കൊറോണ വൈറസിനെ നിയന്ത്രിക്കുന്നതില്‍ സംസ്ഥാന സര്‍ക്കാരിന് വീഴ്ച പറ്റിയെന്ന പ്രതിപക്ഷത്തിന്റെ ആരോപണത്തിന് മറുപടിയുമായി ആരോഗ്യമന്ത്രി കെ.കെ ശൈലജ രംഗത്ത്. കേന്ദ്ര മാര്‍ഗ നിര്‍ദേശങ്ങള്‍ അനുസരിച്ചാണ് പ്രവര്‍ത്തിച്ചതെന്നും സാഹചര്യത്തിന്റെ ഗൗരവം പ്രതിപക്ഷം ഉള്‍ക്കൊള്ളണമെന്നും മന്ത്രി നിയമസഭയില്‍ വ്യക്തമാക്കി. താന്‍ വിചാരിച്ചാല്‍ ഒറ്റയ്ക്ക് ഒന്നും ചെയ്യാനാകില്ല, ചെറിയ പിശക് പോലും ചൂണ്ടിക്കാട്ടി അക്രമിക്കുകയാണ്, അങ്ങനെ ചെയ്താല്‍ രോഗം തടയാനാകില്ലെന്നും മന്ത്രി പറ‌ഞ്ഞു. നിയമസഭയില്‍ പ്രതിപക്ഷം കൊണ്ടുവന്ന അടിയന്തര പ്രമയേത്തില്‍ ചര്‍ച്ചയ്ക്കു മറുപടി പറയുകയായിരുന്നു കെകെ ശൈലജ.

ആരോഗ്യമന്ത്രിയുടെ പ്രസംഗത്തിലെ പ്രസക്ത ഭാഗങ്ങൾ ഇങ്ങനെ;

ചികിത്സയില്‍ കഴിയുന്ന ഇറ്റലിയില്‍ നിന്ന് വന്ന പത്തനംതിട്ട സ്വദേശികള്‍ രോഗവിവരം മറച്ചുവച്ചിരുന്നെന്ന് മന്ത്രി ആവര്‍ത്തിച്ചു. 'പനി വന്നിട്ട് സ്വകാര്യ ഡോക്ടറുടെയടുത്ത് പോയിട്ടും ഇറ്റലിയില്‍ നിന്ന് വന്ന വിവരം മനപ്പൂര്‍വം മറച്ചുവച്ചു. സൂത്രത്തില്‍ കണ്ടുപിടിച്ചതാണ്. ആദ്യം ചോദിച്ചപ്പോള്‍ സമ്മതിച്ചില്ല. പേടിപ്പിച്ചിട്ടൊന്നുമില്ല. അനുനയിപ്പിച്ച്‌ ചോദിച്ചു. അപ്പോഴാണ് ഇറ്റലിയില്‍ പോയത് പറഞ്ഞ്. എന്നിട്ടുള്ള വിഷമങ്ങളാണ് പറഞ്ഞത്. അത് പറയാതിരുന്നാല്‍ സാധാരണക്കാര്‍ക്ക് മുന്‍കരുതലുകള്‍ എടുക്കണ്ടേ?അത് ഞാന്‍ പ്രതിപക്ഷ നേതാവിനോട് പേഴ്സണലായി പറഞ്ഞിരുന്നു.

