കേരളം കൊറോണ ഭീഷണിയില്‍ നിന്നും കരകയറിയതാണ്. കൊറോണ മുക്ത കേരളമെന്ന് പ്രഖ്യാപിക്കാനിരുന്നതുമാണ്. മറ്റ് സംസ്ഥാനങ്ങള്‍ പോലും കേരള മാതൃക പഠിക്കാനെത്തി. ആരോഗ്യ വകുപ്പ് പുലര്‍ത്തിയ ജാഗ്രത വിദേശങ്ങളില്‍ നിന്നും വന്നവര്‍ സ്വീകരിക്കുകയും ചെയ്തതോടെ എല്ലാം ശുഭമാകേണ്ടതായിരുന്നു. എന്നാല്‍ പത്തനംതിട്ടയില്‍ നിന്നും വന്ന കുടുംബം ഞാനൊന്നുമറിഞ്ഞില്ലേയെന്നും ഞങ്ങള്‍ക്കൊരു കുഴപ്പവുമില്ലേയെന്നും പറഞ്ഞ് ജില്ല ജില്ലാന്തരം ഇറങ്ങി നടന്നു. ഇവര്‍ കയറിയിറങ്ങിയ ബന്ധുവീട്ടുകാര്‍ മാത്രമല്ല കേരളം ഒന്നാകെ അങ്കലാപ്പിലാണ്. ഈ മൂന്ന് പേര്‍ കാരണം 3000 പേരെയാണ് കണ്ടുപിടിക്കേണ്ടി വരുന്നത്. അവരെല്ലാം ബുദ്ധിമുട്ട് സഹിക്കണം. ഇവരാണ് കേരളത്തില്‍ ആദ്യമായി മറ്റുള്ളവരിലേക്ക് കൊറോണ വൈറസ് നേരിട്ട് പകര്‍ത്തിയത്.

അതേസമയം ഇങ്ങനെ ഒളിച്ച് നടന്ന് സമൂഹത്തിന് ബാധ്യതയാകുന്നവര്‍ എറണാകുളത്ത് കൊറോണ സ്ഥിരീകരിച്ച മൂന്നു വയസുകാരന്റെ അമ്മയെ അറിയണം. വിമാനത്താവളത്തില്‍ സ്വീകരിക്കാന്‍ ബന്ധുക്കള്‍ എത്തിയിരുന്നെങ്കിലും കുഞ്ഞിന്റെ രോഗവിവരം കണ്ടെത്താനുള്ള ശ്രമത്തില്‍ ആയിരുന്നു നഴ്‌സായ ആ അമ്മ. തിടുക്കത്തില്‍ നാട്ടിലേക്കു മടങ്ങാന്‍ നോക്കാതെ വിമാനത്താവളത്തിലെ ആരോഗ്യ പ്രവര്‍ത്തകരോട് കുഞ്ഞിനു പനിയുണ്ടെന്ന് അവര്‍ പറഞ്ഞു. ഇറ്റലിയില്‍നിന്നുള്ള മടക്കത്തില്‍ കാട്ടിയ ആ സുമനസാണ് മൂന്നുവയസുകാരന്റെ കോവിഡ്19 രോഗബാധ കണ്ടെത്താന്‍ വഴിയൊരുക്കിയത്.

എമിറേറ്റ്‌സിന്റെ ദുബായ്‌കൊച്ചി വിമാനത്തിലാണ് ഈ മാസം ഏഴിനു കുട്ടിയും മാതാപിതാക്കളും നെടുമ്പാശേരിയില്‍ വിമാനമിറങ്ങിയത്. കണ്ണൂര്‍ ഇരിട്ടി സ്വദേശികളായ ഇവരെ വിമാനത്താവളത്തില്‍ സ്വീകരിക്കാന്‍ ബന്ധുക്കള്‍ എത്തിയിരുന്നു. എന്നാല്‍, ഇറ്റലിയില്‍ നഴ്‌സായ അമ്മ ആദ്യം സമീപിച്ചത് വിമാനത്താവളത്തിലെ മെഡിക്കല്‍ സംഘത്തെയാണ്. കുട്ടിക്കു പനിയുണ്ടെന്ന് അറിയിച്ചതോടെ ഉടന്‍ ഇവരെ ആംബുലന്‍സില്‍ കളമശേരി മെഡിക്കല്‍ കോളജിലേക്കു മാറ്റി. കുട്ടിയുടെ കഫം പരിശോധനക്കെടുത്ത് അയച്ചശേഷം മാതാപിതാക്കളെ നിരീക്ഷണത്തിലാക്കി.

