ഇക്കഴിഞ്ഞ ഞായറാഴ്ച എഴുകോണ്‍ റെയില്‍വേ സ്റ്റേഷനു സമീപം പാളത്തിനു കുറുകെ തടി വച്ച് ട്രെയിന്‍ അട്ടിമറിക്കാന്‍ ശ്രമം നടത്തിയ സംഭവത്തില്‍ റെയില്‍വേ പ്രൊട്ടക്ഷന്‍ ഫോഴ്‌സ കൊല്ലം ചീഫ് ജുഡീഷ്യല്‍ മജിസ്‌ട്രേട്ട് കോടതിയില്‍ എഫ്‌ഐആര്‍ സമര്‍പ്പിച്ചു. 

പാളത്തില്‍ വച്ചിരുന്ന തടിയും തൊണ്ടിമുതലായി ഹാജരാക്കി. റെയില്‍വേ ആക്ടിലെ 153, 147 വകുപ്പുകള്‍ പ്രകാരമാണ് കേസ് ചാര്‍ജ് ചെയ്തിരിക്കുന്നത്.

സെക്ഷന്‍ 153 പ്രകാരം 5 വര്‍ഷം വരെ തടവും പിഴയും ലഭിക്കാവുന്ന ജാമ്യമില്ലാ കുറ്റമാണിത്. യാത്രക്കാര്‍ക്ക് മനഃപൂര്‍വം ജീവാപായം ഉണ്ടാക്കാന്‍ ശ്രമിച്ചതിനാണ് കേസ് എടുത്തിരിക്കുന്നത്. റെയില്‍വേ ഭൂമിയില്‍ അതിക്രമിച്ചു കയറിയതിന് സെക്ഷന്‍ 147-ഉം ചുമത്തിയിട്ടുണ്ട്. ഇന്നലെ ആര്‍പിഎഫ് തിരുനല്‍വേലി സിഐ എസ്.കിരണ്‍ സ്ഥലത്തെത്തി വിവരങ്ങള്‍ ശേഖരിച്ചു. അന്വേഷണ ചുമതലയുള്ള ആര്‍പിഎഫ് എസ്‌ഐ ആര്‍.വി.മനോജ്കുമാറും ഒപ്പമുണ്ടായിരുന്നു. അന്വേഷണത്തിനു കേരള പൊലീസ് സൈബര്‍സെല്ലിന്റെ സഹായവും തേടി.

സംഭവദിവസം രാത്രി പ്രദേശം കേന്ദ്രീകരിച്ചുള്ള മൊബൈല്‍ ഫോണ്‍ കോളുകളുടെ വിവരങ്ങള്‍ പൊലീസ് അന്വേഷിച്ചു വരികയാണ്. തിരുനെല്‍വേലിയില്‍ നിന്നു പാലക്കാടേക്ക് പോകുകയായിരുന്ന പാലരുവി എക്‌സ്പ്രസാണ് അട്ടിമറി ശ്രമത്തില്‍ നിന്ന് ഭാഗ്യത്തിനു ഒഴിവായത്. ഞായര്‍ പുലര്‍ച്ചെ 4-ന് ആയിരുന്നു സംഭവം. എഴുകോണ്‍ സ്റ്റേഷനില്‍ നിന്നും 200 മീറ്ററോളം അകലെ പാളത്തിനു കുറുകെ വച്ചിരുന്ന തടിയില്‍ ട്രെയിന്‍ ഇടിക്കുകയും ഇതുമായി 100 മീറ്ററോളം മുന്നോട്ടു പോകുകയും ചെയ്തു. വേഗം കുറവായിരുന്നതിനാലാണ് വന്‍ദുരന്തം ഒഴിവായത്.