞിലിമൂട്ടിൽ ഹൗസ്സിൽ നിന്നുമാണ് വാവ സുരേഷ് രാജവെമ്പാലയെ പിടികൂടിയത്. ഇതോടെ വാവ സുരേഷ് പിടികൂടിയ രാജവെമ്പാലകളുടെ എണ്ണം 181 ആയിരിക്കുന്നു .അണലിയുടെ കടിയേറ്റ് ചികിത്സയിൽ കഴിഞ്ഞിരുന്ന വാവ സുരേഷ് ഡിസ്ചാർജ് ആയി ഇറങ്ങിയതിന്റെ പിറ്റേ ദിവസം തന്നെ തന്റെ ജോലിയിൽ സജീവമായിരുന്നു . തലസ്ഥാനജില്ലയിലെ അരുവിക്കരയ്ക്ക് അടുത്തുള്ള കളത്തറ വിമല സ്‌കൂളിന് സമീപമുള്ള വീടിനടുത്തു നിന്നും മൂർഖൻ പാമ്പിനെ പിടികൂടിയാണ് തിരിച്ചുവരവിൽ ഡ്യൂട്ടിക്ക് തുടക്കം കുറിച്ചത്. ഡോക്റ്റർമാർ നിർദേശിച്ച വിശ്രമം പോലും ഉപേക്ഷിച്ചാണ് നാട്ടുകാരുടെയും കുട്ടികളുടേയും രക്ഷയ്ക്കായി വാവ സുരേഷ് സ്ഥലത്തെത്തിയത്.

കഴിഞ്ഞ ആഴ്ചയാണ് അണലിയുടെ കടിയേറ്റതിനെ തുടർന്ന് വാവ സുരേഷിനെ തിരുവനന്തപുരം മെഡിക്കൽ കോളേജിൽ പ്രവേശിപ്പിക്കുന്നത്. കല്ലറേത്തെ ഒരു വീട്ടില്‍നിന്നും കുപ്പിയിലാക്കിക്കൊണ്ടുപോയ അണലിയെ കാണാന്‍ നാട്ടുകാര്‍ ആഗ്രഹം പ്രകടിപ്പിച്ചതനുസരിച്ച് പുറത്തെടുക്കുന്നതിനിടെയാണ് വാവ സുരേഷിന്റെ കൈയില്‍ കടിയേറ്റത്. കൈവശമുണ്ടായിരുന്ന മരുന്നുപയോഗിച്ച് പ്രഥമശുശ്രൂഷ നൽകിയ ശേഷം ഉച്ചയോടെയാണ് വാവ സുരേഷിനെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്.

മള്‍ട്ടി ഡിസിപ്ലിനറി ഐ.സി.യു.വില്‍ ആയിരുന്നു വാവയെ പ്രവേശിപ്പിച്ചിരുന്നത്. നാട് മുഴുവൻ വാവ സുരേഷിന്റെ ജീവന് വേണ്ടിയുള്ള പ്രാർത്ഥനയിലായിരുന്നു. നാട് മുഴുവൻ വാവ സുരേഷിന്റെ തിരിച്ചുവരവിനായുള്ള കാത്തിരിപ്പിലായിരുന്നു. കേന്ദ്രമന്ത്രി വി. മുരളീധരനടക്കം വാവയെ ആശുപത്രിയിൽ എത്തി സന്ദർശിച്ചിരുന്നു. ആശുപത്രിയിൽ നിന്നും പുറത്തിറങ്ങിയാൽ വീണ്ടും കർമ്മ മേഖലയിൽ സജീവമാകുമെന്ന് വാവ സുരേഷ് അറിയിച്ചിരുന്നു. തിരിച്ചുവരവിലെ വാവ സുരേഷ് രാജവെമ്പാലയെ പിടികൂടിയ വീഡിയോ സോഷ്യൽ മീഡിയകളിൽ സജീവമാകുകയാണ്.