സംസ്ഥാനത്ത് കോവിഡ് 19 വൈറസ് ബാധിതരുടെ എണ്ണം ആകെ 12 ആയി. ഇന്ന് രോഗബാധ സ്ഥിരീകരിച്ച 6 പേരും ഇറ്റലിയില്‍ നിന്നും എത്തിയവരുമായി സമ്ബര്‍ക്കം പുലര്‍ത്തിയവരാണെന്ന് ആരോഗ്യമന്ത്രി കെ.കെ ശൈലജ പറഞ്ഞു.

സംസ്ഥാനത്ത് ആളുകള്‍ കൂടിനില്‍ക്കുന്ന സാഹചര്യം പൂര്‍ണ്ണമായും ഒഴിവാക്കണം. രോഗലക്ഷണങ്ങള്‍ ഉള്ളവര്‍ ക്ഷേത്ര ദര്‍ശനങ്ങള്‍ ഒഴിവാക്കണം. ശബരിമല ദര്‍ശനവും ഒഴിവാക്കുന്നതാണ് നല്ലത്. ശബരിമലയിലെ ചടങ്ങുകള്‍ മാറ്റമില്ലാതെ നടക്കും. സംസ്ഥാനത്തെ കലാപരിപാടികളെല്ലാം ഒഴിവാക്കണം.

ഉത്സവങ്ങള്‍ പള്ളിപ്പെരുന്നാളുകള്‍ ഉള്‍പ്പെടെയുള്ള ആഘോഷ പരിപാടികള്‍ ആചാരപ്രകാരമുള്ള ചടങ്ങുകള്‍ മാത്രമാക്കി നടത്തുകയും ആളുകള്‍ കൂടുന്നത് ഒഴിവാക്കാനും മുഖ്യമന്ത്രി നിര്‍ദേശം നല്‍കി. വിവാഹത്തിന് ആളുകള്‍ കൂടുന്നത് ഒഴിവാക്കുക. ചടങ്ങുകള്‍ മാത്രമായി നടത്തുക.

വിദേശത്ത് ജോലി ചെയ്യുന്നവര്‍ക്ക് സമയത്ത് എത്താന്‍ കഴിയാത്തതു മൂലം ജോലി നഷ്ടപ്പെടുന്ന സാഹചര്യം ഒഴിവാക്കാന്‍ കേന്ദ്രസര്‍ക്കാരുമായി ബന്ധപ്പെടും. മാര്‍ച്ച്‌ 31 വരെ സ്‌കൂളുകള്‍ എല്ലാം അടച്ചിടും. അങ്കനവാടികളില്‍ നല്‍കിവരുന്ന ഭക്ഷണം വീടുകളില്‍ എത്തിച്ചു കൊടുക്കും.

വിനോദ സഞ്ചാരത്തിനും നിയന്ത്രണങ്ങള്‍ ഏര്‍പ്പെടുത്തി. പത്തനംതിട്ട ജില്ലയിലെ വിനോദസഞ്ചാര കേന്ദ്രങ്ങള്‍ അടച്ചു. കോന്നി ആനക്കൂടും, അടവി ഇക്കോ ടൂറിസം സെന്ററും പ്രവര്‍ത്തനം പൂര്‍ണമായും നിര്‍ത്തിവെച്ചു. കൂടാതെ ഇടുക്കിയിലെ വിനോദസഞ്ചാരകേന്ദ്രങ്ങളിലും നിയന്ത്രണങ്ങളേര്‍പ്പെടുത്തി.

ഇത് പ്രകാരം ഹോട്ടലുകളില്‍ പുതിയ ഓണ്‍ലൈന്‍ ബുക്കിംഗുകള്‍ അനുവദിക്കില്ല. കൂടാതെ നിലവില്‍ ഹോട്ടലുകളിലും ഹോംസ്റ്റേകളിലും താമസിക്കുന്ന വിദേശങ്ങളെ നിരീക്ഷിക്കും. ഇവരുടെ വിവരങ്ങള്‍ ശേഖരിച്ച്‌ വയ്ക്കും. ടൂറിസ്റ്റുകള്‍ക്ക് പുറമേ ഹോട്ടല്‍ ജീവനക്കാര്‍ക്കും ടാക്‌സി ഡ്രൈവര്‍ക്കും ബോധവല്‍ക്കരണ ക്ലാസുകള്‍ നല്‍കും. ഇറ്റലി, ഇറാന്‍, ചൈന, സൗത്ത് കൊറിയ, സിങ്കപ്പുര്‍ തുടങ്ങിയ രാജ്യങ്ങളില്‍ നിന്ന് വരുന്നവര്‍ സ്വമേധയാ മുന്‍കരുതല്‍ എടുക്കണം. അത്തരക്കാര്‍ വീടുകളിലോ ഹോട്ടലുകളിലോ മറ്റാളുകളെ സ്വീകരിക്കുകയോ സമ്ബര്‍ക്കത്തില്‍ ഏര്‍പ്പെടുകയോ ചെയ്യരുത്. വിദേശ പൗരന്മാര്‍ സ്റ്റേറ്റ് സെല്ലിനെ വിവരം അറിയിക്കണം.