കൊറോണക്ക് പുറമെ സംസ്ഥാനത്ത് പക്ഷിപ്പനിയും ....കോഴിക്കോട് ജില്ലയിലെ ചില പ്രദേശങ്ങളില്‍ വവ്വാലുകളെ കൂട്ടത്തോടെ ചത്ത നിലയില്‍ കണ്ടെത്തിയത് ഈ സാഹചര്യത്തിൽ ആകാംക്ഷ ഉണ്ടാക്കുന്നു... കാരശ്ശേരി കാരമൂലയിലാണ് വവ്വാലുകളെ കൂട്ടത്തോടെ ചത്ത നിലയില്‍ കണ്ടെത്തിയത്. പക്ഷിപ്പനി സ്ഥിരീകരിച്ച കൊടിയത്തൂര്‍ പഞ്ചായത്തിന് തൊട്ടടുത്തുളള പഞ്ചായത്താണ് കാരശ്ശേരി.

ഇവിടെ ഇരുപത്തിയഞ്ചോളം വവ്വാലുകളെയാണ് കഴിഞ്ഞ ദിവസം ചത്ത നിലയില്‍ കണ്ടെത്തിയത്. ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. മൂന്നടിയോളം ആഴത്തില്‍ കുഴിയെടുത്ത് അതീവ ജാഗ്രതയോടെയാണ് ഇവയെ കുഴിച്ചുമൂടിയത്.

ഇന്ന് രാവിലെ നടക്കാനിറങ്ങിയവരാണ് വവ്വാലുകളെ കൂട്ടത്തോടെ ചത്തൊടുങ്ങിയ നിലയില്‍ കണ്ടെത്തിയത്. ഇവര്‍ ആരോഗ്യ വകുപ്പിനെ വിവരം അറിയിക്കുകയായിരുന്നു. ഇന്നലെ രാത്രി അസാധാരണമായി ഇവര്‍ ശബ്ദമുണ്ടാക്കിയതായി നാട്ടുകാര്‍ പറയുന്നു. വിശദമായ പരിശോധന നടത്താനാണ് അധികൃതരുടെ തീരുമാനം. പക്ഷിപ്പനിയുടെ പശ്ചാത്തലത്തില്‍ രൂപീകരിച്ച പ്രത്യേക സംഘവും സ്ഥലത്തെത്തി പരിശോധന നടത്തിയിട്ടുണ്ട്.

കോഴിക്കോട് വേങ്ങേരി, കൊടിയത്തൂര്‍ എന്നീ പ്രദേശത്തെ ഫാമുകളിലാണ് പക്ഷിപ്പനി സ്ഥിരീകരിച്ചത്. നിലവില്‍ ഇവിടെ 10 കിലോമീറ്റര്‍ ചുറ്റളവില്‍ കോഴിയിറച്ചി വില്‍പ്പനയ്ക്ക് നിരോധനം ഏര്‍പ്പെടുത്തിയിരിക്കുകയാണ്. ഒരു കിലോമീറ്റര്‍ ചുറ്റളവിലുള്ള പ്രദേശത്തെ മുഴുവന്‍ വളര്‍ത്തു പക്ഷികളേയും ഒരാഴ്ചയ്ക്കുള്ളില്‍ കൊന്നുകളയാനാണ് നീക്കം. ദേശാടനപ്പക്ഷികളാണ് പക്ഷിപ്പനിയുടെ ഉറവിടം എന്നാണ് പ്രാഥമിക നിഗമനം.