മൂന്നാര്‍ പോലെയുള്ള പ്രധാന ടൂറിസം കേന്ദ്രങ്ങളില്‍ കോവിഡ് 19 വന്‍ പ്രതിസന്ധി സൃഷ്ടിച്ചിരിക്കയാണ്. റിസോര്‍ട്ടുകളിലും ഹോംസ്റ്റേകളിലും 90 ശതമാനം മുറികളും ഒഴിഞ്ഞു കിടക്കുന്നു. സാമ്പത്തിക മേഖല തകര്‍ന്നടിഞ്ഞ സ്ഥിതിയിലാണ്. വ്യാപാര മേഖലയില്‍ ശരാശരി 60 ശതമാനത്തിന്റെ കുറവാണ് രേഖപ്പെടുത്തുന്നത്. പ്രത്യക്ഷമായും പരോക്ഷമായും ടൂറിസം മേഖലയെ ആശ്രയിച്ചു കഴിയുന്ന നൂറ് കണക്കിനു കുടുംബങ്ങളും പ്രതിസന്ധിയിലാണ്.

ഹോട്ടല്‍ ആന്‍ഡ് റസ്റ്ററന്റ് അസോസിയേഷന്‍ മൂന്നാര്‍ യൂണിറ്റ് പ്രസിഡന്റ് കെ.എം അലിക്കുഞ്ഞ് പറയുന്നത്, ഭക്ഷണ ശാലകളില്‍ 70 ശതമാനം വ്യാപാരം കുറഞ്ഞെന്നാണ്. ടൗണിലെ 4 പ്രമുഖ ഭക്ഷണ ശാലകള്‍ അടച്ചുപൂട്ടി. മറ്റു സ്ഥാപനങ്ങള്‍ തൊഴിലാളികളുടെ എണ്ണം കുറച്ചുകൊണ്ടിരിക്കുന്നു. പക്ഷിപ്പനി ഭീതിയില്‍ ഹോട്ടലുകളില്‍ കോഴിയിറച്ചി വിഭവങ്ങളുടെ വില്‍പനയില്‍ 80 ശതമാനത്തിന്റെ കുറവുണ്ട്. മൂന്നാറിലെ പഴം, പച്ചക്കറി ചന്തയും വിജനമാണ്. 60 ശതമാനം വരെ വ്യാപാര കുറവാണ് ഈ ദിവസങ്ങളില്‍ രേഖപ്പെടുത്തിയത്.

ദിവസേന പതിനായിരം രൂപയുടെ വരെ പഴങ്ങള്‍ വാങ്ങിയിരുന്ന ഒരു വന്‍കിട റിസോര്‍ട്ട് കഴിഞ്ഞ ദിവസം ആകെ വാങ്ങിയത് ഒരു കിലോ ചെറുനാരങ്ങ ആണെന്ന് ഒരു വ്യാപാരി പറയുന്നു. പച്ചക്കറികളുടെ വില 40 ശതമാനം വരെ കുറഞ്ഞെങ്കിലും വാങ്ങാന്‍ ആളില്ലാത്ത സ്ഥിതിയാണ്. കോഴിയിറച്ചി വ്യാപാരത്തില്‍ 80 ശതമാനത്തിന്റെ കുറവ് ഉണ്ടെങ്കിലും വില കുറയ്ക്കാന്‍ മൂന്നാറിലെ കച്ചവടക്കാര്‍ തയാറായിട്ടില്ല.

പ്രധാന ടൂറിസം കേന്ദ്രങ്ങള്‍ എല്ലാം അടച്ചതോടെ സഞ്ചാരികള്‍ എത്തുന്നില്ല. മാട്ടുപ്പെട്ടി ഉള്‍പ്പെടെയുള്ള ബോട്ടിങ് കേന്ദ്രങ്ങള്‍ ആണ് ഡിടിപിസിയുടെ പ്രധാന വരുമാന സ്രോതസ്സ്.ഇവരുടെ മൂന്നാറിലെ വിവര കൈമാറ്റ കേന്ദ്രത്തില്‍ എത്തുന്ന സന്ദര്‍ശകരുടെ എണ്ണത്തിലും 80 ശതമാനത്തിന്റെ കുറവുള്ളതായാണ് കണക്ക്. സഞ്ചാരികള്‍ നേരിട്ട് എത്തുന്നില്ലെങ്കിലും ഫോണിലൂടെയും മറ്റും മൂന്നാറിലെ സ്ഥിതി ആരാഞ്ഞ് അന്വേഷണങ്ങള്‍ വരുന്നതായി ഡിടിപിസി അധികൃതര്‍ പറയുന്നു. കോവിഡ് രോഗ ബാധ ടൂറിസം വകുപ്പിന് ഉണ്ടാക്കുന്നത് പ്രതിദിനം ശരാശരി 5 ലക്ഷം രൂപയുടെ നഷ്ടമാണ്.