ദേവനന്ദക്കായി രണ്ടാം ദിവസവും തിരച്ചില്‍ ഊര്‍ജിതമായി തുടരുന്നു.... കൊട്ടാരക്കര നെടുമണ്‍കാവ് ഇളവൂരില്‍ ആറു വയസ്സുകാരിയെ കാണാതായ സംഭവം ചാത്തന്നൂര്‍ എസിപിയുടെ നേതൃത്വത്തിലുള്ള പ്രത്യേക സംഘം അന്വേഷണം തുടങ്ങി... സംഭവത്തില്‍ ബാലവകാശ കമ്മിഷന്‍ കേസെടുത്തു
കൊട്ടാരക്കര നെടുമണ്‍കാവ് ഇളവൂരില്‍ ആറു വയസ്സുകാരിയെ കാണാതായ സംഭവം ചാത്തന്നൂര്‍ എസിപിയുടെ നേതൃത്വത്തിലുള്ള പ്രത്യേക സംഘം അന്വേഷണം തുടങ്ങി. ആറ് വയസുകാരി ദേവനന്ദക്കായി രണ്ടാം ദിവസവും തിരച്ചില്‍ ഊര്‍ജിതമായി തുടരുന്നു. സൈബര്‍ വിദഗ്ധരടക്കം ഉള്‍പ്പെട്ടതാണ് പ്രത്യേക അന്വേഷണസംഘം. വിവിധ റെയില്‍വെ സ്റ്റേഷനുകളിലും ചെക്ക് പോസ്റ്റുകളിലും സംഘം പരിശോധന നടത്തും.
വാഹന പരിശോധനയും തുടങ്ങിക്കഴിഞ്ഞു. റെയില്‍വെയുടെയും ആര്‍പിഎഫിന്റെയും സഹകരണത്തോടെയാണ് റെയില്‍വെ സ്റ്റേഷനുകളിലെ പരിശോധന. ഇതിനു പുറമെ 50 ഓളം പോലീസ് ഉദ്യോഗസ്ഥര്‍ നിലവില്‍ വിവിധയിടങ്ങളില്‍ പരിശോധന നടത്തുന്നുണ്ട്. സംഭവത്തില്‍ ബാലവകാശ കമ്മിഷന്‍ കേസെടുത്തു. ഇതു സംബന്ധിച്ച് സംസ്ഥാന പോലീസ് മേധാവി, പൊതുവിദ്യാഭ്യാസ ഡയറക്ടര്‍, കൊല്ലം ജില്ലാ കളക്ടര്‍, ജില്ലാ ശിശു സംരക്ഷണ ഓഫീസര്‍ എന്നിവരില്‍നിന്ന് കമ്മിഷന്‍ റിപ്പോര്‍ട്ട് ആവശ്യപ്പെട്ടു.
വ്യാജവാര്‍ത്തപ്രചരിപ്പിക്കുന്നവര്‍ക്കെതിരെ കര്‍ശന നടപടി സ്വീകരിക്കണമെന്നും കമ്മീഷന്‍ നിര്‍ദേശം നല്‍കിയിട്ടുണ്ട്. അടുത്ത ബന്ധുക്കള്‍, കുട്ടിയുടെ അമ്മ തുടങ്ങിയവരുടെ മൊഴി പൊലീസ് രേഖപ്പെടുത്തി. സമീപപ്രദേശത്തെ ആളൊഴിഞ്ഞ പറമ്പുകളിലും സമീപത്തെ പുഴയിലും തിരച്ചില്‍ തുടരാനാണ് പൊലീസ് തീരുമാനം. പരമാവധി സിസിടിവി ദൃശ്യങ്ങള്‍ ശേഖരിച്ചും മൊബൈല്‍ ടവ്വറുകള്‍ കേന്ദ്രീകരിച്ചും സൈബര്‍ വിദഗ്ദരുടെ സംഘം അന്വേഷണം തുടരുകയാണ്. സമീപവാസികളായ നാട്ടുകാരും അന്വേഷണത്തില്‍ പങ്കെടുക്കുന്നുണ്ട്.
https://www.facebook.com/Malayalivartha
