ഇറ്റലിയില്‍ നിന്ന് രോഗബാധയില്ലാതെയാണ് മകള്‍ വന്നതെന്ന് ഉറപ്പിച്ചിട്ടും ആരോഗ്യവകുപ്പ് നിര്‍ദ്ദേശിച്ച രീതിയില്‍ 28 ദിവസം പൊതുജനസമ്പർക്കമില്ലാതെ വീട്ടിൽ കഴിയാൻ തീരുമാനിച്ച അമ്മയുടെയും മകളുടെയും കരുതലിന്റെ കഥയാണിത്. പക്ഷെ സത്യം അറിഞ്ഞിട്ടും നാട്ടുകാർ പ്രചരിപ്പിച്ച നുണക്കഥ മകള്‍ക്ക് കൊറോണ ബാധയെന്നായിരുന്നു. അവരെ ഈ നാട്ടില്‍ നിന്ന് തുരത്തണമെന്നായി പിന്നീടുള്ള നാട്ടുകാരുടെ തീരുമാനം. 

ഇറ്റലിയില്‍ പഠിക്കാന്‍ പോയ മകള്‍ നാട്ടില്‍ തിരിച്ചെത്തിയത് കഴിഞ്ഞ ഞായറാഴ്ചയാണ്. കൊച്ചിയില്‍ ബിരുദാനന്തരബിരുദ വിദ്യാര്‍ഥിനിയായ മകള്‍ക്കു കോഴ്സിന്റെ ഭാഗമായിട്ടാണ് ഇറ്റലിയിലെ സര്‍വകലാശാലയില്‍ പഠിക്കാനവസരം കിട്ടിയത്. വൈറസ് ബാധ വഷളാകുന്നത് കണ്ടപ്പോള്‍ അസുഖം ബാധിക്കാത്തവരോട് നാട്ടിലേക്ക് മടങ്ങിപ്പോകാന്‍ ആവശ്യപ്പെട്ടത് സര്‍വകലാശാലയാണ്. ബാക്കി പഠനം ഓണ്‍ലൈനായി ചെയ്യാനുള്ള അനുവാദവും കൊടുത്തു. അങ്ങനെ മകള്‍ ഞായാറാഴ്ച നെടുമ്പാശ്ശേരി എയര്‍പോര്‍ട്ടില്‍ എത്തുന്നത്.

വരുന്നതിന് മുമ്പേ കോട്ടയത്തെ സ്വകാര്യ സ്കൂളിലെ ഹയര്‍ സെക്കന്‍ഡറി അധ്യാപികയായ അമ്മ 'ദിശ'യുമായി സംസാരിച്ച്‌ മുന്‍കരുതലുകളെക്കുറിച്ച്‌ മനസിലാക്കി. ബാങ്ക് ഉദ്യോഗസ്ഥനായ ഭര്‍ത്താവ് എറണാകുളത്തായതുകൊണ്ട് സ്വന്തം കാര്‍ ഡ്രൈവ് ചെയ്താണ് അമ്മ എയർപോട്ടിലേയ്ക്ക് പോയി. അതിന് മുമ്പുതന്നെ അടുത്ത ഒരു മാസത്തേയ്ക്ക് ആവശ്യമായ സാധനങ്ങള്‍ അമ്മ വീട്ടിലേക്ക് വാങ്ങിയിരുന്നു.

വിമാനത്താവളത്തില്‍ പരിശോധനകള്‍ നടത്തി. മകൾക്ക് രോഗലക്ഷണങ്ങളില്ല. വീട്ടില്‍ പോകാന്‍ അനുവദിച്ചു.എങ്കിലും മാസ്കുകള്‍ കരുതിയിരുന്നു. ആരേയും തൊടാതെ.. വ്യക്തമായ അകലം പാലിച്ച്‌, കൈകള്‍ കഴുകി, വളരെ ശ്രദ്ധിച്ചാണ് കാറിലേക്ക് പോലും കയറിയത്. വിമാനത്താവളത്തില്‍ അച്ഛൻ എത്തിയത് മറ്റൊരു കാറിലാണ്. മകള്‍ക്ക് അസുഖമുണ്ടെന്ന് തിരിച്ചറിഞ്ഞാല്‍ ഒരാള്‍ എങ്കിലും പുറത്ത് വേണമെന്നതായിരുന്നു അതിന് കാരണം. കോട്ടയത്തെ വീട്ടിലേക്ക് വരുമ്പോൾ മറ്റൊരിടത്തും ഇറങ്ങരുതെന്ന് നിര്‍ബന്ധമായിരുന്നു. പ്രഭാത ഭക്ഷണം,വെള്ളം എല്ലാം കാറില്‍ കരുതി. എ.സി പോലും ഓണാക്കിയില്ല. കോട്ടയത്ത് എത്തി പ്രാഥമിക ആരോഗ്യ കേന്ദ്രത്തില്‍ കാര്യം അറിയിച്ചു. 14 ദിവസത്തേയ്ക്ക് ക്വാറന്റയിന്‍ വേണമെന്ന് നിര്‍ദേശം.

യാതൊരു ലക്ഷണങ്ങളുമില്ല.എങ്കിലും അനുസരിക്കാന്‍ തയാറായി. ദിവസവും രണ്ട് നേരം ഉദ്യോഗസ്ഥന്‍ ഫോണില്‍ വിളിക്കും. എന്നാല്‍ നാട്ടുകാരില്‍ നിന്നു വളരെ മോശമായ തരത്തിലുള്ള പ്രചാരണം കാണുമ്പോൾ മാത്രം അധ്യാപികയായ ആ അമ്മ അല്പം പതറിപ്പോകും. ''ഞങ്ങളുടെ ജീവന് പോലും ഭീഷണിയുണ്ടോയെന്ന് പേടിയുണ്ട്. എന്റെ സുഹൃത്തുക്കള്‍ പല ഗ്രൂപ്പിലും കാര്യങ്ങള്‍ വിശദീകരിക്കുന്നുണ്ട്. എങ്കിലും നുണപ്രചരണങ്ങള്‍ക്ക് കുറവില്ല. '' ആ അമ്മ പറയുന്നു. '' ആര്‍ക്കും കുഴപ്പം വരരുതെന്നേ ആഗ്രഹമുള്ളൂ. അത് കൊണ്ടാണ് ആരും പറയാതെ ക്വാറന്റയിന് തയാറായത്. എന്നിട്ടും കുറ്റപ്പെടുത്തലുകള്‍ കേൾക്കുമ്പോൾ വിഷമമുണ്ടെന്ന് അമ്മ പറയുന്നു. സംഭവങ്ങൾ കളക്ടറുടെ മുന്നിലെത്തിച്ചപ്പോൾ തങ്ങളെ ഓർത്തിട്ടെന്നോണം വ്യാഴാഴ്ച ഇറക്കിയ പത്രക്കുറിപ്പിൽ വീട്ടില്‍ കഴിയുന്ന പലരും പൊതുജനങ്ങളുടെ നന്മയ്ക്ക്‌ വേണ്ടിയാണ് കഴിയുന്നതെന്ന് തിരിച്ചറിയണം' എന്ന് കളക്ടർ പറഞ്ഞതും ഓർത്തെടുക്കുകയാണ് ഈ അമ്മ.