'വിമാനത്താവളത്തില്‍ ഡോക്ടര്‍മാരുടെ സാന്നിധ്യം പോലും ഉണ്ടായില്ലെന്ന് പറ‌ഞ്ഞു. അറിയാത്ത വിവരങ്ങള്‍ ദയവ് ചെയ്ത് അസംബ്ലി തലത്തില്‍ പറയരുത്. ആക്രമിക്കാന്‍ എന്തെല്ലാം അവസരങ്ങളുണ്ട്. ഇതൊഴിച്ചുള്ള പ്രശ്നങ്ങള്‍ നമുക്ക് അസംബ്ലിയില്‍ ചര്‍ച്ച ചെയ്യുമ്ബോള്‍ കണ്ണുംപൂട്ടി നമുക്ക് അങ്ങോട്ടും ഇങ്ങോട്ടും അസ്ത്രങ്ങളെയ്യാം. നമ്മളാക്രമിക്കേണ്ട സമയമല്ലിത്. എനിക്കാരോടും ഒരു പരിഭ്രമവുമില്ല'. 'കൊറോണ ആദ്യം സ്ഥിരീകരിച്ചപ്പോള്‍ അസംബ്ലിയുമായി ബന്ധപ്പെട്ട് മന്ത്രിമാരെല്ലാം തിരുവനന്തപുരത്തായിരുന്നു. മിനിസ്റ്റര്‍ പോകേണ്ടത് പ്രധാനമാണെന്ന് എനിക്ക് തോന്നി. മുഖ്യമന്ത്രിയോട് പറഞ്ഞു അവിടെ അടിയന്തര മീറ്റിംഗ് നടത്തേണ്ടത് കൊണ്ട് പോകുകയാണെന്ന്. എസി.മൊയ്തീന്‍ മിനിസ്റ്ററും സുനില്‍ മിനിസ്റ്ററും ഇവിടെയുണ്ട്. ഒമ്ബതേ മുപ്പതിന്റെ ഫ്ലൈറ്റില്‍ ഞങ്ങള്‍ പോയി. കാറില്‍ പോയാല്‍ കൂടുതല്‍ വൈകും. വിമാനത്താവളത്തിലിറങ്ങിയപ്പോള്‍ നിങ്ങളറിയോ പ്രതിപക്ഷത്തിലേ സുഹൃത്തുക്കളെ ഒന്ന് ബാത്ത് റൂമില്‍ പോകണമെന്ന് തോന്നിയായിരുന്നു. പോയിട്ടില്ല,​ മനസ് നിറയെ ബേജാറും ഉത്കണ്ഠയുമായിരുന്നു. കാരണം അവിടെയവര്‍ കാത്തിരിക്കുകയാണ്. ഫ്രഷാകാന്‍ മുറിയില്‍ പോലും കയറാതെ ഞങ്ങള്‍ നേരെ വിട്ടു. നെടുമ്ബാശ്ശേരിയില്‍ നിന്ന് തൃശൂരിലേക്ക് കഴിയാവുന്ന വേഗത്തിലെത്തി. എത്തുമ്ബോള്‍ അകദേശം പന്ത്രണ്ടു മണിയായി. ചര്‍ച്ച ചെയ്ത് എല്ലാം തീരുമാനിക്കാണം. ചര്‍ച്ച ചെയ്യുമ്ബോള്‍ കൂടെയുള്ളവര്‍ ഇങ്ങനെ പറയില്ലെന്നാ ഞാന്‍ വിചാരിച്ചത്. പ്ലാനിംഗ് കഴിയുമ്ബോഴേക്ക് രണ്ടര കഴിഞ്ഞു' എന്നും മന്ത്രി പറഞ്ഞു.

രോഗികളെ നിരീക്ഷിക്കുന്നതില്‍ സംസ്ഥാന സര്‍ക്കാരിന് വീഴ്ച പറ്റിയെന്ന് പ്രതിപക്ഷം ആരോപിച്ചിരുന്നു. കൊറോണയുമായി ബന്ധപ്പെട്ട വീഴ്ചകള്‍ ചൂണ്ടിക്കാണിക്കാതിരിക്കാനാകില്ലെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞിരുന്നു. കൂടാതെ പ്രതിപക്ഷ നേതാവ് ആരോഗ്യമന്ത്രിക്കു എതിരല്ലെന്നും വിമര്‍ശനങ്ങളെ മന്ത്രി വൈകാരികമായി എടുക്കരുതെന്നും മുനീര്‍ പ്രതികരിച്ചിരുന്നു.