കഴിഞ്ഞ ദിവസം പരിശോധനാഫലം വന്നപ്പോള്‍ റിസല്‍ട്ട് പോസിറ്റീവ്. ഇതോടെ മാതാപിതാക്കളുടെ സാമ്പിളുകള്‍ വീണ്ടും പരിശോധനയ്ക്കയച്ചു. കുട്ടിയുടെ ആരോഗ്യനില തൃപ്തികരമാണ്.

പത്തനംതിട്ടയില്‍ അഞ്ച് പേര്‍ക്കും എറണാകുളത്ത് ഒരു കുട്ടിക്കും കോവിഡ് 19 സ്ഥിരീകരിച്ച സാഹചര്യത്തില്‍ പ്രവര്‍ത്തനങ്ങളും നടപടിക്രമങ്ങളും ശക്തമാക്കിയിട്ടുണ്ട്. പത്തനംതിട്ടയില്‍ 5 പേര്‍ക്ക് കോവിഡ് 19 സ്ഥിരീകരിച്ചതിന് പിന്നാലെ 07.03.2020ന് ഇറ്റലിയില്‍ നിന്ന് കേരളത്തിലേക്ക് മടങ്ങിയെത്തിയ കണ്ണൂര്‍ സ്വദേശിയായ 3 വയസുള്ള കുട്ടിക്ക് കോവിഡ് 19 രോഗബാധ സ്ഥിരീകരിച്ചു. ഇതോടെ സംസ്ഥാനത്ത് 6 പേരാണ് കോവിഡ് 19 രോഗം ബാധിച്ച് ചികിത്സയിലുള്ളത്. നിലവില്‍ ആശുപത്രിയില്‍ പ്രവേശിപ്പിക്കപ്പെട്ട ആരുടേയും ആരോഗ്യനിലയില്‍ ആശങ്കയ്ക്ക് വകയില്ല.

102 ലോക രാജ്യങ്ങളില്‍ കോവിഡ് 19 രോഗം പടര്‍ന്നു പിടിച്ച സാഹചര്യത്തില്‍ സംസ്ഥാനത്തെ വിവിധ ജില്ലകളിലായി 1116 പേര്‍ നിരീക്ഷണത്തിലാണ്. ഇവരില്‍ 967 പേര്‍ വീടുകളിലും 149 പേര്‍ ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 807 സാമ്പിളുകള്‍ എന്‍. ഐ.വി യില്‍ പരിശോധനയ്ക്ക് അയച്ചിട്ടുണ്ട്. ഇതില്‍ 717 സാമ്പിളുകളുടെ പരിശോധനാ ഫലം നെഗറ്റിവ് ആണ്. ബാക്കിയുള്ള പരിശോധനാഫലം വരാനുണ്ട്. വീട്ടിലെ നിരീക്ഷണത്തില്‍ കഴിയുന്ന 5 വ്യക്തികളെ പരിഷ്‌കരിച്ച മാര്‍ഗരേഖ പ്രകാരം ഇന്ന് ഒഴിവാക്കിയിട്ടുണ്ട്.

പത്തനംതിട്ട ജില്ലയില്‍. ഇതുവരെ പ്രാഥമിക സമ്പര്‍ക്കത്തിലേര്‍പ്പെട്ട 270 പേരെയും ദ്വിതീയ സമ്പര്‍ക്കത്തിലേര്‍പ്പെട്ട 449 പേരെയും കണ്ടെത്തി നിരീക്ഷണത്തിലാക്കിയിട്ടുണ്ട്. ഇറ്റലിയില്‍ നിന്നും വന്ന പത്തനംതിട്ട കുടുംബം ആരോഗ്യ വകുപ്പിനെ അറിയിക്കാത്തതാണ് സര്‍ക്കാരും ജനങ്ങളും ഇത്രയും പേരു ബുദ്ധിമുട്ടുന്നത്. അതിനാല്‍ മൂന്നുവയസുകാരന്റെ അമ്മയെപ്പോലെ പോലെ കൊറോണ ബാധിത രാജ്യങ്ങളില്‍ നിന്നും വന്നവര്‍ മാതൃക കാട്ടണം.