അഞ്ച് വർഷംകൊണ്ട് 48 കാരന്റെ ഹോബി വ്യാജ ഫേസ്ബുക്ക് അക്കൗണ്ട് വഴി സുഹൃദം സ്ഥാപിച്ച് അശ്ലീല സന്ദേശങ്ങൾ അയക്കുന്നത്; ഫോൺ പിടിച്ചെടുത്തപ്പോൾ കണ്ടെത്തിയത് നൂറ് കണക്കിന് അശ്ലീല ദൃശ്യങ്ങള്‍
പെണ്‍കുട്ടികളുമായി വ്യാജ ഫേസ്ബുക്ക് അക്കൗണ്ട് വഴി സുഹൃദം സ്ഥാപിച്ച് അശ്ലീല സന്ദേശങ്ങൾ അയക്കുന്ന 48 കാരനെ പോലീസ് പിടികൂടി. ഏനാത്തുള്ള ബാര്‍ ഹോട്ടലിലെ ജീവനക്കാരനായ പുനലൂര്‍ ഇളമ്പൽ ആരംപുന്നമുറി കാഞ്ഞിയില്‍ വീട്ടില്‍ ശ്രീകുമാറിനെയാണ് ശൂരനാട് പോലീസ് തന്ത്ര പരമായി കുടുക്കിയത്. വിദ്യാര്‍ത്ഥിനി നല്‍കിയ പരാതിയുടെ അടിസ്ഥാനത്തില്‍ പോലീസ് നടത്തിയ അന്വേഷണത്തെ തുടര്‍ന്നാണ് ഇയാള്‍ പിടിയിലായത്. മുന്‍ പരിചയവും ഇല്ലാത്ത സ്ത്രീകള്‍ക്ക് പോലും ഇയാള്‍ റിക്വസ്റ്റ് അയച്ചിരുന്നു. ആരെങ്കിലും ശ്രീകുമാറിന്റെ ഫ്രണ്ട് റിക്വസ്റ്റ് സന്ദേശം സ്വീകരിച്ചാല്‍ ഉടന്‍ തന്നെ ഇയാള്‍ ഹായ് എന്ന് മെസേജ് അയക്കും. തുടര്‍ന്ന് തിരികെ മറുപടി ലഭിച്ചാലും ഇല്ലെങ്കിലും അശ്ലീല ചിത്രങ്ങളും സന്ദേശങ്ങളും അയയ്ക്കും. ഇതാണ് ശ്രീകുമാറിന്റെ രീതി.
കഴിഞ്ഞ അഞ്ച് വര്‍ഷത്തിനിടെ നിരവധി സ്ത്രീകള്‍ക്ക് ശ്രീകുമാര്‍ ഇത്തരത്തില്‍ അശ്ലീല സന്ദേശങ്ങള്‍ അയച്ചിട്ടുണ്ടെന്നാണ് വിവരം. പലരും നാണക്കേട് കാരണം പുറത്ത് പറയാനോ പരാതി നല്‍കാനോ തയ്യാറായിരുന്നില്ല. ഇതാണ് കൂടുതല്‍ സ്ത്രീകള്‍ക്ക് ഇത്തരത്തില്‍ സന്ദേശങ്ങള്‍ അയക്കാന്‍ ശ്രീകുമാറിനെ പ്രേരിപ്പിച്ചത്. ഇതിനിടെ പരാതിയെ തുടര്‍ന്ന് പൊലീസ് വ്യാജ അക്കൗണ്ട് തയാറാക്കി പ്രതിക്ക് സന്ദേശങ്ങള്‍ അയച്ച്‌ സൗഹൃദം സ്ഥാപിച്ചു.
ദിവസങ്ങള്‍ നീണ്ട സംഭാഷണങ്ങള്‍ക്കൊടുവിലാണ് ഫേക്ക് അക്കൗണ്ടില്‍ നിന്നും ശ്രീകുമാറിന്റെ യഥാര്‍ത്ഥ വിവരങ്ങള്‍ പുറത്ത് എത്തുന്നത്.ഇയാളുടെ മൊബൈല്‍ ഫോണ്‍ പോലീസ് പിടിച്ചെടുത്തു. നൂറ് കണക്കിന് അശ്ലീല ദൃശ്യങ്ങള്‍ ഫോണില്‍ ഉണ്ടായിരുന്നാതായാണ് വിവരം. ഫോണ്‍ ഫോറന്‍സിക് സയന്‍സ് ലാബിലേക്ക് പരിശോധനയ്ക്കായി അയച്ചു. ശ്രീകുമാറിനെ ഐ ടി ആക്‌ട് പ്രകാരമാണ് കേസെടുത്തതെന്നും കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തതായും സി ഐ എം.സി.ജിംസ്റ്റല്‍, എസ്‌ഐ പി. ശ്രീജിത്ത് എന്നിവര്‍ പറഞ്ഞു.
https://www.facebook.com/Malayalivartha
