ഏകദിന പരമ്പര സ്വന്തമാക്കിയതിന് പിന്നാലെ ട്വന്റി 20 ക്രിക്കറ്റിലും വെസ്റ്റിൻഡീസിനെതിരെ ആധിപത്യം ഉറപ്പിക്കാൻ ഇന്ത്യ. അഞ്ച് മത്സര പരമ്പരയിലെ ആദ്യ കളി ഇന്ന് രാത്രി ഏഴ് മുതൽ ലഖ്‌നൗ ഏകാന സ്റ്റേഡിയത്തിൽ നടക്കും. മത്സരത്തിൽ ഓപ്പണറായി ആരെ കളിപ്പിക്കും എന്നതാണ് ഇന്ത്യൻ കോച്ച് ഗൗതം ഗംഭീറിന് മുന്നിലുള്ള പ്രശ്‌നം.

മലയാളി താരം സഞ്ജു സാംസണും കൗമാര വിസ്മയം വൈഭവ് സൂര്യവംശിയുമാണ് ഓപ്പണർ സ്ഥാനത്തേക്ക് മത്സരിക്കുക. മികച്ച ഫോമിലുള്ള അഭിഷേക് ശർമയെ പുറത്തിരുത്താനായി ഗംഭീർ തയ്യാറാവില്ല. അഫ്ഗാനിസ്താനെതിരായ പരമ്പരയിൽ രണ്ട് അർധ സെഞ്ചുറിയുമായി തിളങ്ങിയ സഞ്ജുവിന് തന്നെയാകും കൂടുതൽ സാധ്യതയുള്ളത്.

പരിചയം കുറഞ്ഞ പേസ് ബൗളിങ് നിരയാണ് ഗംഭീറിന്റെ മറ്റൊരു ആശങ്ക. അർഷദീപ് സിങ്ങിന് കൂട്ടായി പുതുമുഖ താരങ്ങളായ ആറ് മത്സരം കളിച്ച മായങ്ക് യാദവും മൂന്ന് മത്സരം കളിച്ച പ്രിൻസ് യാദവുമാണ് രംഗത്ത്. അക്‌സർ പട്ടേലും കുൽദീപ് യാദവുമായിരിക്കും ഇന്ത്യയുടെ സ്പിൻ ആക്രമണത്തിന് നേതൃത്വം നൽകുക. ഏകദിനത്തെ അപേക്ഷിച്ച് ട്വന്റി 20 മത്സരങ്ങളിൽ കരുത്തുറ്റ ടീമാണ് രണ്ട് വട്ടം ലോകചാമ്പ്യൻമാരായ വിൻഡീസ്.