കൊവിഡ് 19 വൈറസിന്റെ പശ്ചാത്തലത്തിൽ കെഎസ്ആര്‍ടിസിയുടെ എസി ബസ് സര്‍വ്വീസുകള്‍ നിര്‍ത്തിവയ്ക്കണം എന്ന ആവശ്യം ശക്തം. ജീവനക്കാരാണ് ഈ ആവശ്യവുമായി രംഗത്ത് വന്നിരിക്കുന്നത് . കെഎസ്ആര്‍ടിസിയി തൊഴിലാളി സംഘടനകളുടെ നേതൃത്വത്തിലാണ് എസി ബസ് സര്‍വ്വീസുകള്‍ നിര്‍ത്തണമെന്ന ആവശ്യം ഉയർന്ന് വന്നിരിക്കുന്നത്. ആ ആവശ്യം ചൂണ്ടിക്കാട്ടി എംഡിക്ക് കത്തയച്ചിട്ടുണ്ട്. കൊവിഡ് 19 വൈറസ് എസി ബസുകളില്‍ എളുപ്പത്തില്‍ പടരാനുള്ള സാധ്യത ചൂണ്ടിക്കാണിച്ചായിരുന്നു ജീവനക്കാർ ഈ ആവശ്യം ഉയർത്തിയിരിക്കുന്നത്.

എന്നാൽ കൊവിഡ് വൈറസ് ജാഗ്രതാ നിര്‍ദേശത്തിന്റെ ഭാഗമായി യാത്രക്കാര്‍ കുറഞ്ഞിരുന്നു. കെഎസ്ആര്‍ടിസിയുടെ വരുമാനത്തില്‍ പ്രതിദിനം ഒരു കോടി രൂപയോളം കുറവുണ്ടാകുകയും ചെയ്തു. പ്രതിദിനം ശരാശരി ആറുമുതല്‍ ആറര കോടി രൂപവരെ കിട്ടുന്ന സാഹചര്യത്തിൽ ഇപ്പോള്‍ അഞ്ചുകോടി രൂപയാണ് കലക്ഷന്‍ കിട്ടുന്നത്. ദീര്‍ഘദൂര യാത്രക്കാരുടെ എണ്ണം വലിയ തോതില്‍ കുറഞ്ഞതായി കെഎസ്ആര്‍ടിസി വൃത്തങ്ങള്‍ അറിയിക്കുകയും ചെയ്തു . ഏറ്റവും വരുമാനമുള്ള തൃശൂർ ഡിപ്പോയിൽ മാത്രം പ്രതിദിന വരുമാനത്തിൽ ശരാശരി രണ്ടു ലക്ഷം രൂപയുടെ കുറവുണ്ടെന്നും റിപ്പോര്‍ട്ടുകള്‍ വരുന്നുണ്ട്. തൃശൂർ ഡിപ്പോയിൽ ജനുവരിയിൽ ശരാശരി പ്രതിദിന വരുമാനം 12 ലക്ഷം രൂപയാണ്. ഫെബ്രുവരിയിൽ ശരാശരി 11.25 ലക്ഷം രൂപയാകുകയും ചെയ്യും . മാർച്ച്‌ ഏഴിന് 11.75 ലക്ഷമുണ്ടായിരുന്നത്‌ ബുധനാഴ്‌ച ഒമ്പതു ലക്ഷമായി കുറഞ്ഞെന്നും കണക്കുകള്‍ സൂചിപ്പിക്കുന്നു.