മകനെ ജാമ്യത്തിലിറക്കാന്‍ ഇനി വള്ളിയമ്മു വരില്ല. ബന്ധുക്കളും നാട്ടുകാരും നോക്കി നില്‍ക്കെ അമ്മയെ റോഡിലിട്ടു തീ കൊളുത്തി കൊന്ന കേസില്‍ ജയിലിലായ മകന്‍ ഉണ്ണിക്കൃഷ്ണന് ഇനി അകത്തു തന്നെ കിടക്കേണ്ടി വരും. മുല്ലശേരി മാനിനക്കുന്നില്‍ വാഴപ്പുള്ളി വീട്ടില്‍ പരേതനായ അയ്യപ്പക്കുട്ടിയുടെ ഭാര്യ വള്ളിയമ്മു (85) ഇന്നലെ മെഡിക്കല്‍ കോളജ് ആശുപത്രിയില്‍ മരിച്ചു.

വായില്‍ ടോര്‍ച്ച്‌ കുത്തിക്കയറ്റിയ കേസില്‍ ജയിലില്‍ കിടക്കുകയായിരുന്ന മകനെ അമ്മ രണ്ട് മാസം മുന്‍പാണ് ജാമ്യത്തിലിറക്കിയത്. വള്ളിയമ്മുവിനെ ഉണ്ണിക്കൃഷ്ണന്‍ മുന്‍പും പല തവണ ഉപദ്രവിച്ചിരുന്നതായി പറയുന്നു. ഉണ്ണിക്കൃഷ്ണന്റെ മകന്റെ ഭാര്യയുടെ കൈയില്‍ നിന്നു തന്റെ സമ്മതമില്ലാതെ ചായ വാങ്ങി കുടിച്ചതിന് ഉണ്ണിക്കൃഷ്ണന്‍ വള്ളിയമ്മുവിനെ മടല്‍ കൊണ്ട് അടിക്കാനോങ്ങി. അപ്പോള്‍ റോഡിലേക്കിറങ്ങിയ അമ്മയെ പിന്തുടര്‍ന്ന മകന്‍ വീട്ടില്‍ സൂക്ഷിച്ചിരുന്ന തിന്നര്‍ ഒഴിച്ചു തീ കൊളുത്തുകയായിരുന്നു. വള്ളിയമ്മുവിന് വടി കുത്തിപ്പിടിച്ചേ നടക്കാനാകൂ. ഇതിനാല്‍ രക്ഷപ്പെടാനായില്ല. കുറച്ചകലെയായി റോഡില്‍ സമീപവാസികള്‍ ഉണ്ടായിരുന്നെങ്കിലും അവര്‍ എത്തും മുന്‍പ് തീ ആളിപ്പടര്‍ന്നിരുന്നു. ബുധനാഴ്ച രാവിലെ 8.30നായിരുന്നു സംഭവം. ഉണ്ണിക്കൃഷ്ണനെ കോടതി റിമാന്‍ഡ് ചെയ്തു. വള്ളിയമ്മുവിന്റെ സംസ്കാരം ഇന്ന് 11.30 ന് വീട്ടുവളപ്പില്‍. പ്രഷീത, ലളിത എന്നിവരാണ് മറ്റു മക്കള്‍. മരുമക്കള്‍: അനിത, സജീവന്‍, വേലായുധന്‍.