കൈയും കാലും കൂട്ടിക്കെട്ടി കഴുത്തില്‍ കേബിള്‍ കുരുക്കിട്ട് വാഴത്തടയില്‍ ബന്ധിച്ച് പുഴയില്‍ എറിഞ്ഞ നായയെ രക്ഷപ്പെടുത്തി!
ഇക്കഴിഞ്ഞ 4 ദിവസങ്ങളായി മൂവാറ്റുപുഴയാറിലെ ചതിക്കുഴികളെയും വെള്ളക്കെട്ടിനെയുമെല്ലാം അതിജീവിക്കാനുള്ള പോരാട്ടത്തിലായിരുന്നു ഒരു നായ. ഒടുവില്‍ രാമമംഗലം ചൊവ്വാറ്റുതാഴം കടവില്‍ നിന്നും അവന്‍ ജീവതത്തിലേക്ക് തിരികെ കയറി.
രാമമംഗലം മാര്‍ക്കറ്റ് റോഡിനു സമീപം കാടു പിടിച്ച ഭാഗത്ത് വെള്ളത്തില്‍ നായ് നില്‍ക്കുന്നത് എതിര്‍കരയിലുള്ള മണീട് പഞ്ചായത്തിലുള്ള ചിലര്‍ കഴിഞ്ഞ തിങ്കളാഴ്ച കണ്ടിരുന്നു. ഇതേ സ്ഥലത്ത് ഇന്നലെ വൈകുന്നേരവും ഇതേ നായയെ കണ്ടതോടെ ഇവര്‍ വിവരം സിപിഎം രാമമംഗലം ലോക്കല്‍ സെക്രട്ടറി ജിജോ ഏലിയാസിനെ അറിയിച്ചു.
നായയുടെ ദുരവസ്ഥ തിരിച്ചറിഞ്ഞത് ജിജോയും സഹപ്രവര്‍ത്തകരും നടത്തിയ തിരച്ചിലിലാണ്. കൈയും കാലും കൂട്ടിക്കെട്ടി കഴുത്തില്‍ കേബിള്‍ കുരുക്കിട്ട് വാഴത്തടയില്‍ ബന്ധിച്ച നിലയിലായിരുന്നു നായ്. ആരെങ്കിലും പിടികൂടി കുരുക്കിട്ട് പുഴയില്‍ എറിഞ്ഞതാകാമെന്നാണ് സംശയം. കൈകാലുകള്‍ ബന്ധിച്ചിരുന്നതിനാല്‍ നീന്തുവാനും കഴിഞ്ഞിരുന്നില്ല.
വാഴത്തട പുഴയിലേക്ക് ചാഞ്ഞിരുന്ന വള്ളിപ്പടര്‍പ്പില്‍ തങ്ങിയതിനാലാണ് ഇവിടെ കുടുങ്ങാന്‍ കാരണമായത്. ഭക്ഷണം ഇല്ലാതെ വെള്ളത്തില്‍ നിന്നിരുന്നതിനാല്‍ അവശ നിലയിലായ നായയെ ഏറെ പണിപ്പെട്ടാണ് കരയിലെത്തിച്ചതെന്ന് ജിജോ പറഞ്ഞു.
https://www.facebook.com/Malayalivartha
